تورەعاليدىڭ اكەسى ەركە ەسماحان ءۇشىن بالاسىنا رەنىشتى ەكەنىن ايتتى

استانا.قازاقپارات - تورەعالي تورەالى مەن ەركە ەسماحان حالىق اراسىنا كەڭىنەن تانىلعان «اللو» ءانىنىڭ جالعاسىن شىعارىپ، تەلەفونداعى اڭگىمەنى كەزدەسۋمەن اياقتاعان ەدى.

جۇرت «سالەمەتسىز بە» انىنە بەينەبايان كۇتۋدە. دەسە دە قوس ءانشى دە حالىقتىڭ قالاۋىن جۇزەگە اسىرۋعا اسىعار ەمەس.

ەستەرىڭىزدە بولسا، العاشقى بەينەبايان لايىقتى باعاسىن العاننان كەيىن، پروديۋسەر بايان ەسەنتايەۆا حيكايانىڭ جالعاسى فيلممەن ۇشتاسۋى مۇمكىن دەگەندى ايتقان ەدى. الايدا تورەالى ءاليحانوۆ پەن بايان ماقسات قىزىنىڭ اراسىندا تۋعان داۋ بۇل جوسپاردىڭ كۇل- تالقانىن شىعاردى. العاشقىدا اراز بولىپ، الايدا ارادا ءبىراز ۋاقىت وتكەن سوڭ تورەعالي مەن ەركە قايتا بىرگە ءان سالا باستادى. ءتىپتى، جاڭا دۋەت جازدىردى. دەسە دە، بۇل ءاننىڭ جارىققا شىعاتىنىن تورەعاليدىڭ اكەسى ءارى پروديۋسەرى بىلمەگەن ۇقسايدى. ەركە ەسماحانمەن دۋەت ايتقانى ءۇشىن اكە ۇلىنا رەنجىپ قالعانداي.

«مەنىڭ الدىما كەلىپ ەشكىم ول نارسەنى ايتقان جوق. تورەعاليمەن ءان ايتايىن، جالعاستىرايىن دەپ ءالى كۇنگە دەيىن ەشكىم سۇراعان جوق. ءاننىڭ شىققانىن كەيىننەن ءبىلدىم. وندا دا «ۇلى دالا بالاسى» كونتسەرتىندە... ونەردە ەشكىم قارسىلىق جاساي المايدى. اركىم ءوزىنىڭ ەركى. ونەردە ەشكىم ەشكىمدى قينامايدى. تالعام وتە جوعارى. ءبىر انىشىمەن قادالىپ تۇرۋعا دا بولمايدى. تورەعالي گۇلنۇر ورازىمبەتوۆامەن دە ايتىپ جاتىر. التىنايمەن دە ايتىپ قالار. جوسپارلار كوپ» ، - دەدى پروديۋسەر اكە 31 - ارنانىڭ «ايتا بەرسىن» باعدارلاماسىنا بەرگەن سۇحباتىندا.

ەسەسىنە تورەعاليدىڭ ءوزى اكەسىنىڭ رەنىشىنەن بەيحابار سەكىلدى. «سالەمەتسىز بە» ءانىنىڭ «اللومەن» ءبىر ۋاقىتتا جازىلعانىن ايتقان ول بەينەبايان ءتۇسىرۋ جوسپاردا بار ەكەنىن دە ايتىپ قالدى. تەك بەينەبايان تۋرالى اقىلداسۋ ءۇشىن قوس ءانشىنىڭ ۋاقىتى بولماي ءجۇر ەكەن.

«دايىن تۇرعان دۇنيەنى نەگە ورىنداپ شىقپاسقا؟ ايتساق ايتايىق دەپ شەشتىك. نەگىزى بەينەبايان ءۇشىن جازىلعان. قىز بەن جىگىت كەزدەسەدى. سودان كەيىن «قالايسىز؟ » دەپ ودان كەيىن تەلەفونسىز اڭگىمەسى ءوربيدى. مۇمكىن ءتۇسىرىلىپ قالار، بىلمەيمىن» ، - دەيدى تورەعاليدىڭ ءوزى.

 ال ەركە ءانشى ەركە ەسماحان بولسا: «مەن كۇندە گاسترولدىك ساپاردا، تويدامىن، قولىمىز تيمەي ءجۇر. تورەعالي دا سولاي. بۇيىرتسا ءبىر كەزدەسىپ، مۇمكىن اقىلداسىپ، بەينەبايان دا ءتۇسىرىپ قالارمىز» ، - دەدى.

ەسەسىنە تورەالى ءاليحانوۆ بۇل ماسەلەنى پروديۋسەرلەردىڭ شەشەتىنىن ايتىپ قالدى.

«ونى مەن شەشەمىن» ، - دەپ قاداپ ايتتى ول. ءسوز اراسىندا تورەعاليدىڭ اكەسى ەسەنتايەۆاعا رەنىشتى ەمەس ەكەنىن ايتتى. دەسە دە، ءبىر كەزدەرى ونىمەن اراز بولعان ءاليحانوۆ مىرزانىڭ ەسەنتايەۆامەن قايتا جۇمىس ىستەگىسى كەلمەيتىن سىڭايلى.

«ەكىنشى تاراپتان بەينەبايان تۇسىرۋگە ۇسىنىس تۇسكەن جاعدايدا، كەلىسەسىز بە؟ » - دەگەن ءتىلشى ساۋالىنا ول:

«بىلمەيمىن، ەشتەڭە ايتا المايمىن» ، - دەپ جاۋاپ بەردى.

ال ۇلى دالا بالاسىنىڭ ءوزى ماحاببات حيكاياسىنىڭ ەكى بولىمنەن تۇرۋ كەرەكتىگىن العا تارتۋدا:

«ەگەر وسى انگە كليپ تۇسىرىلەتىن بولسا، سونىمەن جەتكىلىكتى سياقتى. قاي كەزدە دە ەكى ۆاريانت بولعان جاقسى عوي. ا ۆاريانتى، ب ۆاريانتى. ەكى سەريالى بولسا دۇرىس دەپ ويلايمىن» .