فرانسيالىق ديزاينەر تاريحتاعى قازاق ايەلدەرىنىڭ ۇلتتىق كيىمدەرىن جاڭعىرتقىسى كەلەدى - فوتو
«ستۋدەنت- جاستاردىڭ بوس ۋاقىتىن ءتيىمدى ۇيىمداستىرۋ، ديزاينەرلىك سالانىڭ قىر- سىرىن ۇيرەتۋ، قىزداردىڭ بويىنداعى دارىندى اشۋعا كومەكتەسۋ، جان- جاقتى بولۋعا دارىپتەۋ ماقساتىندا وتكەن كەزدەسۋ اشىق اڭگىمە تۇرىندە ءوتتى»، - دەپ حابارلادى اتالعان ج و و- دان.
كەزدەسۋدە «كاسىپتىك ءبىلىم» كافەدراسىنىڭ ۇستازى ءلايلا يمانقۇلوۆا قوناقتارعا قىزدار ۋنيۆەرسيتەتىندە تىگىن جانە قولونەر سالاسىنا مامان دايىندايتىن كافەدرانىڭ جۇمىسىن تانىستىردى.
فرانسيا ءسان ءۇيىنىڭ ديزاينەرى لامين مومەد ارنايى اكەلگەن فيلمى ارقىلى ءوز جۇمىسىمەن، تۋىندىلارىمەن تانىستىرىپ، كويلەكتەردى تىگۋدىڭ ەرەكشەلىكتەرى جونىندە ايتىپ بەردى. سونىمەن قاتار ول الداعى ۋاقىتتا قازاق ەلىنىڭ ۇلى دالا انالارىنىڭ بەينەسىن جاساپ، قازاق ۇلتتىق كيىمدەرىن، ناقتى ايتقاندا تەك حانىم بولعان انالاردىڭ كويلەگىن تىككىسى كەلەتىنىن جەتكىزدى.
وسى سالادا بىرلەسكەن جوبا جاساعىسى كەلەتىندىگىن جەتكىزدى.
«بۇل مەنىڭ قازاقستانعا ەكىنشى كەلۋىم، قازاق ەلى ماعان قاتتى ۇنادى. قازاقستاننىڭ بولاشاعى وتە زور دەپ بىلەمىن. ساپارىم اياسىندا قازاقستاندىق ديزاينەرلەردىڭ ءبىراز جۇمىستارىمەن دە تانىسىپ ۇلگەردىم جانە كوڭىلىمنەن شىققانىن اتاپ ايتقىم كەلەدى. جاقىندا الماتىدا وتكەن جاستار فەستيۆالىندە ءوز جۇمىستارىمدى تانىستىردىم. ماعان ازيا ەلدەرىنىڭ ماتالارى وتە ۇنايدى. ءوزىم كوبىنە پەچۆورك (لاسكۋتنوە شيتە) ونەرىمەن اينالىسامىن. قۇراق قۇراي وتىرىپ تىگۋ وتە ۇنايدى. بۇل ونەر ءتۇرى سىزدەردە دە بار ەكەن»، - دەدى تەگى كامەرۋندىق، ءبىراق فرانسيا اتىنان تانىلعان ديزاينەر لامين.
تىگىن ونەرىن 13 جاسىنان اناسىنان ۇيرەنگەن سانگەر: «مەنىڭ جانىما «ىسىراپ»، «وبال» دەگەن سوزدەر جاقىن» دەپ اعىنان جارىلدى.
«جىل سايىن فرانسيادا ساتىلماعان مىڭداعان ايگىلى برەندتەردىڭ كيىمدەرى ورتەلەدى. ول بىرىنشىدەن تابيعاتقا زيان، قانشاما ءتۇتىن ادامزاتقا زالالىن كەلتىرەدى. مەن سوندىقتان، الەمگە تانىمال ەۋروپالىق ديزاينەرلەردىڭ كيىمدەرىن وزگەرتىپ، ساتىپ الۋعا مۇمكىندىگى جەتپەيتىن ادامدارعا سىيعا تارتامىن»، - دەدى لامين كەزدەسۋدە.
شارا بارىسىندا ۋنيۆەرسيتەت قىزدارىنىڭ قولىنان شىققان كويلەكتەرىنەن ارنايى دەفيلە كورسەتىلدى.
اۆتور: الماس مۇقاش ۇلى
