شىمكەنتتە قازاق كۇرەسىنەن حالىقارالىق جارىس ءوتتى
جارتى عاسىردان استام ۋاقىتتان بەرى ۇزىلمەي كەلە جاتقان ءداستۇرلى تۋرنيردى ورداباسى اۋدانى اكىمدىگى مەن وبلىستىق دەنەشىنىقتىرۋ جانە سپورت باسقارماسى ۇيىمداستىردى. «قاجىمۇقان» قوعامدىق قورى دا يگى ىستىڭ باسىنان تابىلدى. سايىستىڭ اشىلۋ سالتاناتىندا وبلىس اكىمىنىڭ ورىنباسارى ۇلاسبەك سادىبەكوۆ جانە وزگە دە ازاماتتار داڭقتى بالۋاننىڭ اتى ماڭگى ەستە قالاتىنىن ايتىپ، قاجىمۇقاننىڭ بۇگىنگى ىزباسارلارىنا ساتتىلىك تىلەدى.
تاۋەلسىزدىكتىڭ 25 جىلدىعىنا وراي ۇيىمداستىرىلعان دوداعا ەلىمىزدىڭ بارلىق وبلىستارىمەن قاتار وزبەكستان، قىرعىز رەسپۋبليكاسى، موڭعوليا جانە قىتايدىڭ مىقتى بالۋاندارى دا قاتىستى. سايىستىڭ العاشقى كۇنى بىرنەشە سالماق دارەجەلەرى بويىنشا جۇلدەگەرلەر انىقتالدى. ال، ەكىنشى كۇنى سالماق دارەجەلەرىمەن قاتار تۇيە بالۋاندار سايىسى دا ءوتتى. ناتيجەسىندە 55 كەلىدە ابىلايحان كەۋلىمجاي (جامبىل)، 60 كەلىدە ەلامان حۋانباي (قاراعاندى)، 66 كەلىدە قاسىمحان تولەنباي (الماتى قالاسى)، 74 كەلىدە ايدوس عالىموۆ (قاراعاندى)، 82 كەلىدە ەرسۇلتان مۇزاففاروۆ (و ق و)، 90 كەلىدە ءادىلجان ىستىبايەۆ (و ق و)، 100 كەلىدە اسىل بارمەنوۆ (قاراعاندى) جانە 100 كەلىدەن جوعارى سالماقتا مۋحسين حيسوميددينوۆ (وزبەكستان) جەڭىمپاز اتاندى.
تۇيە بالۋاندار باسەكەسىنە الەمگە تانىمال مىقتىلار قاتىستى. تارتىستى وتكەنى سونشالىق، «قازاقستان بارىسىندا» جانە وزگە دە ىرى دودالاردا ولجا سالىپ جۇرگەن رۋسلان ءابدىرازاقوۆ، اسىل بارمەنوۆ، الدانگەرەل، نۇرسۇلتان مىڭعىشيەۆ، مۇحيت تۇرسىنوۆ، عاني سەيدىلدايەۆ سىندى الىپتار ىرىكتەۋ كەزەڭدەرىندە- اق ءسۇرىندى. فينالدا شىعىسقازاقستاندىق ايبەك نۇعىماروۆ پەن قاراعاندىلىق ەرجان شىنكەيەۆ كۇرەستى. اڭدىسقان قوس مىقتىنىڭ باسەكەسىندە ايبەكتىڭ مەرەيى ۇستەم بولدى. ءسويتىپ، ول قازاق دالاسىنىڭ باتىرى - قاجىمۇقان بالۋاننىڭ قۇرمەتىنە ارنالعان تۋرنيردىڭ «تۇيە بالۋانى» اتانىپ، باس جۇلدەگە تىگىلگەن 1 ميلليون تەڭگەگە يە بولدى. جەڭىمپازعا جۇلدەنى ورداباسى اۋدانىنىڭ اكىمى الماسبەك مامىتبەكوۆ پەن وبلىستىق قازاق كۇرەسى فەدەراتسياسىنىڭ ءتوراعاسى، جارىستى ۇيىمداستىرۋشىلاردىڭ بىرى بولات قىرىقبايەۆ تاپسىردى. ءار سالماق دارەجەسىندەگى جەڭىمپازدار مەن جۇلدەگەرلەر ديپلوم، مەدال جانە قوماقتى اقشالاي سىيلىقپەن ماراپاتتالدى.
