مينيستر: تەلەارنا ءتىلشىسى بولعاندا قازاقستان تاريحى تۋرالى كەڭىنەن مالىمەت بەرەر ەدىم

استانا. قازاقپارات - «Kazakh TV» ەلىمىزدىڭ مادەنيەتى، سالت- ءداستۇرى، ەكونوميكاسى جانە بىرەگەي تابيعاتى تۋرالى تانىمدىق باعدارلامالارعا نەگىزگى ەكپىن قوياتىن بولادى.

 بۇگىن استاناداعى «قازمەديا ورتالىعىندا» ق ر اقپارات جانە كوممۋنيكاتسيالار ءمينيسترى داۋرەن ابايەۆ تىلشىلەرگە بەرگەن سۇحباتىندا ءمالىم ەتتى.

«Kazakh TV» الەمنىڭ 100دەن استام ەلىندە حابار تاراتىپ كەلەدى. بۇل بىرەگەي مۇمكىندىك، ياعني ماقساتتى اۋديتوريا 300 ميلليون ادامعا جۋىق. وسى اۋديتوريا ءۇشىن قازاقستاننىڭ برەندىن، جالپى ەلىمىزدى مادەنيەت ناسيحاتتاۋدا تەلەارنا ماڭىزدى ءرول اتقارادى»، - دەدى مينيستر.

سونىمەن قاتار د. ابايەۆ ەگەر دە وسى تەلەارنانىڭ ءتىلشىسى بولعان جاعدايدا قازاقستان تاريحى تۋرالى كەڭىنەن مالىمەت بەرۋگە ءمان بەرەتىندىگىن اتاپ ءوتتى.

«مۇنىمەن قوسا، قازاقستاننىڭ 25 جىلداعى جەتىستىگى تۋرالى جوبانى ىسكە اسىرار ەدىم. اتاپ ايتقاندا، استانا تۋرالى، ءتۇرلى ءىرى جوبالاردىڭ قۇرىلىسى، «نۇرلى جول» باعدارلاماسى اياسىنداعى اۋقىمدى جۇمىستاردى قامتىپ وتەر ەدىم. ياعني، جۇزەگە اسىرۋى سونشالىقتى قيىن بولعانىمەن، ىسكە قوسىلعان جوبالاردى كەڭىنەن كورسەتۋگە تىرىسامىن»، - دەدى ۆەدومستۆو باسشىسى.

تەلەارناعا قويىلاتىن ءبىرىنشى تالاپتىڭ ءبىرى - ەلىمىزدى شەتەلدىك اۋديتورياعا كەڭىنەن تانىتۋ. ءمينيستردىڭ سوزىنە قاراعاندا، «Kazakh TV» ارناسىندا قازاقستاندىق جاڭالىقتار 15 پايىزعا دەيىن قىسقارتىلادى. سەبەبى، كۇندەلىكتى جاڭالىقتار شەتەل اۋديتورياسىنا قىزىقتى بولماعىندىقتان، كورەرمەندەر نازارىنا بارىنشا قىزىقتى ماتەريالدار ۇسىنىلادى. وسى رەتتە شەت مەملەكەتتەردەن تۋريستەر مەن ينۆەستيتسيا تارتۋعا ءمان بەرىلەدى.

«سوندىقتان دا ەلىمىزدىڭ مادەنيەتى، سالت- ءداستۇرى، ەكونوميكاسى جانە بىرەگەي تابيعاتى تۋرالى تانىمدىق باعدارلامالارعا نەگىزگى ەكپىن قويىلادى. جاڭا جوبالار قازاقستاننىڭ تۋريستىك جانە ينۆەستيتسيالىق تارتىمدىلىعىن ارتتىرادى. ول تەك شەتەدىكتەرگە عانا ەمەس، سونىمەن قاتار ەلىمىزدىڭ ازاماتتارى ءۇشىن دە قىزىقتى بولادى»، - دەدى مينيستر.

ايتا كەتەيىك، بۇگىن داۋرەن ابايەۆتىڭ قاتىسۋىمەن جاڭارعان «Kazakh TV» ارناسى رەسمي تۇردە ىسكە قوسىلدى.

«Kazakh TV» جانە «ءبىلىم جانە مادەنيەت» ارنالارى ءبىر «Kazakh TV» اتاۋىمەن تارالادى. ارنا قازاقستان تاريحى، مادەنيەت، ءداستۇر، تۋرالى باعدارلامالارىن كورسەتىلىمىن جالعاستىرادى. ارنا HotBird 13B، Galaxy 19 جانە AsiaSat 5 سپۋتنيكتىك پلاتفورماسىنىڭ كومەگىمەن قازاق جانە اعىلشىن تىلدەرىندە ەفيرگە شىعادى. وتاندىق كورەرمەندەرگە قازاق جانە ورىس تىلدەرىندە سپۋتنيكتىك جانە كابەلدىك ارنالار ارقىلى قولجەتىمدى بولادى.

جاڭا تەلەۆيزيالىق ماۋسىمدا ارنا كونتەنتى شەتەلدىك بيزنەستىڭ كەلەشەگى، بيزنەس جانە دەمالىس ءۇشىن تۋريستىك سەكتورلار مۇمكىندىگىنە توقتالاتىن، سونداي- اق قازاقستاننىڭ مادەني- تاريحي مۇراسىن بەينەلەيتىن تاقىرىپتىق بلوكتارعا ءبولىنىپ تولىعادى.

«Kazakh TV» ءوزىنىڭ العاشقى كورسەتىلىمىن 2002 - جىلدىڭ 25 - قازانى كۇنى باستادى. «حابار»، «حابار 24» ارنالارىمەن قاتار «Kazakh TV» ارناسى «حابار» اگەنتتىگى» ا ق تەلەوتباسىنىڭ ءبىر بولىگى بولىپ تابىلادى. سپۋتنيكتىك ارنا كومەگىمەن الەمنىڭ 118 مەملەكەتىنە تارايدى. ولاردىڭ اراسىندا سولتۇستىك جانە ورتالىق امەريكا، باتىس جانە شىعىس ەۋروپا، اۆستراليا جانە مۇحيت ەلدەرى، سولتۇستىك افريكا، تاياۋ شىعىس، ازيا جانە وڭتۇستىك كاۆكاز ەلدەرى بار. ارنا فورماتى - اقپاراتتىق- تانىمدىق.

اۆتور: رۋسلان عابباسوۆ