باسپاناسىز الماتىلىق الەمدى شارلاعان جيھانكەزگە اينالدى
ونىڭ بۇل ارەكەتىن بىرەۋلەر حوش كورىپ جاردەم كورسەتسە، بىرەۋلەر كەرىسىنشە سەنىمسىزدىك تانىتقان. الايدا باسپاناسىز قالسا دا قيىنشىلىققا قاسقايا قارسى تۇرعان جاس جىگىت تاعدىردىڭ سىناعىنىڭ جاقسى تۇستارى بار دەگەن توقتامعا كەلىپ وتىر.
سەرگەي بوندارەنكو الماتىدا ونى ۇستاپ تۇراتىن ەشتەڭە جوق دەپ شەشىپ، جاياۋ جەر ءجۇزىن ارالاپ كەتكەن. ساياحاتتىڭ باستالعانىنا ەكى جارىم جىل ءوتتى، ال جىگىت 90 مىڭ شاقىرىمدى ارتقا تاستاپ 18 مەملەكەتكە بارىپ قايتقان.
ءار ەلدە ونىڭ ەسىندە قالعان ءتۇرلى وقيعالار بولىپتى. ول الداعى ەكى جىل كولەمىندە ساياحاتىن ا ق ش- تا اياقتاۋدى جوسپارلاپ وتىر. وسى ارالىقتا افريكا، وڭتۇستىك جانە سولتۇستىك امەريكانى شارلاپ قايتپاق. جاقىندا ول ازەربايجاننىڭ استاناسى باكۋ قالاسىنا جەتتى.
«قازاقپارات» ح ا ا- نىڭ مەنشىكتى ءتىلشىسى بەكباۋ تايمانوۆ جيھانكەزبەن جولىعىپ، ونىڭ قايدان كەلە جاتقانىن، قايدا بەت العانىن جانە جوسپارلارىن سۇراپ ءبىلدى. ول ازەربايجانعا تۇركيادان كەلگەن، ناحيچيەۆانعا جەتكەسىن باكۋگە ۇشىپ شىققان. «تۇركيادا 3 ايداي ۋاقىت افريكاعا ءوتىپ كەتپەك بولىپ ارەكەتتەندىم. الايدا جولىم بولمادى. قازىر كۇن سۋىتتى، سوندىقتان وڭتۇستىككە بەت الامىن، ءۇندىستانعا باراتىن شىعارمىن. سول جاقتان يران نەمەسە پاكىستانعا كەتەمىن، ارى قاراي افريكاعا جەتۋدىڭ جولدارىن قاراستىرامىن»، - دەدى سەرگەي بوندارەنكو.
افريكادا ساياحاتشى موزامبيك ەلىنە عانا بارماقشى، ونىڭ ويىنشا بۇل قۇرلىقتا تەك وسى مەملەكەت قانا بارىنشا قاۋىپسىز. ەكى جىل مەرزىمدە ول قىرعىز، تاجىكستان، وزبەكستان، رەسەي، موڭعوليا، ازەربايجان، گرۋزيا، تۇركيا، ۋكراينا، مولدوۆا، بەلارۋس، قىتاي، لاوس، كامبودجا مەن تايلاند، مالايزيا مەن شري- لانكادا بولعان.
سەرگەي بوندارەنكو وڭتۇستىك امەريكادا ارگەنتينا، بوليۆيا، كولۋمبيا، ەكۆادورعا بارماقشى ويى بار.
سەرگەيدىڭ ايتۋىنشا، ونىڭ باستى ماقساتى - ادامدار قونىستانعان بارلىق قۇرلىقتاردى ارالاپ قايتۋ. جولاي ول ءوز ەلىن جارنامالاي جۇرەدى، ويتكەنى ارقا قورجىنىندا قازاقستاننىڭ تۋى ءىلىنىپ تۇرادى. ادامدار وسىعان قاراپ ساياحاتشىنىڭ قايدان كەلە جاتقانىن بىلگىسى كەلەدى ەكەن. ارالاعان ەلدەرىنىڭ اراسىندا ونى قىتاي مەن تۇركيادا جىلى قارسى الىپتى. «تۇرىكتەر قازاقستان ازاماتتارىن جىلى ۇشىراي قارسى الادى. مەن قازاقستاننان ەكەنىمدى ايتقاندا ولار «قارداش» ياعني باۋىرىم دەپ ىقىلاسىن بىلدىرەدى»، - دەيدى سەرگەي.
«ساپارىمدى ا ق ش- تا اياقتاۋدى ويلاپ ءجۇرمىن. قالعانىن كەيىنىرەك كورە جاتارمىز. جولجازبا كىتاپ جازامىن. الماتىدا تانىسىم بار، ول ماعان كىتابىمدى شىعارۋعا كومەكتەسەتىندىگىن ايتىپ ۋادە بەرگەن»، - دەيدى سەرگەي.
سونىمەن قاتار ساياحاتشى تۇركيادا بولعان كەزىنە توقتالا كەتتى. «ول كەزدە تۇركيادا اسكەري توڭكەرىس بولدى، ارقامدا ۇلكەن ريۋكزاگىم بولعاندىقتان مەنى ءجيى توقتاتىپ، تەكسەرە بەردى. سول كەزدە قازاقستان ەلشىلىگىنەن كومەك سۇرادىم، ەلشى جانسەيىت تۇيمەبايەۆ (قازىر و ق و اكىمى - اۆتور) مەنى قازاقستاننىڭ ازاماتى ءارى ساياحاتشى دەگەن حات جازىپ بەردى. وسى حات سول ەلدە ماعان كەدەرگىلەردى ەڭسەرۋگە سەپتىگى ءتيدى»، دەيدى جيھانكەز جەرلەسىمىز.
