قىزىلوردادا وتكەن بايگەدە تالدىقورعاندىق جۇيرىك ءبىرىنشى كەلىپ اۆتوكولىك ۇتىپ الدى - فوتو
ەلىمىزدىڭ تۇكپىر- تۇكپىرىنەن كەلگەن ونداعان شاباندوز بايگەنىڭ 5 تۇرىنەن سىنعا ءتۇستى. ات بايگەسىنىڭ دەمەۋشىلەرى - «قازگەرمۇناي» ب ك، «ءمادى قاجى» ج ش س، «جان-اراي» ج ش س، «بايقوڭىر» ا ك ك.
وبلىس اكىمى قىرىمبەك كوشەربايەۆ جينالعان جۇرتشىلىقتى ەگىن جيناۋ ناۋقانىنىڭ اياقتالۋىمەن جانە دالا اكادەميگىنىڭ مەرەيتويىمەن قۇتتىقتاپ، شاباندوزدارعا ساتتىلىك تىلەدى.
- سوڭعى جىلدارى ۇلتتىق سپورت تۇرلەرىنىڭ وبلىسىمىزدا بۇقارالىق سيپات الىپ كەلە جاتقانى قۋانتادى. ايماقتا 14 مىڭنان استام ادام ەتنوسپورتتىڭ 7 تۇرىمەن شۇعىلدانادى. جىل سايىن وبلىسىمىزدا وتكىزىلەتىن «التىن بەلبەۋ» تۋرنيرى - رەسپۋبليكاداعى ەڭ تانىمال ءارى بەدەلدى باسەكەنىڭ بىرىنە اينالدى. سونداي- اق، بيىلعى جىلى كوكپاردان جاڭاقورعان اۋدانىندا وتكەن 5- قازاقستان چەمپيوناتىندا وبلىسىمىزدىڭ قۇراما كومانداسى تۇڭعىش رەت قاتىسىپ، ەكىنشى ورىندى جەڭىپ الدى. كوكپاردان وبلىستىڭ جاسوسپىرىمدەر قۇراما كومانداسى ەكى مارتە كۇمىس جۇلدەنى يەلەندى. بىلتىر ۇلتتىق سپورتتى دامىتۋ ماقساتىندا سالىنعان يپپودروم حالىقارالىق جارىستاردى وتكىزۋگە جانە وڭىردە ات سپورتىنىڭ وركەندەۋىنە مۇمكىندىك بەرەدى، - دەدى ايماق باسشىسى.
بۇگىنگى ات بايگەسىنىڭ قورىتىندىسى تومەندەگىدەي:
كوكپاردان جاڭاقورعان اۋدانىنىڭ كومانداسى جەڭىسكە جەتىپ، 2 ميلليون تەڭگەنى يەلەندى.
ەكىنشى ورىندى جەڭىپ العان شيەلىلىكتەرگە 1,5 ميلليون تەڭگە بەرىلدى.
ءۇشىنشى ورىندى قانجىعاسىنا بايلاعان قىزىلوردا قالاسىنىڭ شاباندوزدارى 500 مىڭ تەڭگەمەن جانە ءتورتىنشى ورىندى جەڭىپ العان ارالدىقتار 250 مىڭ تەڭگەمەن ماراپاتتالدى.
«تەڭگە ءىلۋ» سايىسىندا ءبىرىنشى ورىندى (100 مىڭ تەڭگە) جاڭاقورعاندىق التاي قوڭقايەۆ يەلەندى. ەكىنشى ورىندى (75 مىڭ تەڭگە) جالاعاشتىق دوسبول نۇرحان جەڭىپ السا، ءۇشىنشى ورىندى (50 مىڭ تەڭگە) قىزىلوردالىق جانبولات الىقوجايەۆ يەلەندى.
«قۇنان بايگەدە» الماتى وبلىسىنان كەلگەن جانقويلىقوۆتار اۋلەتىنىڭ «قاراتوبەلى» جەڭىسكە جەتتى. شاباندوز - وتەگەن ايتبەك. ءبىرىنشى ورىن ءۇشىن ولار 1 ميلليون تەڭگە اقشالاي سىيلىق يەلەندى.
ەكىنشى ورىن مەن 500 مىڭ تەڭگەنى قىزىلوردالىق يگەنبايەۆ دانەلدىڭ «ەلىك» اتتى تۇلپارى جەڭىپ الدى. شاباندوز - ەميل يگەنبايەۆ. ال ءۇشىنشى ورىنعا لايىق دەپ تانىلعان «الاتاۋ» سايگۇلىگىنىڭ يەسى الماتىلىق ايبەك باحىتبەككە 300 مىڭ تەڭگە بەرىلدى. شاباندوز - ەلشات بايمۇحانوۆ.
«توق بايگەدە» ءبىرىنشى ورىن مەن 1,5 ميلليون تەڭگە اقشالاي سىيلىققا شيەلى اۋدانىنان كەلگەن مايلىبايەۆتار وتباسىنىڭ «پاتشا» تۇلپارى لايىق دەپ تانىلدى. ەكىنشى ورىن مەن 1 ميلليون تەڭگەنى استانالىق نۇرداۋلەت ميراستىڭ «شايكۇرەڭى» جەڭىپ الدى. ءۇشىنشى ورىندى يەلەنگەن جانقويلىقوۆتار وتباسىنىڭ «التىنقوزىسىنا» 500 مىڭ تەڭگە اقشالاي سىيلىق تابىستالدى.
«الامان بايگە» - سايىستىڭ ەڭ كۇردەلى ءتۇرى، شارت بويىنشا 25 شاقىرىم قاشىقتىقتى باعىندىرۋ كەرەك. «الامان بايگەدە» تالدىقورعاندىق جەڭىس سمايىلوۆتىڭ «باقتورىسىن» تىزگىندەگەن اقجول جۇماتاي ۇزدىك شاباندوز دەپ تانىلدى. جەڭىمپازعا جول تالعامايتىن كولىك كىلتى تابىستالدى. ال ەكىنشى ورىن تارازدىق مەلەبەك نۇرداۋلەتكە بۇيىردى. «باتىر» اتتى تۇلپاردىڭ يەسى - اسقار ولجابايەۆ. ءۇشىنشى ورىن مەن 1 ميلليون تەڭگە اقشالاي سىيلىق شىعىس قازاقستاندىق ەرلان سۇلەيمەنوۆتىڭ «ميراد» تۇلپارىن تىزگىندەگەن نۇرلان جاقسىلىققا بۇيىردى. ءتورتىنشى ورىن ءۇشىن 500 مىڭ تەڭگەنى الماتىلىق سەرىك باقيەۆتىڭ «نۇرتورىسى» يەلەندى. شاباندوز - ارنۇر قۇرمانجان.
