ءماجىلىس دەپۋتاتى سەرگەي دياچەنكو ومىردەن وزدى
بۇل تۋرالى بۇگىن ءماجىلىستىڭ جالپى وتىرىسىندا پالاتا ءتوراعاسى نۇرلان نىعماتۋلين ءمالىم ەتتى، دەپ حابارلايدى قازاقپارات ءتىلشىسى.
«ۇزاققا سوزىلعان اۋىر سىرقاتىنان كەيىن ءبىر ساعات بۇرىن ءبىزدىڭ ارىپتەسىمىز، كورنەكتى قوعام قايراتكەرى سەرگەي دياچەنكو ومىردەن وزدى. ول ءوزىنىڭ كۇش-جىگەرىن، ءبىلىمىن، تاجىريبەسىن ءبىزدىڭ ەلىمىزدىڭ يگىلىگىنە باعىتتادى. سەرگەي الەكساندروۆيچتىڭ تۋىسقاندارىنا، جاقىندارىنا قايعىرىپ كوڭىل ايتامىز. ول قازاقستاننىڭ ناعىز پاتريوتى، ءبىزدىڭ دوسىمىز ءارى ارىپتەسىمىز تۋرالى ەستەلىك ءارقاشاندا ءبىزدىڭ جۇرەگىمىزدە ساقتالادى»، - دەدى ن. نىعماتۋلين.
جالپى وتىرىس الدىندا دەپۋتاتتار سەرگەي دياچەنكونى ءبىر مينۋت ۇنسىزدىكپەن ەسكە الدى.
دياچەنكو سەرگەي الەكساندروۆيچ ەكونوميكالىق رەفورما جانە وڭىرلىك دامۋ كوميتەتىنىڭ مۇشەسى قازاقستان رەسپۋبليكاسى اقمولا وبلىسىنىڭ شورتاندى ەلدى مەكەنىندە 1952-جىلى 18- قىركۇيەكتە دۇنيەگە كەلدى.
1973-جىلى كۋيبىشيەۆ جوسپارلاۋ يستيتۋتىنىڭ ونەركاسىپ-ەكونوميكا فاكۋلتەتىن ەكونوميست ماماندىعى بويىنشا ءبىتىردى. ساياسي ءبىلىمى بار (الماتى جوعارى پارتيا مەكتەبى). ساياسي عىلىمىنىڭ دوكتورى. دوكتورلىق ديسسەرتاتسياسىنىڭ تاقىرىبى - «قازاقستانداعى دەموكراتيالىق جاڭعىرتۋ ماسەلەلەرى (ساياسي تالداۋ)».
قازاقستان رەسپۋبليكاسى ساياسي عىلىم اكادەمياسىنىڭ كوررەسپوندەنت-مۇشەسى. جۇزدەن استام عىلىمي جۇمىستاردىڭ، كىتاپتاردىڭ، وقۋلىقتار مەن ادىستەمەلىك قۇرالداردىڭ اۆتورى. ەڭبەك جولىن 1973-جىلى پەنزا وبلىسى كۋزنەتسك قالاسىنداعى اسپاپتىق جابدىقتاۋ جانە كوندەنساتورلار زاۋىتىندا ينجەنەر-ەكونوميست بولىپ باستادى.
1973-جىلى ك س ر و قارۋلى كۇشتەرى قاتارىنا اسكەري قىزمەتكە شاقىرىلدى. اسكەري قىزمەتىن رەسەي فەدەراتسياسىنىڭ پريمورە ولكەسىندەگى قىزىل تۋلى قيىر شىعىس اسكەري وكرۋگىندە اتقاردى. اسكەري قىزمەتتەن سوڭ تۋعان ەلى قازاقستانعا قايتا ورالادى. قازاقستان رەسپۋبليكاسى قارۋلى كۇشتەرىنىڭ زاپاستاعى پولكوۆنيگى بولدى. ون جىل كولەمىندە شورتاندى اۋداندىق كوميتەتىنىڭ نۇسقاۋشىسى قىزمەتىنەن قازاقستان كومسومولى ورتالىق كوميتەتىنىڭ ەكىنشى حاتشىسىنا دەيىنگى ەڭبەك جولىنان ءوتتى.
1985-1991-جىلدارى ارالىعىندا - قازاقستان كومپارتياسى كوكشەتاۋ قالالىق كوميتەتىنىڭ ءبىرىنشى حاتشىسى جانە سونىمەن قاتار (1990-جىلدان باستاپ) حالىق دەپۋتاتتارى كوكشەتاۋ قالالىق كەڭەسىنىڭ ءتوراعاسى بولدى.
1991-1993-جىلدارى قازاق ك س ر جاستار ءىسى، دەنە تاربيەسى جانە سپورت جونىندەگى مەملەكەتتىك كوميتەتى ءتوراعاسىنىڭ ورىنباسارى، قازاقستان رەسپۋبليكاسى تۋريزم، دەنە تاربيەسى جانە سپورت ءمينيسترىنىڭ ورىنباسارى بولدى.
1993-1999-جىلدار ارالىعىندا قوعامدىق ۇيىمداردا جۇمىس ىستەدى. 1999 جانە 2005-جىلداردا وتكەن مەملەكەت باسشىسىن سايلاۋ ناۋقاندارىندا الماتى قالاسى بويىنشا ن. ءا. نازاربايەۆتىڭ سەنىمدى وكىلى بولدى.
1999-2004-جىلدار ارالىعىندا - ەكىنشى سايلانعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتى. 2004-2007-جىلدار ارالىعىندا - ءۇشىنشى سايلانعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتى. 2004-جىلدىڭ قاراشا ايىنان باستاپ - قازاقستان رەسپۋبليكاسى پارلامەنتى ءماجىلىسى ءتوراعاسىنىڭ ورىنباسارى بولدى. 2006-جىلدان 2009-جىلعا دەيىن قازاقستان حالىقتارى اسسامبلەياسى ءتوراعاسىنىڭ ورىنباسارى بولىپ سايلاندى. 2007-2009-جىلدار ارالىعىندا - ءتورتىنشى سايلانعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتى. 2007-جىلدىڭ قىركۇيەك ايىنان باستاپ - قازاقستان رەسپۋبليكاسى پارلامەنتى ءماجىلىسى ءتوراعاسىنىڭ ورىنباسارى. 2010 -جىلدىڭ ناۋرىز ايىنان باستاپ قازاقستان رەسپۋبليكاسى پرەزيدەنتىنىڭ جارلىعىمەن اقمولا وبلىسىنىڭ اكىمى لاۋازىمىنا تاعايىندالدى. 2012-جىلدىڭ قاڭتار ايى - 2016-جىلعى ناۋرىز ايى ارالىعىندا بەسىنشى سايلانعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، قازاقستان رەسپۋبليكاسى پارلامەنتى ءماجىلىسى ءتوراعاسىنىڭ ورىنباسارى بولدى.
2016-جىلدىڭ ناۋرىز ايىنان باستاپ - التىنشى سايلانعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتى بولدى.
«نۇر وتان» حالىقتىق دەموكراتيالىق پارتياسى ساياسي كەڭەسىنىڭ مۇشەسى. «قۇرمەت بەلگىسى»، «پاراسات»، I دارەجىلى «دوستىق» وردەندەرىمەن، ت م د- نىڭ «دوستاستىق» وردەنىمەن، سەگىز مەدالمەن، قازاق ك س ر جوعارى كەڭەسىنىڭ قۇرمەت گراموتاسىمەن ماراپاتتالعان.
ارتىندا جارى، ءۇش بالاسى مەن ءۇش نەمەرەسى قالدى.
اۆتور: رۋسلان عابباسوۆ
