اينۇر تۇرسىنبايەۆانىڭ قىزى قاققان جىگىت: ول ءادىل جازاسىن السىن
«ەڭ باستىسى، مەن ادىلدىكتى قالايمىن. ول ءوزىنىڭ ارەكەتى ءۇشىن جاۋاپ بەرسىن. ادامدار وزدەرىنىڭ قانداي دەڭگەيدە كىنالى ەكەنىن ءتۇسىنۋى ءتيىس. ولار كۇندە كەلىپ، كەشىرىم سۇراعان جوق. ارينە، مەنىڭ تۋىستارىم ولاردى كەشىرەتىن ەدى، مۇمكىن، سول اۋرۋحانادا- اق مامىلەگە كەلۋگە بولار ما ەدى. ولار مەنىڭ جول اپاتىنا دەيىن دەنى ساۋ ادام بولعانىمدى، العان جاراقاتتار زاردابىن ءومىر بويى كورەتىنىمدى تۇسىنۋلەرى كەرەك ەدى. مەن ودان تەك ماتەريالدىق جانە مورالدىق شىعىنىمدى وتەپ بەرۋىن عانا قالايمىن - ماعان بۇدان باسقا ەشتەڭەنىڭ كەرەگى جوق. مەن وعان جاماندىق تىلەمەيمىن، بوستاندىعىنان دا ايىرعىم كەلمەيدى. تەك ادامنىڭ ءوز كىناسىن مويىنداپ، ايىبىن وتەسە دەگەن ويدى جەتكىزگىم كەلىپ تۇر»، - دەدى مەيىرجان قاسىمعاليەۆ.
دەگەنمەن، ول وعان كەلگەن شىعىننىڭ كولەمىن ايتۋعا قينالدى. سونىمەن قاتار، ول ايىپتالىپ وتىرعان ايدانا كوپبوسىنوۆا ۇسىنعان بەس مىڭ دوللار وبەكتيۆتى قاراجات ەمەس دەپ ەسەپتەيدى.
«بىزدە چەكتەر بار، ءبىراق ءبارى بىردەي ساقتالعان جوق. مەن العان جاراقاتتار جازىلعان انىقتاما بار. ءبىر جارىم ميلليون دەگەن كوپ اقشا ەمەس، ونى مەن ءوزىم دە تابا الامىن. شىندىعى كەرەك، بۇل جەتكىلىكسىز سوما. ءوز دەنساۋلىعىمدى بەس مىڭ دوللارعا باعالامايمىن. مەن ەرتەڭگى كۇنىمدى ويلايمىن - وسىنىڭ سالدارى قانداي بولماق، الىنعان جاراقاتتار دەنساۋلىعىما قالاي اسەر ەتەدى، 20 جىلدان كەيىن اياق- قولىم قانداي حالدە بولادى؟ ولاردىڭ ۇسىنعان اقشالارىن مەن مورالدىق نەمەسە ماتەريالدىق كومەك رەتىندە قابىلداي المايمىن. مەنىڭشە، بۇل سومانى ەكى- ءۇش ەسە ۇلعايتىپ 20-30 مىڭ دوللارعا دەيىن كوتەرۋ قاجەت. اتا- انام وسى سومانى الدەن- اق بەلگىلەگەن بولاتىن، ونى مەن ورىندى دەپ سانايمىن»، - دەدى ول.
جاس جىگىتتىڭ ايتۋىنشا، جول اپاتىنا كىنالى قىز ونىڭ احۋالىن ءبىلىپ، اۋرۋحاناعا كەلسە، وتباسىنا مورالدىق جانە پسيحولوگيالىق كومەك كورسەتسە، جاعداي مۇلدەم باسقاشا بولار ەدى.
«ونىڭ تۋىستارى اتا- انامنىڭ الدىنان مەن رەانيماتسيادا جاتقاندا، اپاتتان كەيىن ءۇشىنشى كۇنى وتكەنىن ەستىدىم. ايدانانىڭ كەلىپ، اتا- انامنان كەشىرىم سۇراپ، كىنالى ەكەنىن مويىنداعانىن دا ەسىتتىم. مەنىڭ ايتپاعىم - وسى جاعدايدى ۋشىقتىرعان باستى ءجايت تۋرالى. ولار اۋرۋحاناعا كەلگەندە، انام ولاردى تىڭداعىسى كەلمەي، قۋىپ جىبەرگەن. ولاردىڭ تەك ءۇشىنشى كۇن وتكەننەن كەيىن عانا كەلگەندىگىنەن. مەنى اۋرۋحاناعا «جەدەل جاردەممەن» ءىستىڭ ءمان- جايىن كورگەن كۋاگەر، بوتەن ادام جەتكىزدى. ايدانا قاسىمدا بولعان جوق، اتا- اناما بالالارىنىڭ جول اپاتىنا ۇشىراعانى تۋرالى حابار جەتكىزبەگەن. اتا- انام مەنىڭ رەانيماتسياعا تۇسكەنىم تۋرالى تەك ءبىر تاۋلىكتەن كەيىن بىلگەن ەكەن. ولارعا حابار جەتكىزگەن مەنىڭ ارىپتەستەرىم. ال اكە- شەشەم مەنى جۇمىستا ءجۇر دەپ ويلاعان. تەلەفونىم ءوشىرۋلى بولدى»، - دەپ باياندادى م. قاسىمعاليەۆ.
مەيىرجان قاسىمعاليەۆتىڭ مالىمدەۋىنشە، ونىڭ اۋرۋحانادان شىققانىنا ەكى كۇن بولدى. الدا ۇزاق ۋاقىت سوزىلاتىن قالپىنا كەلۋ پروتسەسسى كۇتىپ تۇر. «تاياۋدا اۋرۋحانادان شىقتىم. سوققىنىڭ كۇشتىلىگىنەن كوز ۇستىندەگى سۇيەك ىشكە مايىسقان، ەندى ويىق بولىپ قالماق. قولىم گيپسكە سالىنعان - جارقىنشاقتى سىنىق. يىعىما ءبىر جىلدان كەيىن عانا الىناتىن پلاستينا سالىندى. جامباس سۇيەگىم دە زاقىمداندى - دارىگەرلەردىڭ ايتۋىنشا، قالپىما كەلۋگە ۇزاق ۋاقىت كەتەدى. اپات بولعان ساتتەن بەرى 52 كۇن ءوتتى. اۋرۋحانادا 50 كۇن جاتتىم»، - دەدى ول.
ەستەرىڭىزگە سالايىق، 10 قىركۇيەكتە مەيىرجان قاسىمعاليەۆتىڭ تۋىستارى 30 -تامىز كۇنى استانادا «بايتەرەك» مونۋمەنتىنىڭ جانىنداعى نۇرجول بۋلۆارىنداعى جاياۋ وتپە جولىندا ورىن العان جول- كولىك وقيعاسىنىڭ كۋاگەرلەرىن ىزدەستىرە باستادى. 18 جاسار ايدانا كوپبوسىنوۆا Land Rover Discovery 4 اۆتوكولىگىن جۇرگىزىپ كەلە جاتىپ، 28 جاستاعى جىگىتتى قاعىپ وتكەن. دارىگەرلەردىڭ مالىمدەۋىنشە، كوپتەگەن جاراقات العان جىگىت اۋىر حالدە اۋرۋحاناعا جەتكىزىلىپ، رەانيماتسيا بولىمىندە 3 كۇن جاتقان. وقيعا جونىندە ەكى جاق تا ءوز پىكىرلەرىن بىلدىرگەن. جىگىتتىڭ اپكەسى بەلگىسىز الاياقتاردىڭ وقيعا تۇسىرىلگەن ۆيدەوجازبانى ساتۋعا تالپىنعاندىعى تۋرالى مالىمدەگەن.
