الماتىدا ۇيىمداستىرىلعان كورمەدە اتاقتى امانگەلدى يمانوۆتىڭ قارۋى كورسەتىلدى - فوتو
بۇگىن قازاقستان رەسپۋبليكاسىنىڭ ورتالىق مەملەكەتتىك مۋزەيىندە تۇڭعىش رەت 1916 -جىلعى كوتەرىلىستىڭ 100 جىلدىعىنا ارنالعان «قازاق كوتەرىلىستەرى. ازاتتىق مۇراتى» اتتى كورمە ءوتتى.
كورمەنىڭ اشىلۋىندا قازاقستان رەسپۋبليكاسى مەملەكەتتىك ورتالىق مۋزەيى ديرەكتورىنىڭ ورىنباسارى بەيبىتقالي قاقابايەۆ باستى مىندەتىن ايتىپ بەردى.
«بۇل شارۋالار قوزعالىسى ەدى. ماقسات پاتشالى رەسەيدىڭ بوداندىق ساياساتى مەن ورىستاندىرۋعا قارسىلىق- تۇعىن. مۇندا تورعاي مەن قوستاناي وبلىسى مۇراجايلارىنىڭ قۇجاتتارى جيناقتالىپ، بەرىلىپ وتىر»، - دەدى ول.
كورمەگە ا. يمانوۆتىڭ نەمەرەسى امانگەلديەۆ باتىرۇلان رامازان ۇلى دا كەلدى.
كورمەدە كوتەرىلىس جەتەكشىسى ا. يمانوۆتىڭ ۇستانعان جەكە زاتتارى، اتىس قارۋلارى مەن سۋىق قارۋلارى، ۇستالىق قۇرالدارى كوپشىلىك نازارىنا ۇسىنىلدى.
ايتا كەتەيىك، كورمە جەتىسۋ مەن تورعاي كوتەرىلىسىنىڭ جەتەكشىلەرى مەن قاتىسۋشىلارىنىڭ قىزمەتىن جان- جاقتى اشۋعا باعىتتالعان «جەتىسۋ كوتەرىلىسى»، «تورعاي كوتەرىلىسى»، «ۇلت- ازاتتىق كوتەرىلىس كينو ونەرى الەمىندە» دەپ اتالاتىن ءۇش بولىمنەن تۇرادى.
«جەتىسۋ كوتەرىلىسى» دەپ اتالاتىن ءبىرىنشى بولىمدە پاتشا اسكەرىن جازالاۋ وپەراتسيالارىنا قاتىستى مۇراعاتتىق ماتەريالدار مەن قازاقستان ورتالىق مەملەكەتتىك مۋزەيى قورىنان الىنعان كوتەرىلىس قاتىسۋشىسى توقاش بوكيننىڭ فوتوقۇجاتتىق ماتەريالدارى ۇسىنىلعان. «تورعاي كوتەرىلىسى» اتتى كورمەنىڭ ەكىنشى بولىمىندە كوتەرىلىس جەتەكشىلەرى مەن ونىڭ قاتىسۋشىلارىنىڭ تاريحي ءرولىن ايعاقتايتىن كوپتەگەن فوتوماتەريالدار بار.
اتالعان بولىمدەگى ەرەكشە ورىندى تورعاي كوتەرىلىسىنىڭ جەتەكشىلەرى ا. يمانوۆ پەن ءا. جانگەلديننىڭ جەكە كەشەندەرىنەن بەرىلگەن فوتوقۇجاتتىق ماتەريالدار الىپ وتىر.
كورمەنىڭ «ۇلت- ازاتتىق كوتەرىلىس كينو ونەرى الەمىندە» اتتى ءۇشىنشى بولىمىندە «امانگەلدى» كينوفيلمى مەن قازاق اكادەميالىق تەاترىنىڭ سپەكتاكلدەرىنەن الىنعان ەپيزودتارىنىڭ فوتوماتەريالدارى ۇسىنىلدى. سونداي- اق حالىق سۋرەتشىسى ءا. قاستەيەۆ پەن ب. ۋرمانچەنىڭ كەسكىندەمەلەرى مەن سۋرەتتەرى قويىلعان.
اۆتور: الماس مۇقاش ۇلى
