پرەمەر- مينيستر اتىراۋ وبلىسىنىڭ اكىمىن وزىمەن سالعىلاسپاۋعا شاقىردى

استانا. قازاقپارات- وتكەن جولعى ۇكىمەت وتىرىسىندا پرەمەر- مينيستر باقىتجان ساعىنتايەۆ اتىراۋ وبلىسىنىڭ اكىمى نۇرلان نوعايەۆقا ەسكەرتۋ جاساعان ەدى. ويتكەنى، مۇنايلى ولكەنىڭ باسشىسى شاعىن جانە ورتا بيزنەستى قولداۋعا ۇكىمەت بولگەن 692 ميلليون تەڭگەنىڭ ءبىر تيىنىن دا الماعان بولىپ شىقتى.

ال بۇگىنگى وتىرىستا پرەمەر- مينيستر اكىمنەن سول جاعدايعا بايلانىستى ەسەپ بەرۋىن سۇرادى، دەپ حابارلايدى Baq.kz.

«باقىتجان ءابدىر ۇلى، بۇل كونكۋرستاردىڭ كەش وتۋىنە بايلانىستى بولىپ وتىر. ءبىز مۇنى جىل سوڭىنا دەيىن شەشەمىز»، - دەدى نوعايەۆ.

ال ۇكىمەت باسشىسى اكىممەن داۋلاسۋعا قۇلىقسىز ەكەنىن ايتىپ، جىل سوڭىندا تاعى دا ەسەپ سۇرايتىنىن ەسكەرتتى.

«نۇرلان اسقار ۇلى، بۇل ماسەلە تۋراسىندا سالعىلاسپاي- اق قويايىق. جىل سوڭىنا دەيىن كۇتەمىز. سول كەزدە ەسەپ بەرەسىز»، - دەپ قىسقا قايىردى باقىتجان ساعىنتايەۆ.


نۇرلان نوعايەۆ