مۇحامەدي ۇلى: جانىبەكوۆ اراداعى «جىگىتتىك كەلىسىمدى» ورىنداي المادى
«مەنىڭ جەكە باسىما كۇيە جاققاننان كەيىن، مەن جالا جابۋ بابى بويىنشا تالعات جانىبەكوۆتى ازاماتتىق سوتقا بەردىم. سوتقا دەيىنگى تەرگەۋ اياسىندا، بەتپە- بەت كەزدەسۋ كەزىندە جانىبەكوۆ ءوز سوزدەرىنىڭ وتىرىك ەكەنىن مويىندادى. مەنىڭ، بولماسا مەنىڭ قول استىمداعى ازاماتتاردىڭ تىكەلەي نەمەسە دەلدال ارقىلى 100 مىڭ دوللار سۇراتقانىن جوققا شىعارىپ، ونداي وقيعا ەشقاشان بولعان جوق دەدى. ول سونداي-اق قولىندا ەشقانداي دالەل جوقتىعىن ايتتى»، - دەيدى مينيستر.
«ونىڭ مۇددەسىن قورعاعاندار جانىبەكوۆ ماعان كۇيە جاققانىن مويىنداپ، قوعام الدىندا كەشىرىم سۇرايدى دەپ ايتقان. سودان كەيىن، مەن ءوزىمنىڭ ارىزىمدى الىپ كەتكەن ەدىم. ءبىراق، وكىنىشكە قاراي، ول ارامىزداعى «جىگىتتىك كەلىسىمدى» ورىنداعان جوق. ونىمەن قويماي، قوعام اراسىندا مەن تۋرالى تەرىس پىكىر قالىپتاسۋىنا ات سالىستى. سودان كەيىن مەن قىلمىستىق ىستەر جونىندەگى سوتقا ارىز ءتۇسىرىپ، ونى تۇزەتۋ جۇمىستارىنا جەگۋدى تالاپ ەتتىم. الايدا، جانىبەكوۆ سوت وتىرىستارىنا مۇلدە كەلگەن جوق. بۇگىن ايتەۋىر سوت وتىرىسى ءبىتتى عوي. مەن تالعات جانىبەكوۆكە 50 ا ە ك كولەمىندە ايىپپۇل سالعان سوت شەشىمىنە تولىق قاناعاتتانامىن. تاعى دا قايتالاپ ايتامىن، مەن جانىبەكوۆكە وسىنداي جازادان قۇتىلۋ ءۇشىن قولىمنان كەلگەنشە كۇتتىم»، - دەيدى ا. مۇحامەدي ۇلى.
ايتا كەتەيىك، استانا قالاسى سارى ارقا اۋدانىنىڭ سوتى مادەنيەت جانە سپورت ءمينيسترى ارىستانبەك مۇحامەدي ۇلىنىڭ ار- نامىسىنا كۇيە جاقتى دەپ، رەجيسسەر تالعات
جانىبەكوۆكە 1600000 تەڭگە ايىپپۇل سالدى (500 ايلىق ەسەپتىك كورسەتكىش).
اۆتور: كەنجەكەي توقتامۇرات قىزى
