ىبىراي جاقايەۆ اۋىلىندا كۇرىش ءوسىرۋ تاريحىنا ارنالعان مۇراجاي اشىلدى - فوتو
دەپ حابارلايدى قازاقپارات ايماق باسشىسىنىڭ باسپا ءسوز قىزمەتىنە سىلتەمە جاساپ.
سالتاناتتى شاراعا قىزىلوردا وبلىسىنىڭ اكىمى قىرىمبەك كوشەربايەۆ، سۋ رەسۋرستارى كوميتەتىنىڭ باسشىسى يسلام ابىشيەۆ، سونداي- اق، ق ر پارلامەنتى ءماجىلىسى جانە سەناتىنىڭ دەپۋتاتتارى، مادەنيەت قايراتكەرلەرى جانە رەسپۋبليكانىڭ قۇرمەتتى ازاماتتارى قاتىستى.
شيەلى كەنتىندەگى ىبىراي جاقايەۆ ەسكەرتكىشىنە وبلىس اكىمدىگى مەن ءماسليحاتىنىڭ، وبلىستىق ارداگەرلەر كەڭەسىنىڭ جانە ايماق ديقاندارىنىڭ اتىنان گۇل شوقتارى قويىلدى. سودان سوڭ ىبىراي جاقايەۆ اتىنداعى اۋىلدا كۇرىش ءوسىرۋ تاريحى مۇراجايى اشىلدى. وبلىس اكىمى مۇراجايعا كۇرىش داندەرىنەن جاسالعان كارتينا سىيعا تارتتى. مۇراجاي قورىندا 10 مىڭ ەكسپونات ساقتاۋلى، ونىڭ ىشىندە جاقايەۆتىڭ ءوزى تۇتىنعان زاتتارى مەن جۇمىس قۇرالدارى بار. سونىمەن قاتار شيەلى كەنتىندە قۇرمەتتى ازاماتتار اللەياسى اشىلدى.
«التىن ءدان-2016» سالتاناتتى جيىنىندا وبلىس اكىمى قىرىمبەك كوشەربايەۆ قىزىلوردالىق ديقانداردى تابىستى ەڭبەك جىلىمەن قۇتتىقتادى. سونداي- اق ايماق باسشىسى ق ر ۇ ع ا اكادەميگى، شيەلىنىڭ تۋماسى دوسمۇحاممەد كىشىبەكوۆتى 90 جىلدىعىمەن قۇتتىقتاپ، وعان جەڭىل اۆتوكولىكتىڭ كىلتىن تابىستادى.
مۇنىمەن قوسا، ىبىراي جاقايەۆتىڭ مەرەيتويىنىڭ قۇرمەتىنە رەسپۋبليكالىق اقىندار ايتىسى، قازاق كۇرەسىنەن تۋرنير جانە قازاقستاندىق ەسترادا جۇلدىزدارىنىڭ قاتىسۋىمەن گالا- كونسەرت ءوتتى.
