قازاقستاندا سەكسەۋىل ساتۋعا شەكتەۋ قويىلادى
بۇل تۋرالى ورتالىق كوممۋنيكاتسيالار قىزمەتىندەگى بريفينگتە ق ر اۋىل شارۋاشىلىعى مينيسترلىگىنىڭ ورمان شارۋاشىلىعى جانە جانۋارلار الەمى كوميتەتى ءتوراعاسىنىڭ ورىنباسارى قايرات وستەمىروۆ ءمالىم ەتتى، دەپ حابارلايدى قازاقپارات.
«قازاقستاندا ورمانداردى زاڭسىز كەسۋ، اسىرەسە، جامبىل وبلىسىندا سەكسەۋىلگە قاتىستى ءجيى انىقتالادى. بۇل - پروبلەمالى ماسەلەلەردىڭ ءبىرى. سەكسەۋىلدى كەسۋگە تىيىم سالىنعان. الايدا، سەكسەۋىلدى زاڭسىز كەسۋ فاكتىلەرى تىيىلار ەمەس»، - دەدى ول ب ا ق وكىلدەرىنىڭ ساۋالىنا وراي.
وسى ورايدا كوميتەت ءتوراعاسىنىڭ ورىنباسارى الماتى قالاسىنداعى ساۋدا نۇكتەلەرىندە، جانارماي قۇيۋ بەكەتتەرى مەن بازارلاردا سەكسەۋىلدىڭ ەركىن ساتىلىپ جاتقاندىعىن ءجيى كەزدەستىرۋگە بولاتىندىعىن باسا ايتتى.
«قازىر ءبىز ىشكى ىستەر دەپارتامەنتىمەن، پروكۋراتۋرامەن بىرلەسىپ رەيد جۇرگىزىپ، بازارلاردى تەكسەرىپ جاتىرمىز. مۇنان بولەك، سەكسەۋىلدىڭ ساتىلىمعا شىعارىلۋىن الدىن الۋ ماقساتىندا قازاقستاننىڭ ساۋدا نۇكتەلەرىندە ونى ساۋدالاۋعا تىيىم سالۋ بويىنشا قاۋلى جوباسىن ازىرلەدىك»، - دەدى وستەمىروۆ.
اۆتور: مارلان جيەمباي
