نۇرتاس ادامباي :«تاراز» دراماسىنا ادامدار كوڭىل كوتەرۋ ءۇشىن بارمايدى

الماتى. قازاقپارات - جاقىندا قازاقستاندىق رەجيسسەر نۇرتاس ادامبايدىڭ «تاراز» دراماسى كينو تەاترلاردا پروكاتقا شىققان.

بۇعان دەيىن «سابينا كەلىن»، «اۋىلدان قاشۋ»، «سابينا كەلىن-2» فيلمدەرىمەن ءوز كورەرمەنىن جيناعان رەجيسسەردىڭ بۇل تۋىندىسى قانشالىقتى ءساتتى بولماق؟ Nurtas Production كينوستۋدياسىنىڭ بۇدان كەيىنگى جوسپارى قانداي، بۇل تۋرالى قازاقپارات تىلشىسىنە بەرگەن سۇحباتىندا نۇرتاس ادامبايدىڭ ءوزى تارقاتىپ ايتتى.

- قازاقستان پروكاتىنا شىققان «تاراز» العاشقى دەمالىستا 85 ميلليون تەڭگە جينادى. بۇل بۇعان دەيىنگى تۇسىرگەن كينولارىڭىزدىڭ رەكوردىنا جەتە المادى دەپ ءوزىڭىز ايتتىڭىز. «تارازدىڭ» جالپى ءساتتى بولاتىنىنا سەنىمدىسىز بە؟

- جوبا ءوزىن اقتايدى دەپ ءۇمىت ارتىپ وتىرمىز. بۇل جولى پايدا تابۋىمىز قيىنداۋ ەكەنىن ۇقتىق. سەبەبى، «تارازدا» «سابينا كەلىن» تۋىندىلارىنان اناعۇرلىم مول اقشا جۇمسادىق. «سابينا كەلىن» - وتباسىلىق فيلم، ال «تارازدىڭ» جانرى اۋىر. بۇل كينونى كوڭىل كوتەرۋ ءۇشىن كورمەيدى. «تاراز» ادامدارعا وي تۇرتكى بولۋ ءۇشىن ءتۇسىرىلدى. سوندىقتان، ءبىز العاشقى دەمالىستاعى جيناعان قارجىعا ريزامىز. كينو تۇسىرۋگە كەتكەن 400 مىڭ دوللاردى اقتاۋ ءۇشىن پروكاتتان 1,1 ميلليون دوللار تابۋىمىز كەرەك، ويتكەنى كينوتەاترلاردىڭ الاتىن پايىزى بار. قازىرگى ۋاقىتتا نارىقتان ونداي قاراجات تابۋ قيىن.

- قازاقستاندىق كينەماتوگرافياعا قانداي باعا بەرەر ەدىڭىز، قازىر ول قانداي بەلەستى ەڭسەرە الدى؟

 - بيىل قازاقستاندىق فيلمدەر كوپ ءتۇسىرىلدى. كوبىسى پروكاتقا دا شىقتى. ەستۋىمشە، 30 كينو كارتينا بار. بىلەتىنىم، ءبىزدىڭ شاعىن نارىقتى ەسەپكە العاندا ولاردىڭ بارلىعى دا كوممەرتسيالىق جاعىنان ءساتتى بولا قويماس. كينوتەاترلاردىڭ سانىنىڭ ازدىعىنان بۇل سالادا بيزنەس جاساۋ قيىنىراق. بۇگىن ءبىز (Nurtas Production ستۋدياسى) «تاراز» فيلمىنە از كۇش، از قاراجات جۇمساماعانىمىزدى تۇسىندىك. ءبىزدىڭ تاراپىمىزدان بۇل قايىرىمدىلىق شاراسى دەسە بولادى، سوندىقتان ودان كوپ پايدا كورەمىز دەپ وتىرعانىمىز جوق. ءبىز رەاليستپىز. وسىلاي دەپ جوسپارلاعانىمىزبەن، كينونىڭ ءساتتى قادام باسقانىن بايقاپ وتىرمىز. زالدار تولى، فيلم تۋرالى ايتۋشىلار كوپ.

ءبىزدىڭ قازاقستاندىق كينەماتوگرافيادا بەلگىلى ءبىر دەڭگەي بار، ودان سەكىرىپ، اسىپ كەتە المايسىڭ. جالپى، كينەماتوگرافيادا جاعداي جاقسى. «سابينا كەلىننىڭ» جەتىستىگىنەن كەيىن كوپشىلىك كينو تۇسىرۋگە بەتبۇردى. بىرەۋلەرگە بۇل وڭاي كورىنگەن بولۋى مۇمكىن. ءتىپتى، ءبىزدىڭ ءوزىمىز، سول العاشقى فيلمدەردەگى رەكوردىمىزعا جەتە الار ەمەسپىز. سەبەبى، ول دەۆالۆاتسياعا دەيىن بولعان ەدى.

 بۇل جەردە بىرنەشە فاكتوردى ەسكەرۋ كەرەك. دەۆالۆاتسيادان كەيىن 30-40 پايىز كورەرمەن كينوزالداردان كەتتى. بۇل ءتۇسىم مولشەرىن كەمىتكەنى ءسوزسىز. ءبىراق، بۇعان ءبىز قامىعىپ قالعانىمىز جوق، جۇمىس جاساۋعا تىرىسامىز. ءبىز قارجىمىزدى جوباعا سالىپ، ودان پايدا تاۋىپ، كەلەسى جوبانى جۇزەگە اسىرعىمىز كەلەدى. بيزنەستىڭ مۇنداي ءتۇرى «كينو تۋرالى» زاڭناماسىز، مەملەكەتتىڭ قولداۋىنسىز ۇزاققا بارمايدى. باسقا نارىققا، اتاپ ايتقاندا رەسەيگە شىعۋعا تۋرا كەلەدى. نەشە رەت ۇسىنىس جاساساق تا «قازاقفيلم» كينوستۋدياسى ىنتىماقتاستىققا بارماي وتىر. بىزدە بىرنەشە جاقسى رەجيسسەر بار. ولارعا باعا بەرگىم كەلىپ وتىرعانىم جوق، سەبەبى ولاردىڭ دەنى مەنىڭ دوستارىم، تانىستارىم، اتاپ ايتقاندا: اقان ساتايەۆ، اسقار بيسەمبين، اسقار ۋزابايەۆ.

- ەگەر كەتسەڭىز، ول جاقتا نە تۇسىرەسىز؟

- كينوجوبالار. ءبىز مۇنىمەن ءاردايىم اينالىساتىن بولامىز.

- تەلەۆيزيالىق ءازىل- سىقاق قويىلىمدارىنا ورالمايسىز با؟

- ازىرگە جوق. ءبىراق، ەگەر كوماندا جيناي الساق، ناقتىراق ايتقاندا كۇلكىلى سىقاقتار جازىپ بەرەتىن اۆتورلار تابا الساق، وندا ونى جاساۋعا بولادى. ءبىزدىڭ بۇعان دەيىن تەلەۆيزيالىق جوبالارىمىز رەيتينگ كورسەتە الدى. كورەرمەنى كوپ بولدى. «جالعاسى قاشان بولادى؟» دەپ سۇراق قوياتىندار كوپ. ارينە، مۇنىمەن اينالىسقىمىز كەلەدى، ءبىراق، ءبىزدىڭ ستيلىمىزگە كەلەتىن سىقاقتار جازاتىن اۆتوردى ءالى تاپپادىق.

- «تاراز» فيلمىن ساناۋلى كورەرمەنگە تۇساۋىن كەسكەن جابىق كورسەتۋ كەزىندە ءسىز كەلەسى جوبالارىڭىز پسيحولوگيالىق فيلم بولاتىنىن ايتتىڭىز. وسى تۋرالى ايتىپ بەرىڭىزشى.

- فيلمدى تۇسىرمەي جاتىپ، ول تۋرالى ايتۋدىڭ قاجەتى جوق. وتاربانىڭ الدىنا ءتۇسىپ جۇگىرگىمىز كەلمەيدى. تەك قانا ايتارىمىز، بۇل وتە قىزىقتى، شىنايى، تريللەر جانرىنىڭ ەلەمەنتتەرى بار فيلم بولماق. ول ءبىزدىڭ الەۋمەتتىك اسپەكتىلەردى بەينەلەيتىن پسيحولوگيالىق كينو بولادى. قازىر وسىنى عانا ايتا الامىن. ءقازىر پروباسىن جاساپ، اكتەرلەردى تاڭداپ جاتىرمىز.

- ءسىزدىڭ جاڭا كينوڭىز كورەرمەن كوڭىلىنەن شىعا الا ما؟

- بۇگىنگى تاڭدا نە بولىپ جاتقانى تۋرالى ادامدارعا وي سالىپ، كوڭىلدەرىن تولقىتادى دەپ ۇمىتتەنەمىز. قازاقستاندىق كورەرمەندەر - مەيرىمدى، ءبىزدىڭ كينونى ۇناتادى. ءبىزدىڭ شىعارماشىلىعىمىزدى ۇناتپايتىن ادامدار دا بار. ولارعا گولليۆۋد فيلمدەرىنە بارۋعا كەڭەس بەرەمىز دە، قازاقستاندىق ساپالى فيلمدەرگە بارۋ كەرەكتىگىن تۇسىنگەن ادامدارعا العىس ايتامىز. قۇدايعا شۇكىر، ونداي ادامدار بارشىلىق.

- بولاشاق فيلمىڭىزدىڭ بيۋدجەتى قانداي؟

- ءبىز وعان كەتەتىن شىعىندى ءالى ەسەپتەگەن جوقپىز، ءبىراق از اقشا كەتپەيتىنى بەلگىلى جانە ءبىزدىڭ جاڭا جوبامىزعا قولداۋ تانىتامىز دەپ وتىرعان ادامدار بار.

- كورەرمەندەر «سابينا كەلىن»، «اۋىلدان قاشۋ» سەكىلدى كوپشىلىكتىڭ كوڭىلىن تاپقان فيلمدەردىڭ جالعاسىن كورە الا ما؟

 - بۇل ماسەلە بويىنشا ءالى ناقتى شەشىم جوق. ءبىز قازىر الداعى ستراتەگيامىزدى قايتا قاراستىرىپ جاتىرمىز. ءبىزدىڭ بۇل مەملەكەتتەن كەتىپ، وزگەلەر ءۇشىن كينو تۇسىرگىمىز كەلمەيدى. ءبىز مۇنى بۇرىننان ويلاپ كەلەمىز، ءبىراق ەرتە مە، كەش پە بۇل جۇزەگە اسۋى مۇمكىن. بىزدە دەمەۋشى، مەملەكەتتىك قولداۋ جوق. ءبىز يدەيا ءۇشىن العا جىلجي بەرەتىن «قىزىل كرەست» ۇيىمى ەمەسپىز. ءبىز الەۋەتىمىزدى تانىتۋ ءۇشىن، الداعى جوبالارىمىز ءۇشىن بىزگە ۇلكەن كىرىس كەرەك.

اۆتور: الماس مۇقاش ۇلى