جاس جىگىت ۇيلەنگەننەن كەيىن ەكى ساعاتتان سوڭ اجىراسۋعا ءوتىنىش بىلدىرگەن

استانا. قازاقپارات - ساۋد ارابياسىندا ۇيلەنگەنىنە نەبارى ەكى ساعات بولعان ەر ادام اجىراسۋعا ءوتىنىش بىلدىرگەن. وعان سەبەپ - قالىڭدىقتىڭ الەۋمەتتىك جەلىدە سۋرەت جاريالاۋى.

ەر ادام سۋ جاڭا ايەلىنىڭ ءوز قۇربىلارىنا Snapchat ارقىلى تويدان سۋرەت جىبەرگەنىن بىلە سالىسىمەن- اق نەكەنى بۇزۋ تۋرالى ارىز بىلدىرگەن، دەپ حابارلادى DailyMail.

قالىڭدىقتىڭ اعاسىنىڭ ايتۋىنشا، عاشىقتار ۇيلەنبەس بۇرىن كەلىسىم- شارتقا قول قويعان. كەلىسىم بويىنشا قالىڭدىققا Snapchat, Instagram نەمەسە Twitter الەۋمەتتىك جەلىلەرى ارقىلى سۋرەت جاريالاۋعا قاتاڭ تۇردە تىيىم سالىنعان.

«وكىنىشكە قاراي، مەنىڭ قارىنداسىم ءوز مىندەتىن ورىنداماي، نەكە قيۋ راسىمىنەن قۇربىلارىنا سۋرەت جىبەرۋ ءۇشىن Snapchat قوسىمشاسىن پايدالانعان. ونىڭ اقىرى وسىنداي سۇمدىققا الىپ كەلدى. كۇيەۋى ونىمەن اجىراسۋعا بەل بۋدى» ، - دەدى ول.

ايتا كەتەيىك، بولعان وقيعا ەكى تاراپتىڭ جانجالداسۋىمەن اياقتالدى. قالىڭدىقتىڭ وتباسى كەلىسىمنىڭ تىم قاتاڭ ەكەنىن ايتسا، كۇيەۋجىگىتتىڭ تۋىستارى اجىراسۋدى دۇرىس شەشىم كورىپ وتىر.

 Stan.kz