جەر بەتىندەگى اتموسفەرانىڭ لاستانۋى رەكوردتى دەڭگەيگە جەتتى
ايتۋلارىنشا، جەر بەتىندەگى كومىرقىشقىل گازىنىڭ ەندى قايتا ازايۋى ەكىتالاي. ونىڭ ۇستىنە اۋا قۇرامىندا مەتان مەن ازوت وكسيدىنىڭ ۇلەسى دە ارتقان. جەر بەتىنىڭ اتموسفەراسى باقىلانعالى بەرى ونىڭ قۇرامىنداعى كومىرقىشقىل گاز العاش رەت 400 پروميللەگە جەتتى.
دۇنيەجۇزىلىك مەتەورولوگيالىق ۇيىم مالىمەتتەرى بويىنشا مۇنداي لاستانۋ بۇعان دەيىن الەمنىڭ ءار تۇپكىرىندە بەلگىلى ءبىر ۋاقىتتا عانا بايقالعان. الايدا وسى جولى كومىرقىشقىل گازى بۇكىل جەر بەتىن جايلادى. پەتتەري تاالاس، دۇنيەجۇزىلىك مەتەورولوگيالىق ۇيىمنىڭ باس حاتشىسى - اۋا قۇرامىنداعى كومىرقىشقىل گازدىڭ مۇنشالىقتى جوعارى كورسەتكىشى سوڭعى 800 مىڭ جىلدا العاش رەت 2015 -جىلى تىركەلدى. اسىرەسە، ونىڭ اۋادا كوبەيۋى سوڭعى ەلۋ جىلدا وتە جىلدامداعان. ويتكەنى وسى كەزەڭدەردە پايدالى قازبالاردىڭ ءوندىرىسى ارتقان. اتموسفەرانىڭ مۇنشالىقتى لاستانعانى گاۆاي ارالدارىنداعى اۋا قۇرامىن زەرتتەۋ ستانتسياسىندا انىقتالدى. «ەندى اۋانىڭ قايتادان قالىپتى دەڭگەيگە ءتۇسۋى ءۇشىن بىرنەشە بۋىن جاڭارادى»، - دەيدى ماماندار.
دەگەنمەن الەمدى تابيعاتتى قورعاۋ جولىندا ناقتى قادامدار جاساۋعا شاقىردى.
پەتتەري تاالاس، دۇنيەجۇزىلىك مەتەورولوگيالىق ۇيىمنىڭ باس حاتشىسى:
- الەم ەلدەرى وسى كۇنگە دەيىن جاھاندىق جىلىنۋدى توقتاتۋ ءۇشىن بارلىق مۇمكىندىكتەرىن تولىق پايدالانعان جوق. ەگەر اۋاعا بولىنەتىن كومىرقىشقىل گازدى ازايتپاساق، تەمپەراتۋرانىڭ جوعارىلاۋىن دا توقتاتا المايمىز. سوندىقتان جاھاندىق جىلىنۋعا قاتىستى پاريج كەلىسىمىنىڭ شىن مانىندە جۇزەگە اسۋىنا ءمان بەرۋىمىز كەرەك. عالىمداردىڭ ويىنشا اتموسفەرادا كومىرتەك ديوكسيدتەرىنىڭ ارتۋىنا ەل- نينو قۇبىلىسى دا اسەرى بولۋى مۇمكىن. بۇل تىنىق مۇحيتىندا پايدا بولاتىن جىلى اۋا اعىسى. وسىنىڭ كەسىرىنەن ازيانىڭ وڭتۇستىك- شىعىس بولىكتەرىندە جاۋىن- شاشىن ازايىپ، اۆستراليا مەن فيليپپين، ەكۆادوردا قۇرعاقشىلىق بولعان. ءتىپتى يندونەزيادا كۇشتى دالا ءورتى تىركەلدى. تابيعي فەنومەن سالدارىنان تروپيكالىق ورمانداردىڭ كومىرقىشقىل گازدى ءسىڭىرۋ قابىلەتى دە تومەندەگەن.
www.24.kz
