قازاقستان ساۋد ارابياسىنىڭ مۇناي مەن گازدى تەرەڭ وڭدەۋگە قاتىستى تاجىريبەسىنە قىزىعۋشىلىق تانىتتى
بۇل تۋرالى ق ر پرەزيدەنتى نۇرسۇلتان نازاربايەۆ ساۋد ارابياسى كورولدىگىنە رەسمي ساپارىنىڭ قورىتىندىسى بويىنشا جۋرناليستەرگە بەرگەن سۇحباتى بارىسىندا ءمالىم ەتتى، دەپ حابارلايدى قازاقپارات ءتىلشىسى.
«بۇل مەملەكەتتىڭ مۇناي-گاز سالاسىندا مول تاجىريبەگە يە ەكەندىگى داۋسىز. سوندىقتان بىزگە مۇناي مەن گازدى تەرەڭ وڭدەۋ، پوليەتيلەن مەن ەتيلەن ءوندىرۋ جايىن ويلاۋىمىز قاجەت»، - دەدى نۇرسۇلتان نازاربايەۆ.
سونىمەن قاتار، كەلىسسوزدەر بارىسىندا مۇناي باعاسىنىڭ ماسەلەسى دە كوتەرىلدى. «ارينە، ءبىز بۇل مەملەكەتتىڭ قازىر بارلىق سەرىكتەستەرىمەن بىرگە جۇرگىزەتىن ساياساتىنا قاتىستى مۇناي مەن گاز باعاسىن تالقىلادىق. مەن وسى ماسەلەدەگى رەسەيلىكتەردىڭ ۇستانىمىن بىلەمىن. ولاردىڭ بۇل جايىندا يرانمەن قارىم-قاتىناستارى كۇردەلى ەكەنى بەلگىلى. وسى تۇرعىدا ءبىزدىڭ مامىلەگەرلىك ەتۋىمىز وزىندىك وڭ رول اتقارۋى دا مۇمكىن»، - دەپ اتاپ ءوتتى نۇرسۇلتان نازاربايەۆ.
