الەمدەگى ەڭ جومارت جاندار قاي ەلدە تۇرادى؟
ۇيىم ازىرلەگەن World Giving Index 2016 رەيتينگىنە سايكەس، بەيتانىس جاندارعا ەڭ كوپ راقىمشىلدىق تانىتاتىن جاندار يراكتا تۇراتىن بولىپ شىقتى. ال قايىرىمدىلىقپەن ەڭ كوپ اينالىساتىن ەل - ميانما.
سوڭعى ءبىر ايدىڭ ىشىندە ۇيىم جۇرگىزگەن ساۋالناماعا سايكەس، يراكتا ءاربىر 10 ازاماتتىڭ 8 ءى بەيتانىس جاندارعا كومەك كورسەتكەن. ءدال وسىنداي كورسەتكىشتى لاتۆيا ەلى كورسەتىپ وتىر. سوعان قاراماستان، اتالعان ەلدەر ەڭ جومارت ەلدەردىڭ ۇزدىك وندىعىنا كىرە المادى. سەبەبى مۇندا قايىرىمدىلىق اسا كەڭىنەن تارالماعان.
بۇل ورايدا حالىقتى قايىرىمدىلىققا ۇندەيتىن ميانما كوش باستاپ تۇر. ساۋالناماعا قاتىسقان تۇرعىنداردىڭ %91 قايىرىمدىلىق مەكەمەلەرىنە اقشا اۋدارىپ تۇراتىن بولىپ شىقتى. ودان بولەك، زەرتتەۋگە قاتىسقان ميانما تۇرعىندارىنىڭ %63 بەيتانىس جاندارعا كومەكتەسەدى ەكەن.
اتالمىش ەكى كورسەتكىش ميانمانىڭ ءدال وسى رەيتينگتە ءۇشىنشى جىل قاتارىنان كوش باستاپ تۇرۋىنا سەپ بولىپ وتىر. ەكىنشى ورىندا - ا ق ش مەملەكەتى. مۇندا زەرتتەۋگە قاتىسقانداردىڭ %73 وزدەرى تانىمايتىن ادامدارعا كومەكتەسسە، %63 قايىرىمدىلىق قورلارىنا قاراجات اۋداراتىن بولىپ شىقتى.
زەرتتەۋ اۆتورلارىنىڭ پايمداۋىنشا، ميانمانىڭ العاشقى ورىننان تۇسپەۋى باعزى زامانداردان قالىپتاسقان داستۇرلەرمەن بايلانىستى. وعان سايكەس، حالىقتىڭ كوپ بولىگىن قۇرايتىن جەرگىلىكتى بۋدديستەر موناحتارعا قول ۇشىن بەرەدى.
زەرتتەۋ ناتيجەلەرى بريتاندىقتاردىڭ ەۋروپاداعى، كەنيالىقتاردىڭ افريكاداعى، گۆاتەمالدىقتاردىڭ لاتىن امەريكاسىنداعى، ال بىرىككەن اراب امىرلىكتەرىنىڭ تاياۋ شىعىستاعى ەڭ جومارت حالىق ەكەنىن دالەلدەدى. ەڭ جومارت حالىقتاردىڭ ءتىزىمىن قىتايلىقتار اياقتاپ تۇر.
كورشىلەس وزبەكستان مەن تۇرىكمەنستان ەلدەرى العاشقى 20 ەلدىڭ قاتارىنا كىرسە، قازاقستان 96-شى، ال رەسەي 126-ورىنعا جايعاستى.
زەرتتەۋ اۆتورلارى بۇل رەيتينگتىڭ سالىستىرمالى تۇردە الىنعاندىعىن العا تارتۋدا. سەبەبى زەرتتەۋگە رەيتينگتە كورسەتىلگەن 140 ەلدەن شامامەن مىڭعا جۋىق ادام عانا قاتىسقان.
Stan.kz
