مەملەكەتتىك قىزمەتتىڭ جاڭا جۇيەسى: باسشىلىققا دەيىن ءوسىرۋ قالاي جۇرگىزىلەدى

استانا. قازاقپارات - قازاقستانداعى مەملەكەتتىك قىزمەت اپپاراتىندا مەريتوكراتيا(دارىن قابىلەتىنە قاراي ءوسۋ) نەگىزدەرىن، ياعني قىزمەتكەردى ساتىلاپ ءوسىرۋ جۇيەسىن ەنگىزگەلى بەرى مينيسترلىكتەر مەن اكىمدىكتەردە ىستەيتىن ازاماتتاردىڭ تاراپىنان كونكۋرستىڭ اشىقتىعىنا، اپپەلياتسياعا جانە ەڭبەك ءوتىلىن ساناۋعا قاتىستى سان الۋان سۇراقتار كوپتەپ قويىلا باستادى.

وسىعان بايلانىستى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس اگەنتتىگىنىڭ ماماندارى استانادا ارنايى بريفينگ وتكىزىپ، مەملەكەتتىك قىزمەتكەرلەردى مازالاپ جۇرگەن ساۋالدارعا جاۋاپ بەردى، دەپ حابارلايدى قازاقپارات.

«ماسەلەن، اقمولا وبلىستىق اكىمدىگىندە جۇمىس ىستەيتىن ءبىر مامانننان سۇراق ءتۇستى. ول ءبولىم باستىعى قىزمەتىنە ءوتىنىش بەرگىسى كەلىپ ءجۇر. ءبىراق باس مامان بويىنشا ەڭبەك ءوتىلى جوق. ال مەملەكەتتىك قىزمەتتىڭ جاڭا جۇيەسى ادامنىڭ ساتىلاپ كوتەرىلۋىن كوزدەيدى. قىزمەتكەر جوعارى قىزمەتكە اۋىسۋ ءۇشىن وزىنەن تومەنگى ساتىدا، كەم دەگەندە، ءبىر جىل جۇمىس ىستەۋى ءتيىس. سوندىقتان اقمولا وبلىسىنان ساۋال جولداعان ازاماتقا ايتارىم، ول ءبولىم باسشىسى قىزمەتىنە اۋىسا المايدى»، - دەيدى مەملەكەتتىك قىزمەت دەپارتامەنتىنىڭ مىندەتىن اتقارۋشى جارقىن تىلەۋكەنوۆ.

ونىڭ ايتۋىنشا، بۇگىندە كەز كەلگەن مەملەكەتتىك ورگاندا بوساعان ورىن بويىنشا الدىمەن ىشكى كونكۋرس وتەدى. وعان اپپارات قىزمەتكەرلەرىنەن بولەك، ايماقتىق بولىمشەلەردىڭ ماماندارى دا قاتىسا الادى. ءبىرىنشى كەزەڭدە جەڭىمپاز انىقتالماسا، كونكۋرستىڭ ەكىنشى كەزەڭى جاريالانادى. وعان بارلىق مەملەكەتتىك ورگانداردىڭ قىزمەتكەرلەرىنە قاتىسۋعا بولادى. وندا دا لايىقتى ادام تابىلماي قالسا، ءۇشىنشى كەزەڭ - جالپى كونكۋرس وتكىزىلەدى. سول كەزدە جوعارى وقۋ ورىندارىنىڭ تۇلەكتەرى دە ءوز كانديداتۋرالارىن ۇسىنا الادى. الايدا، كونكۋرستاردىڭ باسىم بولىگى - 80 پايىزى ءبىرىنشى ساتىدان اسپاي جاتادى، ياعني بوس تۇرعان ورىنعا سول مەملەكەتتىك ورگاننىڭ ىشىنەن لايىقتى ازامات تابىلىپ وتىرادى. كونكۋرستاردىڭ 20 پايىزى ەكىنشى جانە ءۇشىنشى كەزەڭگە تيەسىلى.

«بۇرىن باسشى وزىنە جاقىن نەمەسە جاقسى تانيتىن ادامداردى قىزمەتتىك اۋىستىرۋ تەتىگى ارقىلى تاعايىندايتىن. باسقالارى تىس قالىپ وتىردى. سەبەبى ولار تىكەلەي باستىقپەن جۇمىس ىستەگەن جوق. سوندا ونىڭ جەكە قابىلەتتەرى قىزمەتكە قويىلعان ادامنان جوعارى بولسا دا، باسشىلىق تاراپىنان ەسكەرىلمەيتىن ەدى. ونداي جۇيە كەزىندە مەملەكەتتىك قىزمەتكەرلەردىڭ وسۋگە دەگەن ىنتاسى بولمايتىن. وعان قوسا، مەملەكەتتىك اپپاراتقا دەگەن سەنىم دە تومەن بولدى. ءقازىر ءبارى باسقاشا، كونكۋرس ارقىلى كەز كەلگەن ادام ءوزىنىڭ جەكە قابىلەتتەرىن كورسەتە الادى. ءسويتىپ، جوعارى لاۋازىمعا كوتەرىلۋگە مۇمكىندىك بار»، - دەيدى ج. تىلەۋكەنوۆ.