سولتۇستىك قازاقستاندا جول تالعامايتىن كولىكتەر جارىستى - فوتو

پەتروپاۆل. قازاقپارات - پەتروپاۆل ماڭىندا اۋەسقوي جانە كاسىبيلەر اراسىندا ەكسترەمالدى كولىك جارىسى ءوتتى.

«ساز- بالشىقتاعى جارىس - 2016» سايىسىنا پەتروپاۆل مەن كوكشەتاۋ جۇرگىزۋشىلەرى قاتىستى. 12 ماشينانىڭ اراسىندا ۋازيك پەن نيۆالار بولدى. ولار 2 شاقىرىمدىق سازدى- بالشىقتى قاشىقتىقتى ەڭسەردى. جول تاڭدامايتىن كولىكتەر ءبىر باعداردا 5 اينالىم جاسادى.

 

«4x4 دوڭگەلەكتى اۆتوموبيلدەر ەكى ساناتقا ءبولىنىپ كەدەرگىلەردى ەڭسەردى. ەڭ الدىمەن «ستاندارت» كولىكتەر، ياعني اۋەسقوي تر-1 فورماتىندا جارىستى. كەلەسى جارىستا تر-2 نۇسقاسىندا كاسىبي جۇرگىزۋشىلەر سايىستى»، - دەدى جارىستى ۇيىمداستىرۋشى الەكساندر گرادۆول.

العاشقى سايىستا بارلىق كولىك جولدىڭ ءار جەرىندە باتىپ قالدى. اۋەسقوي جۇرگىزۋشىلەر باتپاقتى جەرلەردەن ەركىن وتۋگە تاجىريبەلەرى كەمشىن بولىپ شىقتى. كەلەسى سايىستى وتكىزۋ ءۇشىن ولاردى سازدان شىعارۋعا ءبىر ساعات ۋاقىت كەتتى.

 

جۇرگىزۋشىلەر ۇزدىك اتانۋ ءۇشىن ءتورت ساعاتىن جۇمسادى. جارىس سوڭىندا كاسىپقويلار اراسىنان ۆاسيليي دجيمما جەڭىمپاز اتاندى. ەكىنشى بولىپ مارەگە ەۆگەنيي كاراسёۆ جەتتى. ءۇشىنشى ورىندى ەۆگەنيي استاشوۆ پەن الەكسەي ۆولكوۆ ءبولىستى.

اۋەسقويلار اراسىندا تر-1 نۇسقاسى بويىنشا مارەگە ءبىرىنشى بولىپ ولەگ تيۋكوۆ جەتتى. ەكىنشى ورىندا كوكشەتاۋلىق ماكسيم لەونوۆ. ءۇشىنشى بولىپ مۋحورتوۆ اندرەي مارە سىزىعىن كەستى.

 

جارىستى ۇيىمداستىرۋعا «پەتروپاۆلوۆسك 4x4» كلۋبى ات سالىستى. جارىس جولى الدىن الا دايىندالدى. ەكسكاۆاتور كومەگىمەن ۇلكەن جىرالار قازىلدى. بۇل ماڭ باتپاقتى بولعاندىقتان وعان سۋ شىعىندالمادى.

كلۋب جارىستى جىلىنا ءتورت رەت ۇيىمداستىرادى. الايدا ءار جولى وعان باسقا جەرلەر تاڭدالادى.