قىتايلىق ستۋدەنت قازاقشا ءان شىرقادى
ول «قازاقستان ورتالىعىندا» تاياۋدا عانا قازاق ءتىلىن ۇيرەنۋگە دەن قويعان، دەپ حابارلايدى قازاقپاراتتىڭ قىتايداعى ءتىلشىسى سادىق اكىجانوۆ.
«مەن بىرنەشە مارتە قازاق ءتىلىن ۇيرەنۋ ساباقتارىنا قاتىستىم. بۇعان دەيىن قازاق اندەرىن ماعىناسىن بىلمەسەم دە جاتتاپ العان بولاتىنمىن. ماعان ولاردىڭ اۋەنى مەن ىرعاعى وتە ۇنايدى، سوندىقتان مەن قازاق ءتىلىن فاكۋلتاتيۆتىك ءپان رەتىندە تاڭداپ الدىم. مەنىڭ اتىم چاڭياڭ قازاقشا «ۇلكەن مۇحيت» دەپ اۋدارىلادى، «ياڭ» دەگەن ءسوز «جان» سەكىلدى ەستىلەدى، سوندىقتان مەن قازاقشا بايجان دەگەن اتتى تاڭدادىم. ماعان جانار دۇعالوۆا مەن «كەشيۋ» توبىنىڭ ونەرى، قايرات نۇرتاستىڭ ورىنداۋىنداعى «الماتىنىڭ تۇندەرى- اي» ءانى ۇنايدى»، - دەدى ول قازاقپارات تىلشىسىنە بەرگەن سۇحباتىندا. كەيىن ول «ريزامىن» ءانىنىڭ ءبىر شۋماعىن ورىنداپ بەردى.
ەسكە سالا كەتسەك، بەيجىڭ شەت تىلدەر ۋنيۆەرسيتەتىنىڭ جانىنداعى «قازاقستان ورتالىعىندا» شامامەن 90 قىتاي ستۋدەنتى ءتىل ۇيرەنىپ ءجۇر.
