ساۋد ارابياسى قازاقستاننان قوي ەتىن كوپتەپ ساتىپ الۋعا دايىن
ەر- ريادتا ىسساپارمەن جۇرگەن قازاقپارات ءتىلشىسى سەرىك سابەكوۆتىڭ جازۋىنشا، بۇگىن «اتامەكەن» ۇلتتىق كاسىپكەرلەر پالاتاسى باسقارماسى ءتوراعاسىنىڭ ورىنباسارى نۇرجان التايەۆ ساۋد ارابياسى ساۋدا- ونەركاسىپ پالاتاسى وكىلدەرىمەن كەزدەسكەننەن كەيىن ءمالىم ەتكەن.
«ەگەر ەتكە، قوي ەتىنە قاتىستى ايتار بولساق، وندا سۇرانىس كولەمى وتە جوعارى. ياعني، بۇگىن ساۋديا تارابىنىڭ اي سايىن 5-6 مىڭ باس مال قابىلداۋعا دايىن ەكەندىگى ايتىلدى. بۇل وتە ۇلكەن كولەم. مۇمكىن ءبىز ونى قازىرگى ۋاقىتتا ورىنداي دا المايتىن شىعارمىز»، - دەدى نۇرجان التايەۆ.
دەگەنمەن، ول قازىرگى ۋاقىتتا قازاقستاندا اۋىل شارۋاشىلىعىن، اسىرەسە، مال شارۋاشىلىعىن دامىتۋعا باعىتتالعان زور قادامداردىڭ قابىلدانىپ جاتقاندىعىن اتاپ ءوتتى.
«ياعني، قازىر ولار ۇلكەن كولەم جايىندا ايتۋدا جانە تەڭگەنىڭ دوللارعا باعامى وزگەرگەننەن كەيىن ول بىزدەر ءۇشىن بارىنشا تارتىمدى بولا تۇسۋدە. ماسەلەن، قازىر بىرىككەن اراب امىرلىكتەرى 1 قويدى 250 دوللاردان ساتىپ الىپ جاتىر. باعام وزگەرگەنگە دەيىن ۇشاقپەن اپارۋدى ەسكەرگەندەگى لوگيستيكانى قوسا العاندا بۇل مۇلدەم تارتىمدى ەمەس ەدى. ال باعام وزگەرگەننەن كەيىنگى 1 قويدىڭ 250 دوللار بولۋى تەڭگەگە شاققاندا شامامەن 80 مىڭ تەڭگەنى قۇرايدى. ال بۇل بايىپپەن قاراۋدى قاجەت ەتەدى. تاسىمالداۋعا كەتەتىن شىعىنداردى ەسەپتەگەننىڭ وزىندە ول بارىنشا تارتىمدى بولىپ قالا بەرەدى»، - دەدى التايەۆ.
اۆتور: مارلان جيەمباي
