قاز اتوم ونەركاسىپتىڭ ۆيتسە- پرەزيدەنتى اقشانى قالاي ۇرلاعان

استانا. قازاقپارات - بۇگىن استانادا وتكەن «ۇرلانعان اكتيۆتەردى شەتەلدەن قايتارۋ جانە ۇلتتىق قارجى جۇيەسىن دامىتۋ» تاقىرىبىنداعى «دوڭگەلەك ۇستەلدە» باس پروكۋرور جاقىپ اسانوۆ «قاز اتوم ونەركاسىپ» ۇلتتىق كومپانياسىنىڭ بۇرىنعى ۆيسە- پرەزيدەنتى رۇستەم تۇرسىنبايەۆتىڭ قىرۋار قارجىنى قالاي ۇرلاعانىن ايتىپ بەردى،

دەپ حابارلايدى قازاقپارات ءتىلشىسى.

 «قاز اتوم ونەركاسىپ» وففشوردان ادام ويىنا كەلمەيتىن باعامەن كۇكىرت قىشقىلىن ساتىپ الىپ وتىرعان. شىن مانىندە 70 ميلليون دوللار كولەمىندەگى بارلىق قارجىنى كومپانيانىڭ ۆيتسە- پرەزيدەنتى تۇرسىنبايەۆ ءوز قالتاسىنا باسىپ العان. قازىرگى كەزدە ول كانادا بوي تاسالاپ ءجۇر»، - دەدى ج. اسانوۆ.

 ايتا كەتكەن ءجون، ر. تۇرسىنبايەۆ وسىدان جەتى جىل بۇرىن شەتەلگە قاشىپ كەتكەن.

 بۇگىنگى وتىرىس بارىسىندا باس پروكۋرور قازىرگى قارجىلىق قىلمىستاردى تەرگەۋ جۇيەسىن وزگەرتۋ قاجەتتىگىن جەتكىزدى. سەبەبى قۇقىق قورعاۋ ورگاندارى ناقتى ءبىر ىسپەن اينالىسىپ جاتقاندا قىلمىسكەرلەر قىرۋار قاراجاتتى شەتەلگە اۋدارىپ، ەلدەن تايىپ تۇرادى. بىلايشا ايتقاندا، تەرگەۋشىلەردىڭ بارلىق كۇش- جىگەرى بيۋروكراتياعا كەتىپ جاتىر. ال ۇرلانعان اقشا بىردەن تاركىلەنسە، قىلمىسكەر ەشقايدا قاشا المايدى.

 وسى ورايدا ج. اسانوۆ قارجىلىق تەرگەۋلەردى پاراللەلدى جۇرگىزۋ مەحانيزمىن قولعا الۋدى ۇسىندى.

 سونداي- اق قازاقستاندا شەتەلدەگى قارجىنى قايتارۋعا ارنالعان ارنايى جوبانىڭ قولعا الىنعانىن ەرەكشە اتاپ وتكەن ءجون.

سونىڭ اياسىندا شەتەلدىك ماماندار قازاقستاننىڭ 10 قىزمەتكەرىن دايارلاپ جاتىر. وسى كۋرستاردان كەيىن ولار شەتەلدىك تاجىريبەنى بۇكىل اپپاراتقا تاراتاتىن بولادى.

اۆتور: ارمان اسقاروۆ