ماسكەۋدە قازاقتىڭ ءتىلىن، تاريحىن بىلۋدەن وليمپيادا ءوتتى
وندا رەسەي فەدەراتسياسىنىڭ اۋماعىندا تۇراتىن وتانداستارىمىز قازاق ءتىلىن، قازاقستاننىڭ مادەنيەتى مەن تاريحىن بىلۋدەن سايىسقا ءتۇستى.
وليمپياداعا 14-24 جاس ارالىعىنداعى قازاق ازاماتتارى جانە قازاق ءتىلىن مەڭگەرىپ جۇرگەن رەسەيلىك ستۋدەنتتەر قاتىستى.
زياتكەرلىك سايىستى ق ر تاۋەلسىزدىگىنىڭ 25 جىلدىعىن جانە قازاقستان حالقى تىلدەرى كۇنىن مەرەكەلەۋ اياسىندا رەسەيلىك وڭىرلەردەگى قازاق ۇلتتىق- مادەني بىرلەستىكتەردىڭ قولداۋىمەن قازاقستاننىڭ رەسەيدەگى ەلشىلىگى جانە كونسۋلدىق مەكەمەلەرى ۇيىمداستىردى.
وليمپيادانىڭ اقتىق كەزەڭى ماسكەۋ مەملەكەتتىك لينگۆيستيكالىق ۋنيۆەرسيتەتىندە ءوتتى. جەڭىمپاز جوعارى 128 بالدىڭ 100- ءىن يەلەنگەن ماسكەۋ قالالىق پەداگوگيكالىق ۋنيۆەرسيتەتىنىڭ ستۋدەنتى ينەسسا قۋانوۆا اتاندى. ەكىنشى ورىندى سانكت- پەتەربور ساۋلەت- قۇرىلىس ۋنيۆەرسيتەتىنىڭ ستۋدەنتى نۇرسۇلتان اسىلحان يەلەندى. ءۇشىنشى ورىن ماسكەۋ مەملەكەتتىك لينگۆيستيكالىق ۋنيۆەرسيتەتىنىڭ ستۋدەنتى اناستاسيا رەشەتنيكوۆاعا بۇيىردى.
وليمپيادانىڭ ەڭ جاس قاتىسۋشىسى ماسكەۋ مەكتەبىنىڭ ءۇشىنشى سىنىپ وقۋشىسى تاحير ارشابايەۆ بولدى. ول ارنايى سىيلىقپەن ماراپاتتالدى. ءىس- شارا قازاقستاندىق ستۋدەنتتەردىڭ «شابىت» ەتنو- مۋزىكالىق توبىنىڭ شاعىن كونسەرتىمەن اياقتالدى.
