اقتوبەلىك لاڭكەستىڭ اناسى ۇلى تۋرالى شىندىقتى ايتتى
ريزا تاڭاتاروۆانىڭ ايتۋىنشا، ونىڭ ۇلى اكەسىز وسكەن.
«ءبىز ءومىر بويى پاتەر جالداپ تۇردىق. تۋرگەنيەۆ، شاڭحاي، ءابىلقايىر حان كوشەلەرىندە، تۇرماعان جەرىمىز جوق دەسە دە بولادى. تۇرمىسىمىز تومەن بولدى، تاپشىلىقتىڭ زاردابىن تارتۋىنداي-اق تارتتىق. جالعىز باستى انا رەتىندە جاردەماقى الۋىم قاجەت بولعان، ءبىراق تۇراقتى تىركەلگەن جەرىم بولماعان سوڭ ونى دا الا المادىق. سودان سوڭ مەملەكەتكە بوس جالتاقتاي بەرگەن قاجەت ەمەس دەپ شەشتىك. ارسەن 8 سىنىپ بىتىرگەن. سودان كەيىن ەش جەردە وقىمادى. سەبەبى جاعدايىمىز بولمادى. 14 جاسىنان باستاپ قۇرىلىستا ءتۇرلى جۇمىستاردا كومەكشى بولىپ جۇمىس ىستەدى. جالعىز ءوزى ءبىزدى اسىرادى. سوڭعى جىلدارى قۇرىلىستا جۇمىس بولمادى، ول كارىز جۇيەلەرىن تازالاۋ، قار كۇرەۋ سياقتى جۇمىستارمەن دە اينالىستى. سوسىن بازاردا تەلەفون ساتۋعا شىقتى. مەن وعان ۇرلانعان تەلەفونداردى الماۋىن، قۇجاتتارىن تەكسەرۋىن ءوتىنىپ ءجۇردىم. ول ماعان قارسى كەلىپ كورگەن ەمەس، «ءسىز» دەپ سويلەسەدى»، - دەدى ريزا تاڭاتاروۆا.
اناسى ارسەن نامازدى 18 جاسىنان وقي باستاعانىن ايتتى، جۇما سايىن «نۇرداۋلەت» مەشىتىنە باراتىن. سوڭعى ۋاقىتتاردا قالانىڭ ەسكى بولىگىندەگى ءبىر مەشىتكە بارىپ ءجۇردى. ءبىراق، اناسى ونىڭ ورتاسىندا راديكالدىق كوزقاراسپەن ادامدار بولعان-بولماعانىن بىلمەيدى. «ارسەن قىزعانشاق، ۇيگە ەشكىمدى اكەلمەيتىن. سوندىقتان كىممەن تىعىز ارالاسقانىن بىلمەيمىن. ول قالانىڭ ءار اۋداندارىندا تۇردى، سوندىقتان دوستارى مەن تانىستارى دا كوپ بولاتىن»، - دەدى تاڭاتاروۆا.
ونىڭ ايتۋىنشا، ارسەن دميتري تاڭاتاروۆ پەن ارمان ايتۋعاندى تانىمايدى، سول قىرسىق شالعان 5- ماۋسىم كۇنى ول تابيعات اياسىنا سەرۋەنگە شىعۋعا ازىرلەنگەن. «5- ماۋسىم تاڭەرتەڭ ول اپكەسى، جەزدەسىمەن سەرۋەنگە شىعاتىنىن، ەت ساتىپ الۋعا باراتىنىن ايتتى. الايدا، ساعات 12.30 دىڭ كەزىندە ونىڭ ۇيالى تەلەفونى ءسوندىرۋلى بولدى. وعان بىرەۋدىڭ اعاسى ۇلدى بولىپ، شىلدەحاناعا شاقىرعانىن حابارلاعان. سويتسە الداپ شاقىرىپتى. ۇلىم بارعان كەزدە ودان تەلەفوندى الىپ قويعان»، - دەپ ارسەننىڭ اناسى سول كۇندى سيپاتتاپ بەردى.
«كەيىننەن تەرگەۋ اباقتىسىندا قىلمىس تۋرالى حابارلاماعانى ءۇشىن سوتتالىپ جاتقانداردىڭ ءبىرى ارسەننىڭ كەتكىسى كەلگەندىگىن، تەلەفونىن الماقشى بولىپ كەتىپ، سودان بەرى ول ونى كورمەگەن. ال بۇل جىگىت كەيىنىرەك كەلگەن، سوندىقتان تەلەفونىن تاپسىرماعان، ونىڭ جىلدام كەتىپ قالۋعا مۇمكىندىگى بولعان. ارسەنگە ىزدەۋ جاريالانعانىن ەستىگەندە، شوشىپ كەتتىم. سول پاتەردە ولارعا ەموتسياعا اسەر ەتەتىن بىردەڭەنى سۋعا قوسىپ بەرگەنگە ۇقسايدى. ارسەن جۇكتى ايەلىن، مەنى بۇلاي تاستاپ كەتۋى مۇمكىن ەمەس. ونىڭ ءدىنى تازا بولدى، ساقال قويمادى، شولاق بالاقتى شالبار دا كيگەن ەمەس».
ارسەنگە ىزدەۋ جاريالانعاندا، اناسى اپكەسىمەن بىرگە قالا بويىنشا ونى وزدەرى ىزدەگەن.
«ءبىر كۇنى ارسەن ۆەنەراعا (ايەلى) حابارلاسىپ، بەرىلۋگە قورقاتىنىن، ولار ەسكەرتۋسىز وق اتاتىنىن ايتقان. ارسەندە 5- ماۋسىمدا ەت ساتىپ الماقشى بولعان اقشاسى جانە 7 ءسى كۇنى پاتەرگە تولەيتىن 30 مىڭ تەڭگەسى بولعان. بۇل اقشاعا ول ماي قۇيۋ ستانساسىنان سنيكەرس پەن سۋ ساتىپ العان. ساتۋشىلار ونى تانىماعان، سەبەبى ىزدەۋگە 18 جاسىندا تۇسكەن فوتونى بەرگەن، ول وسى ۋاقىت ارالىعىندا ءبىراز وزگەرگەن»، - دەدى ر. تاڭاتاروۆا.
اناسىنىڭ ايتۋىنشا، ارسەن ءوزى بەرىلگەن، ول ۇيگە كەلدى، وندا ونى ايەلى مەن پوليتسەيلەر كۇتىپ وتىردى. «ۆەنەرا پوليتسيادان وعان وق اتپاۋدى ءوتىندى. ارسەننىڭ ءۇستى قان-قان بولدى، جاراسىن فۋتبولكامەن تاڭىپ قويعان. كيىمنىڭ ورنىنا جىرتىلعان كورپەشە جامىلىپ العان. كۇرە تامىرى كەسىلگەن. ءوز-وزىنە قول جۇمساماق بولعان سياقتى»، - دەپ بولجادى ر. تاڭاتاروۆا.
ايەلىنە «پاللادا» دۇكەنىنە شابۋىل جاسالعان ۋاقىتتا قاتتى قورىققانىن ايتقان. ءاي-شاي جوق اتىپ تاستايدى دەپ ويلاعان. ايىپتالۋشىنىڭ اناسى ارسەن بوي تاسالاپ جۇرگەندە، ودان ونىڭ ءومىربايانى مەن قايدا جاسىرىنۋى مۇمكىن ەكەنىن سۇراعان.
«بىزدەن جاۋاپ العاننان كەيىن، سوتقا نە تۋىسى، نە قورعاۋشىسى رەتىندە قاتىسا المايمىز. ءبىزدى كۋاگەر رەتىندە جازعان. سوتقا ءبىزدى كىرگىزبەيدى. ەشكىممەن سوزگە كەلگىم كەلمەيدى. ويتكەنى ولار سوت ۇكىمىنەن كەيىن ارسەندى قاي تۇرمەگە اپاراتىنىن بىزگە ايتپاي قويۋلارى مۇمكىن، مەن ەندى ۇلىمدى كورمەيتىن شىعارمىن دەپ قورقامىن»، - دەگەن مۇڭىمەن ءبولىستى ارسەننىڭ اناسى.
«وسى ءتورت ايدا ۇيقى-كۇلكى كورمەدىم، كەلىننىڭ قان قىسىمى كوتەرىلىپ ءجۇر، بوساناتىن ۋاقىتى كەلدى، ءبىراق ءالى تۋا الماي ءجۇر. ءبىز ادۆوكاتقا اقشا جينادىق، ءبىراق ارسەن ودان باس تارتتى».
ريزا تاڭاتاروۆا ۇلى مەن باسقا دا ايىپتالۋشىلار ءتيىستى جازالارىن الۋى كەرەكتىگىنە كەلىسەدى. تەك ارسەندى ءومىر بويىنا باس بوستاندىعىنان ايىرماسا ەكەن دەپ تىلەيدى.
«جازىقسىز قازا تاپقان جاندار ءۇشىن قىنجىلامىن. ولاردىڭ تۋىستارىنا شىن جۇرەكتەن كوڭىل ايتامىن، ەگەر وسىعان مەنىڭ ۇلىمنىڭ كىناسى بولسا كەشىرىم سۇرايمىن»، - دەدى ارسەننىڭ اناسى.
