مەديتسينادا جەمقورلىقتىڭ بارىن دارىگەرلەردىڭ وزدەرى مويىندايدى - ساۋالناما
بۇدان بولەك، ونداي ساۋالناما دارىگەرلەردىڭ اراسىندا دا جۇرگىزىلدى، دەپ حابارلايدى قازاقپارات ءتىلشىسى.
ورتالىق باسشىسىنىڭ ورىنباسارى ناتاليا تەرەحوۆانىڭ ايتۋىنشا، ساۋالناما بارىسىندا جەمقورلىققا قاتىستى جالپىلاما سۇراقتار قويىلعان جوق. ماسەلەن، حالىق اراسىندا «تەگىن مەديتسينالىق قىزمەت كەزىندە دارىگەرگە ماتەريالدىق سىي- سىياپات جاسادىڭىز با؟» دەگەن ساۋال قويىلدى. سول كەزدە ادامداردىڭ 22 پايىزى ونداي «سىي- قۇرمەت» جاساعاندارىن مويىندادى. الايدا ونى ءوز ەركىمەن ىستەگەندەرىن جەتكىزدى. «شىنى كەرەك، بۇگىندە ەل ازاماتتارىنىڭ ءوزى ريزاشىلىق بىلدىرەمىز دەپ، دارىگەر مامانداردى دامەتتىرىپ قويادى. ونداي قارىم- قاتىناس مەنتاليتەت دەڭگەيىندە قالىپتاسىپ وتىر. ماسەلەن، ساۋالناماعا قاتىسقان كەيبىر ادامدار ەموتسياعا بەرىلىپ، ءبىز ونداي سىي- سىياپاتتى نەگە جاسامايمىز، مەنىڭ ۇلىم نەمەسە قىزىم تۋسا، ولاردىڭ دۇنيەگە كەلۋىنە سەبەپكەر بولعان مەدبيكەلەر دە العىسقا لايىق قوي دەپ، بىزگە قارسى سۇراق قويدى. سوندا بايقاپ قاراساق، بۇل قارىم- قاتىناس كادىمگىدەي مەنتاليتەت بولىپ كەتتى. بۇل تەگىن مەديتسينالىق قىزمەت قوي. نەگە ءبىز ول ءۇشىن ماتەريالدىق سىي- سىياپات جاساۋىمىز كەرەك؟ ادامدار وسىنى تۇسىنبەيدى»، - دەيدى ن. تەرەحوۆا. دەگەنمەن، ساۋالناما بارىسىندا جاۋاپ بەرگەن حالىقتىڭ 6 پايىزى ماتەريالدىق سىي- سىياپات بەرۋگە دارىگەرلەردىڭ وزدەرى ەمەۋرىن جاساعاندارىن ايتقان.
وسىدان كەيىن جەمقورلىققا قاتىستى ساۋالداردىڭ پاراقشاسى مەديتسينالىق قىزمەتكەرلەر اراسىندا تاراتىلدى. سوندا دارىگەرلەردىڭ 30 پايىزى جاۋاپ بەرۋگە قينالىپ، قالىس قالعاندى ءجون كوردى. «ەندى، اشىعىن ايتقاندا، ءبارىمىز سان الۋان انكەتالار مەن ساۋالنامالاردى تولتىرىپ جاتامىز عوي. سول كەزدە «قالىس قالامىن» دەگەندى نە ءۇشىن تاڭدايمىز؟ بىرىنشىدەن، ول سۇراققا جاۋاپ بەرگىمىز كەلمەيدى، ياعني كەيبىر اقپاراتتى جاسىرعان جاعدايدا سونداي تاڭداۋ جاسايمىز. ولاي ىستەگەن جەڭىل. سەبەبى ءبىزدىڭ جاۋاپ بەرمەگەنىمىزدى بىرەۋلەر ءبىلىپ قويۋى مۇمكىن دەپ قورقامىز. دەگەنمەن، وسىنىڭ ءوزى ءبىر كورسەتكىش بولىپ سانالادى»، - دەيدى ن. تەرەحوۆا.
ساۋالناما بارىسىندا مەديتسينالىق قىزمەتكەرلەر ەكى توپقا ءبولىندى. ءبىر جاعى جەمقورلىققا قاتىستى حالىقتىڭ پىكىرى قاتە قالىپتاستى دەسە، ەكىنشى توپ مەديتسينا سالاسىنداعى جەمقورلىقتىڭ بارىن مويىنداپ، ونداي ارەكەتتەر بۇكىل اق حالاتتىلاردىڭ ابىرويىنا نۇقسان كەلتىرىپ وتىر دەپ سانايدى. ايتا كەتكەن ءجون، ساۋالناما انونيمدى تۇردە ۇيىمداستىرىلدى.
