كۇلەكبايەۆ جەزوكشەلەردى «اللاھتان قورىقپاساڭدار، ءبارىڭدى جارىپ جىبەرەمىن» دەپ قورقىتقان

الماتى. قازاقپارات - بۇگىن الماتىداعى تەرگەۋ اباقتىسىندا رۋسلان كۇلەكبايەۆتىڭ ىسىنە قاتىستى باستى سوت وتىرىسى ءوتىپ جاتىر.

سوت بارىسىندا مەملەكەتتىك ايىپتاۋ تاراپى كۇلەكبايەۆتىڭ سودنيكوۆانى ولتىرۋىنە قاتىستى ايىپتاۋ قورىتىندىسىن وقىدى.

 «كۇلەكبايەۆ 2016 -جىلدىڭ 17-18 شىلدەسىندە جانسۇگىروۆ كوشەسىندەگى «ايات» قوناقۇيىندە جەزوكشەلەر ءجۇرۋى مۇمكىن ەكەنىن الدىن الا جوسپارلاپ، ءوزىنىڭ ءدىني الەۋمەتتىك كوزقاراسىنا قايشى بولعاندىقتان، جەزوكشەلىكپەن اينالىساتىن ايەلدەردى ءولتىرۋ ماقساتىندا اتالعان ورىنعا بارعان. قوناق ءۇي اۋلاسىندا تۇرعان يمانعاليەۆكە تيەسىلى كيا ريو اۆتوكولىگىنە بارىپ، ونىڭ ىشىندە جەزوكشەلەر بار ەكەنىن بولجاپ، ىشىندە وتىرعان يمانعاليەۆتەن تەرەزەسىن اشۋدى سۇراعان. كولىك تەرەزەسى اشىلعاننان كەيىن، بىرنەشە ەسكەرتۋ جاساپ، وعان كونبەگەن سوڭ ارتقى ورىندىقتا وتىرعان سودنيكوۆانى باسىنان اتىپ ولتىرگەن. وسى كەزدە يمانعاليەۆ قاشىپ شىققان. كۇلەكبايەۆ ونىڭ ارتىنان وق اتقانىمەن، تيگىزە الماعان. ۋاقىتىن ءتيىمدى پايدالانۋ ماقساتىندا كولىككە كەلىپ، ىشىندە وتىرعان ەكىنشى ءومىرزاقوۆانى الىپ، سودنيكوۆانىڭ ءمايتىن الىپ، قالادا جۇرگەن. جولدا ءومىرزاقوۆاعا «سەندەر اللاھتان قورىقپايسىڭدار! اللاھتان كەشىرىم سۇرا؟ ! اللاھتىڭ جولىنا قارسى شىقساڭدار، ءبارىڭدى جارىپ جىبەرەمىن» دەپ قورقىتقان. ءومىرزاقوۆا ومىرىنە قاۋىپ تونگەندىكتەن كەشىرىم سۇراپ، ءوز ءاميانىن كۇلەكبايەۆقا بەرگەن. كۇلەكبايەۆ ىشىندە 7 مىڭ تەڭگەسى بار ءومىرزاقوۆانىڭ اميانىمەن قوسا، كولىك ىشىندە تۇرعان يمانعاليەۆتىڭ ىشىندە  42000 تەڭگەسى بار ءاميانىن العان. جولدا كولىكتىڭ قىزىل باعدارشامعا توقتاعانىن پايدالانىپ، ءومىرزاقوۆا ودان قاشىپ شىعىپ قۇتىلعان. كۇلەكبايەۆ ونى قۋماعان. وسىدان كەيىن كۇلەكبايەۆ قالاداعى ءبىر دۇكەن الدىنا كەلىپ كولىكتى قالدىرىپ كەتكەن» ، دەدى پروكۋرور جارقىن باقاشبايەۆ.