قىتايدا «ماحابباتتىڭ شەگى جوق» حالىقارالىق جارمەڭكەسى ءوتتى
قازاقستاننىڭ قىتايداعى ەلشىلىگى دە بۇل يگى شاراعا جىل سايىن بەلسەنە قاتىسىپ ءجۇر. ويتكەنى قايىرىمدىلىق - قادىرلى ءىس. بيىل جارمەڭكەدەن تۇسكەن اقشا گۋاڭشي- جۋاڭزۋ اۆتونومدى اۋدانىنداعى مەكتەپتەرگە بەرىلمەك.
جارمەڭكەدە حالقىمىزدىڭ ۇلتتىق تاعامدارى مەن كادەسىيلار ساۋدالاندى. كەلۋشىلەر قازاقتىڭ ءتىل ۇيىرەر قازى- قارتاسى، باۋىرساق پەن پالاۋدان ءدام تاتىپ، تامسانا تاڭداي قاعىستى. وزگە مەملەكەتتەردىڭ وكىلدەرى دە جىلى- جۇمساعىن ساۋداعا شىعارىپ، جينالعان اقشانى قايىرىمدىلىق ەسەپشوتىنا جىبەرەدى.
ەسكە سالا كەتەيىك، «ماحاباتتىڭ شەگى جوق» جارمەڭكەسى 2009 -جىلدان بەرى وتكىزىلىپ كەلەدى. بىلتىر قازاقستان ەلشىلىگى ورتالىق ازيا ەلدەرى اراسىندا ەڭ قوماقتى قاراجات جيناپ بەرگەن بولاتىن. بيىلعى شارادا 13100 يۋان، ياكي 680 مىڭ تەڭگەدەن استام قارجى اۋداردى.
قاناتبەك جۇماباي، جەرگىلىكتى تۇرعىن:
- مىناۋ جارمەڭكەدە ورىن شاعىن بولعانىمەن، قازاقتىڭ بارلىق مادەنيەتى سىيىپ تۇر ەكەن. بىلايشا ايتقاندا، قازاقتىڭ وركەنيەتىن كورسەتە الاتىن، ماسەلەن، اناۋ ويۋ- ورنەكتەر، كىتاپ مادەنيەتى، قازاقتىڭ قازىسى، پالاۋى، قىسقاسى، بارلىق مادەنيەتى كورىنىپ تۇر ەكەن. بۇل وتە تاماشا.
ەلميرا تابۋلوۆا، جارمەڭكەگە قاتىسۋشى:
- ديپلوماتيالىق كورپۋس پەن ۇلتتىق كومپانيالار وكىلدەرى وسى جارمەڭكەگە بەلسەندى تۇردە دايىندالدى. بيىلعى باستى جاڭالىق - سۋرەتتەر سالىنعان بالالار جەيدەسى، ولاردى كەلۋشىلەر جاپپاي ساتىپ الۋدا. سونىمەن بىرگە ۇلتتىق تاعامدار دا جوعارى سۇرانىسقا يە، ونىمدەردى بىرنەشە ساعاتتىڭ ىشىندە تالاپ اكەتتى.
www.24.kz
