انتالياداعى جارىلىستان زارداپ شەككەندەر اراسىندا قازاقستاندىقتار جوق

استانا. قازاقپارات - بۇگىن تاڭەرتەڭ تۇركيانىڭ انتاليا قالاسىندا بولعان جارىلىستان زارداپ شەككەن قازاقستاندىقتار جوق.

بۇل تۋرالى قازاقپارات تىلشىسىنە ق ر سىرتقى ىستەر مينيسترلىگى باسپا ءسوز قىزمەتىنىڭ جەتەكشىسى ءانۋار جايناقوۆ ءمالىم ەتتى.

«ءدال قازىرگى مالىمەتكە سۇيەنسەك، انتالياداعى جارىلىس كەزىندە زارداپ شەككەندەردىڭ اراسىندا قازاقستان ازاماتتارى جوق. اقپارات جاڭارىپ وتىرادى»، - دەدى ءانۋار جايناقوۆ.

سىرتقى ىستەر مينيسترلىگىنىڭ وكىلى سونداي-اق، انتالياداعى ق ر كونسۋلدىعىندا 460 قازاقستان ازاماتى تۇراقتى جانە ۋاقىتشا تىركەۋدە تۇرعانىن قوسا ايتتى.

ايتا كەتەيىك، بۇگىن تۇركيا ۋاقىتى بويىنشا تاڭعى ساعات 08.50 كەزىندە انتاليا قالاسىنىڭ ساۋدا- ونەركاسىپ پالاتاسىنىڭ اۆتوتۇراعىندا جارىلىس بولدى. جارىلىستان 10 ادام جاراقات العان.

  

اۆتور: كەنجەكەي توقتامۇرات قىزى