قازاقستان تۋرالى تاڭعاجايىپ كەسكىن جەلى قولدانۋشىلارىن ەلىكتىردى

استانا. قازاقپارات - يتالياندىق بلوگەر ءوزىنىڭ قازاقستانعا ساياحاتى جايىندا ۆيدەو ءتۇسىرىپ، قايتالانباس ءارى ەرەكشە بولىپ كەلەتىن ەلىمىزدىڭ تابيعاتى تۋرالى اڭگىمەلەدى.

تانىمال يتالياندىق بلوگەر سارا يتستسي مەن ۆيدەو-وپەراتور تيمۋر تۋگاليەۆپەن بىرگە ك4- فورماتىندا قازاقستان تۋرالى تاڭعاجايىپ ۆيدەوروليك ءتۇسىردى. سارا يتستسي (Sara Izzi) ءارتۇرلى ەلدەرگە ساياحاتى جايىندا جازبالاردى ءوزىنىڭ The Lost Avocado («جوعالعان اۆوكادو») دەپ اتالاتىن بلوگىندا جاريالايدى، دەپ حابارلادى Sputnik.

ۆيدەوجازبا اتاۋىن قويار كەزدە «اۆوكادو» ءسوزىنىڭ ورنىنا مەملەكەتتىڭ نەمەسە قالانىڭ اتاۋى جازىلادى: Lost in Buenos Aires («بۋەنوس- ايرەستا جوعالعان»)، Lost in Kyrgyzstan جانە ت. ب. ءدال وسىلاي Lost in Kazakhstan ۆيدەوجازباسى دۇنيەگە كەلدى.

ۆيدەو 2016-جىلدىڭ قىركۇيەگىندە 4K- فورماتىندا Sony A7S 4 كامەراسىنىڭ جانە DJI Phantom كومەگىمەن تۇسىرىلگەن (وتە جوعارى انىقتىلىق).

«قازاقستان شەكسىز تاۋ جوتالارىمەن، تۇزدى كولدەرى مەن جاپان دالاسىمەن تانىمال ەل. سوڭعى ونجىلدىقتار بويى الماتى الەمنىڭ ەڭ كەرەمەت دەگەن استانالارىمەن سالىستىرىلۋدا. بۇگىندە بۇل قالا سۋپەر-زاماناۋي مەگاپوليسكە اينالعان. مۇندا تاڭعاجايىپ دۇنيەلەر قالىپتى كورىنەدى»، - دەپ پىكىر ءبولىستى بلوگەر.

ودان بولەك ساياحاتتاۋشى استانانىڭ 1997-جىلدان بەرى قازاقستاننىڭ ەلورداسى اتانعانىن، ال بۇگىندە الەمنىڭ ەڭ ادەمى قالالارىمەن تەرەزەسى تەڭەسكەن كوسموپوليتتىك قالاعا اينالعانىن ايتىپ ءوتتى.

«بۇرىن-سوڭدى ەشكىم بىلمەگەن بۇل قالا بۇگىندەرى بيىك-بيىك عيماراتتارى مەن قىمبات قوناق ۇيلەرىمەن جارقىراپ تۇر. 2017-جىلى بۇل قالادا بۇكىل الەمنەن كەلگەن 3 ميلليون تۋريست پەن ساراپشىلاردىڭ باسىن قوساتىن «ەكسپو-2017» كورمەسى وتەدى»، - دەيدى سارا يتستسي.

«استانا قازاقستاننىڭ ساياسي ەلورداسى بولسا، الماتى ءالى كۇنگە دەيىن بۇل ەلدىڭ مادەني ءارى قارجىلىق ورتالىعى بولىپ سانالادى. اسەم قالا كۇن ساناپ دامىپ كەلەدى. سونىڭ ارقاسىندا مادەني جانە كوركەمدىك تۇرعىدان العاندا ورتالىق ازياداعى ەڭ سەرپىندى قالا اتاعىن ەشكىمگە بەرگەن ەمەس»، - دەپ جالعادى ءسوزىن ول.

بۇدان وزگە، سارا الماتىنى ورتالىق ازيانىڭ «ۇلكەن الماسى» (Big Apple) سانالاتىنىن اتاپ ءوتتى. الماتىنىڭ الما جەمىسىنىڭ وتانى بولىپ تابىلاتىنى ەشكىمگە دە جاسىرىن ەمەس.

«مەن قازىناعا تولى قالا تاپتىم: جاڭا پىسكەن ءجۇزىم، اعاشتان جاسالعان عيباداتحانالار جانە تۇرعىن-ۇيلەر مەن ءزاۋلىم ساۋدا ۇيلەرىنىڭ اراسىندا ورنالاسقان ساياباقتار. ايناداي جارقىراعان ءزاۋلىم ۇيلەر مەن بەس جۇلدىزدى قوناق ۇيلەر ىلە الاتاۋىنىڭ فونىندا اسەمدەنە تۇسكەندەي. جاڭا دۋباي. ورتالىق ازيانىڭ دۋبايى»، - دەپ وي ءبولىستى ساياحاتتاۋشى.

سارا يتستسي - يتالياندىق جازۋشى-ساياحاتتاۋشى، فيلولوگيا جانە ادەبيەتتانۋ سالاسىنىڭ مامانى، بلوگەر ءارى ساياحاتتاۋدى جانى سۇيەتىن جان. بۇعان دەيىن ستوكگولم مەن نيۋ-يوركتە تۇرعان، كەيىننەن ءۇش جىلعا ۇلى بريتانياعا كوشىپ بارعان. Skyscanner- دە (قولدانۋشىلارعا اۆيارەيستەر تۋرالى اقپارات ىزدەۋگە مۇمكىندىك بەرەتىن اقپاراتتى ۆەب- ىزدەۋ جۇيەسى) كونتەنت-مەنەدجەر قىزمەتىن اتقارادى.

تيمۋر تۋگاليەۆ - قازاقستاندا دۇنيەگە كەلگەن رەجيسسەر-ساياحاتتاۋشى. ارگەنتينادا تۋىپ-وسكەن، گلازگوداعى ايتۋلى ونەر مەكتەبىن ءتامامداعان. ول دا Skyscanner توبىنىڭ مۇشەسى بولىپ تابىلادى.