نەلىكتەن شايتاندار قۇلشىلىق ەتۋشىلەرگە كوبىرەك جاقىن بولادى

استانا. قازاقپارات - شەيح اش- شاعراۋي «ءمايدا» سۇرەسىنىڭ 92-اياتىن تاپسىرلەي كەلە بىلاي دەيدى: «اللاعا بوي ۇسىنىڭدار جانە دە ەلشىسىنە بوي ۇسىنىپ ساقتانىڭدار...» دەپ اللانىڭ بۇيىرۋىندا ۇلكەن سىر بار.

ويتكەنى، ءبىز ويلاعانداي شايتان كۇنا ەسىگىنەن ەمەس، عيبادات ەسىگىنەن كەلەدى.

اللا تاعالا اياتتا اللانىڭ پارىزى مەن پايعامبارىمىزدىڭ (س. ع. س. ) سۇننەتىنە بويۇسىنعاننان كەيىن، «ساقتانىڭدار» دەپ بۇيىرۋى بەكەر ەمەس. سەبەبى، ادام قۇلشىلىق جاساعان سايىن، ءناپسىسى كەلىپ: «سەن ەلدەن ارتىق بويۇسىندىڭ، سەن ەلدەن ارتىق عيبادات جاسادىڭ»، -  دەپ، ادامدى ريا جاساۋعا، ماقتانۋعا اپارىپ، امالىن قۇردىمعا جىبەرەدى.

سوندىقتان، اللانىڭ قۇلى عيبادات جاساعان سايىن ساق بولعانى ابزال، ياعني قۇلشىلىعىن ءبىر اللانىڭ ريزالىعى ءۇشىن جاساۋعا ءمان بەرۋ كەرەك».

ءبىر كۇنى ءبىر ادام دۇنيەسىن قايدا جاسىرعانىن ۇمىتىپ، سونىڭ شەشىمىن ءابۋ حانيفادان سۇراعان ەكەن. الگى كىسىنىڭ ماسەلەسى فيقھ ماسەلەسى ەمەس بولسا دا، يمام: «قۇپتان نامازىڭنان سوڭ تاڭعا دەيىن تىلەك ناماز وقى!»، -  دەيدى. الگى ادام نامازدا تۇرىپ، جوعالعان زاتىن ويلاي باستايدى. كوپ وتپەي جاتىپ، ەسىنە تۇسەدى. دەرەۋ نامازىن ءۇزىپ، جوعالعانىن ىزدەۋگە بارىپ، تاۋىپ العان ەكەن.

وسى وقيعانى يمامعا ايتقاندا، ءابۋ حانيفا: «شايتان قۇلدىڭ جوعالعانىن تاۋىپ بەرسە دە، اللاعا تاڭ اتقانشا قۇلشىلىق ەتكەنىن قالامايدى»، - دەپتى. ياعني، شايتان قۇلدىڭ عيبادات ەسىگىنەن كەلىپ ازعىرۋ جاساعان.

اللا بىزگە عيبادات ەسىگىنەن ساق بولعان قۇلدارىنان بولۋدى ءناسىپ ەتسىن!

 

muslim.kz