بەيجىڭدە «اباي وقۋلارى» ءوتتى - فوتو
مادەني شارا تانىمال قىتايلىق ءمۇسىنشى يۋان سيكۋن جاساعان اباي ەسكەرتكىشىنە گۇل شوقتارىن قويۋمەن باستالدى. ايتا كەتەرلىگى، بۇل ەسكەرتكىش 2014 -جىلدىڭ 19 -مامىرىندا قىتايداعى قازاقستان ەلشىلىگىنىڭ باستاماسىمەن بوي كوتەرگەن بولاتىن.
«اباي وقۋلارىن» قىتايداعى تاجىكستان ەلشىسى پارۆيز داۆلاتزودا، ارمەنيا ەلشىسى سەرگەي ماناساريان، ش ى ۇ باس حاتشىسىنىڭ ورىنباسارى سابىر يماندوسوۆ، «جينتاي» مۋزەيىنىڭ ديرەكتورى جو حۋا، ديپلوماتتار، قازاقستان مەن قىتاي ستۋدەنتتەرى جانە قازاق دياسپوراسىنىڭ وكىلدەرى تىڭدادى.
سالتاناتتى شارانىڭ اشىلۋ راسىمىندە قىتايداعى قازاقستان ەلشىسى شاحرات نۇرىشەۆ اباي قۇنانباي ۇلىنىڭ شىعارماشىلىعىنا توقتالىپ، ونىڭ قازاق فيلوسوفياسى مەن ادەبي ءتىلىنىڭ قالىپتاسۋىنا قوسقان ۇلەسىن ءسوز ەتتى.
«سوڭعى جىلدارى بەيجىڭدەگى اباي ەسكەرتكىشى الدىندا «اباي وقۋلارىن» وتكىزۋ تاماشا داستۇرگە اينالىپ وتىر. اباي قازاق حالقىنىڭ ۇلى اقىنى، اعارتۋشى ءارى ويشىلىعى عانا ەمەس، سونىمەن بىرگە ول قازاقستاننىڭ شەتەلدەگى حالىقتىق ديپلوماتيالىق نىشانى دەسەك تە بولادى. سوندىقتان دا بۇگىنگى شارا قازاقستان رەسپۋبليكاسى تاۋەلسىزدىگىنىڭ جانە قازاقستان مەن قىتاي اراسىنداعى ديپلوماتيالىق قارىم- قاتىناستىڭ 25 جىلدىعىنا ارنالدى»، - دەدى ەلشى.
شارا بارىسىندا قىتايداعى ارمەنيا ەلشىسى سەرگەي ماناساريان دا «اباي وقۋلارىنان» العان اسەرىمەن ءبولىستى.
«بۇگىنگى شارادان زور اسەر الدىم. ءبىز ساحنادان ابايدىڭ شىعارماشىلىعى مەن ءوز حالقىنىڭ تاريحىنا جەتىك قازاقستاندىق ستۋدەنتتەردى كوردىك. بۇل تاڭقالارلىق جايت»، - دەدى ول.
اۆتور: مارلان جيەمباي
