ورمان اعاشتارىن زاڭسىز وتايتىن وڭىرلەر بەلگىلى بولدى
بۇل تۋرالى ورتالىق كوممۋنيكاتسيالار قىزمەتىندەگى بريفينگتە ق ر اۋىل شارۋاشىلىعى مينيسترلىگىنىڭ ورمان شارۋاشىلىعى جانە جانۋارلار الەمى كوميتەتى ءتوراعاسىنىڭ ورىنباسارى قايرات وستەمىروۆ ءمالىم ەتتى، دەپ حابارلايدى قازاقپارات.
«2016 - جىلدىڭ باسىنان قازاقستان اۋماعىندا 2 مىڭ تەكشە مەتر ورمان اعاشتارىن زاڭسىز وتاۋدىڭ 433 وقيعاسى تىركەلدى. كەلتىرىلگەن شىعىن 26 ميلليون تەڭگەنى قۇرايدى. وتكەن جىلى 19 مىڭ تەكشە مەتر زاڭسىز اعاش كەسۋگە قاتىستى 669 وقيعا تىركەلگەن ەدى»، - دەدى ول ب ا ق وكلىدەرىنىڭ ساۋالىنا وراي.
ونىڭ سوزىنە قاراعاندا، ورمان اعاشتارىن زاڭسىز كەسۋ دەرەكتەرى وڭتۇستىك جانە شىعىس قازاقستان، الماتى جانە جامبىل وبلىستارىندا ءجيى تىركەلگەن. ماسەلەن، جامبىل وبلىسىندا نەگىزىنەن سەكسەۋىل اعاشتارىن كەسۋ ءجيى ورىن الادى. ال ەلىمىزدە بۇل اعاش ءتۇرىن كەسۋگە زاڭمەن تىيىم سالىنعان.
«قۇقىق قورعاۋ ورگاندارى تاراپىنان ورمان اعاشتارىن زاڭسىز كەسۋگە قاتىستى 346 ءىس قوزعالدى. سوت تاراپىنان 2 اكىمشىلىك، 197 قىلمىستىق ءىس قارالىپ، زاڭ بۇزۋشىلاردان 423 تەكشە مەتر زاڭسىز كەسىلگەن وتىن تاركىلەندى. سونىمەن قاتار 31 كولىك قۇرالى مەن اعاش كەسۋگە ارنالعان 59 قۇرال- جابدىق الىندى»، - دەدى ق. وستەمىروۆ.
اۆتور: مارلان جيەمباي
