قورعانىس مينيسترلىگى مەن باس شتابتىڭ قۇزىرەتتەرى كەڭەيتىلەدى

استانا. قازاقپارات - بۇگىن پارلامەنت ءماجىلىسىنىڭ جالپى وتىرىسىندا ق ر قورعانىس ءمينيسترى ساكەن جاسۇزاقوۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قورعانىس جانە اسكەري قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىردى، دەپ حابارلايدى قازاقپارات.

«ەگەر دە قولدانىستاعى زاڭدا قورعانىس مينيسترلىگى مەن باس شتابتا بۇگىندە، سايكەسىنشە 27 جانە 17 وكىلەتتىك بار، ال وسى زاڭ جوباسىندا ءبىز 51 جانە 35 وكىلەتتىكتى قاراستىرىپ وتىرمىز. قوسىمشا قىزمەتتەر بۇگىندە ۇسىنىلىپ وتىرعان توپتارعا سايكەس كەلىپ وتىر. مىسالى، قورعانىس مينيسترلىگى فۋنكسيالارىنا اسكەري قاۋىپسىزدىك سالاسىندا اقپاراتتىق كەڭىستىكتىڭ مونيتورينگىسىن جانە ءوزىنىڭ قۇزىرەتى شەگىندە قاۋىپ- قاتەر كوزدەرىنە قارسى ءىس- قيمىلدى ەنگىزىپ وتىرمىز»، - دەدى مينيستر.

 ونىڭ سوزىنە قاراعاندا، زاڭ جوباسىندا قارۋلى كۇشتەردە ەكولوگيالىق قاۋىپسىزدىكتى قامتاماسىز ەتۋ بويىنشا قورعانىس مينيسترلىگىنىڭ ەرەجەلەردى بەكىتۋى قاراستىرىلعان. بۇرىندارى بۇل قىزمەت ۆەدومستۆو فۋنكسيالارىندا بولماعان ەدى.

 جاسۇزاقوۆتىڭ ايتۋىنشا، زاڭناما «جاۋىنگەرلىك قابىلەتتىلىك»، «ارنايى وپەراتسيالار»، «وڭىرلىك اسكەرلەر»، «قورعانىس زەرتتەۋلەرى» سەكىلدى جاڭا ۇعىمدارىمەن تولىقتىرىلدى.

 زاڭ جوباسىنىڭ نەگىزگى ماقساتى قورعانىس جانە اسكەري قىزمەت سالاسىنداعى قوعامدىق قاتىناستاردى رەتتەۋگە نەگىزدەلگەن. «قازاقستان رەسپۋبليكاسىنىڭ قورعانىسى جانە قارۋلى كۇشتەرى تۋرالى»، «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» ق ر زاڭدارىنا قورعانىس مينيسترلىگى مەن باس شتابتىڭ قۇزىرەتتەرىن كەڭەيتۋگە، اسكەري قىزمەت وتكەرۋ تەتىگىن جانە اۋماقتىق قورعانىستى ۇيىمداستىرۋ ءتارتىبىن جەتىلدىرۋگە باعىتتالعان وزگەرىستەر مەن تولىقتىرۋلار ەنگىزىلىپ وتىر.

پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قورعانىس جانە اسكەري قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا ماقۇلدادى.

اۆتور: رۋسلان عابباسوۆ