وسى عاسىردىڭ اقيقاتى

استانا. قازاقپارات - بۇگىن تاڭەرتەڭ بۇرىنعى سۇيىكتىمدى جولىقتىرىپ قالدىم.

كۇيەۋگە شىعىپتى. اياعى اۋىر ەكەن. ءبىز سويلەستىك. سويلەسكەن كەزدە جۇرەگىمنىڭ ءدۇرسىلى بۇكىل الەمگە ەستىلگەندەي الاپات كۇي كەشتىم. وڭاشا قالعانشا اسىقتىم. جالعىز قالعان سوڭ ءوزىمدى تىيا المادىم. كوزىمنەن پارلاپ اققان جاسقا ەرىك بەردىم.

 ءبىز ول ەكەۋمىز 5 جىل بۇرىن ايىرىلىسقانبىز. شەشىمدى بىرگە قابىلدادىق. ول كەزدە كەزدەسىپ جۇرگەنىمىزگە 4 جىل بولعان. ءبىر- ءبىرىمىزسىز تۇرا الماۋشى ەدىك. كۇنىنە 24 ساعات بىرگە جۇرسەكتە، ەش جالىقپايتىنبىز. بىرگە تاماقتانىپ، جۇمىسقا بىرگە بارىپ، كينونى بىرگە تاڭداپ، ۇنەمى اڭگىمەلەسىپ، ەتەنە جاقىن بولىپپىز. ەكەۋىمىزدىڭ جۇرەگىمىز ەگىزدەي كورىنۋشى ەدى. جۇبىمىز ماڭگى جازىلمايتىنداي ەدى.

 ارينە، 4 جىلدىڭ ىشىندە كوپ نارسەنى باستان كەشتىك. ۇرىسىپ تا قالعان كەزدەر، كەشىرىم سۇراپ، تاتۋلاسقان شاقتار بولدى. مەنىڭ ساتسىزدىككە ۇشىرايتىن بارلىق وي- جوبالارىمدى ول قولداپ وتىردى. ءبىزدىڭ الەم مىناۋ دۇنيەدەن بولەك، وقشاۋ ەدى. ءوز عاجابىمىز وزىمىزدە. مەن ونى قالاي قاتتى سۇيسەم، ول مەنى ودان دا قاتتى سۇيەتىنىنە سەنىمىم مول ەدى. ەكەۋىمىز دە ءمىنسىز ادام ەمەس ەدىك، ءبىراق تاتۋ بولدىق، سۇمدىق تاتۋ ەدىك.

 4 جىل وتكەن سوڭ ءبىزدىڭ قارىم- قاتىناسىمىز باسقا باعىتقا اۋىستى. سەزىمىمىز سارقىلدى دەپ شەشتىك. قۇمارلىق قالمادى. ايىرىلىسايىق دەگەن مامىلەگە كەلدىك. ونىڭ سەزىمىنەن بوساپ، جەلكەنىمدى كەرىپ، جاڭا ءومىر باستايمىن دەپ جەلپىنگەنىم ءالى ەسىمدە. ءۇمىتىم زور ەدى. سىڭارىمدى تابۋ قيىنعا سوقپاس، تاڭداۋ كوپ دەپ اسىلىق ويعا بەرىلىپ ەم. نە دەگەن اقىماقتىق دەسەڭشى!

 سودان بەرى 5 جىل ءوتتى. ماعان وسىدان 10-15 جىل بۇرىن مەنىڭ ءومىرىم وسىلاي بولادى دەپ بىرەۋ ايتسا، كۇلەر ەم. قازىرگى كورەتىنىم - وتە سۇلۋ، اقىلدى قىزدار جانە سىمباتتى ءارى قالتالى جىگىتتەر كوبىنە جالعىز. ءبىز ءبىرىنشى سىنىپقا كەلگەندە بۇكىل بالا جاقسى كورەتىن قىز بولعان. ەگەر ماعان سول قىز مەكتەپ بىتىرگەن سوڭ باقىتسىز بوپ قالادى دەسە، ەش سەنبەس ەم. قازىر ول جالعىزباستى انا. ءبىر ءوزى بالاسىن تاربيەلەپ ءجۇر. ول 17-18 جاستا ءوزىنىڭ ءومىرىن باسقاشا ەلەستەتەتىنىن ايتادى. ءبارى ەرەكشە بولادى دەپ كۇتىپتى: كوپ بالالى وتباسى، جەتىستىككە جەتكەن كۇيەۋى، ۇلكەن ءۇي... بۇل ارمان ءار قىزدىڭ ارمانى بولار، بالكىم... ال، ومىردە ءبارى باسقاشا بولعان. قول كوتەرەتىن قىزعانشاق كۇيەۋ، اجىراسۋ، ۇياتتان جۇرداي ەركەكتەر، جاۋاپسىزدىقتىڭ كەسىرى... سۇلۋلىق بايقاۋلارىنا كوپ باراتىنمىن. سول جەردەگى مەنەن بويى كوپ بيىك ارۋلاردىڭ دەنى باقىتسىز، جولى بولماعان بەيباقتار دەسە، سەنبەس ەم. ءوزىم تانىسىپ، كوزىم جەتكەن سوڭ ءتۇسىندىم. ولار باقىتسىز بولسا، باسقالاردىڭ كۇيى نەشىك؟

 مەنىڭ جولداستارىمنىڭ ورتاسىندا جاعدايى ناشار ەشكىم جوق. ءبارى سپورتپەن شۇعىلدانادى. جۇمىس ىستەيدى. بەلسەندى. مادەنيەتتى سۇقباتتاستار. كوبىنىڭ جاسى 22-35 اراسىندا. ءومىر ءسۇرۋ سالتى، قۇندىلىقتارعا دەگەن كوزقاراستارىمىز ءبىزدى بىرىكتىرەدى. ەڭ قىزىعى -  دوستارىمنىڭ تەڭ جارتىسى بويداقتار. ەڭ جامانى -  ولار وسىلاي قالا بەرۋگە بەيىلدى ەكەنىن ءوزىم دە بىلەمىن. بىردە جاقىن دوسىممەن كەزدەسىپ قالدىق. ول دا كەزىندە سۇيىكتىسىن تاستاپ، باسقاسىن تاۋىپ الارمىن دەپ وپىق جەگەن مەن سياقتى اقىماق. مەنىڭ اينالامدا ول جىگىت ەڭ مىقتىسى دەر ەم. ول ماعان جالعىز قالۋدىڭ سەناريىنە ەشقاشان الاڭداماعانىن ايتادى. ايتەۋىر، بىرەۋى كەزدەسەر دەپ سەنىپتى. ءبىراق قازىر ويى وزگەرىپتى. قازىر جالعىزدىقتان جاقسىسى جوق دەگەن توقتامعا كەلىپتى.

 الەمدى تۇڭعيىققا تارتىپ جاتقان بۇل ءبولىنىس قاشان پايدا بولعانىن ءدوپ باسىپ ايتا الماس ەم. ءبىراق جالعىزدىقتان جاپا شەگەتىندەر قاتارى كۇن وتكەن سايىن كوبەيىپ جاتقانى اقيقات.

قازىر جاسىم 26 دا. مەن كوپ نارسەنى تۇسىنەمىن، بىلەمىن، جاساي الامىن. اقشا تابۋ مەن ءۇشىن قيىن ەمەس. وزگەلەر سىيلاۋ ءۇشىن، باعالاۋ ءۇشىن ءوزىمدى دۇرىس ۇستاي الامىن. كۇلدىرتكىم كەلگەن ادامىمدى كۇلدىرتەم. جىلاتقىم كەلگەندى جىلاتا دا الامىن. كەك ساقتاي دا بىلەم. وزگەنىڭ جەككورۋىنە جول بەرە الام. مەن ءبارىنىڭ ءدامىن كوردىم. ءبىراق قايتىپ ءسۇيۋ ءۇشىن نە ىستەۋ كەرەگىن بىلمەيمىن.

 مەن بىلمەيتىن جالعىز نارسە وسى. كوڭىل- كۇي، جۇرەكتىڭ سىرى، ءدۇرسىلى، سىيقىرى -  نە دەۋگە بولادى؟ بۇل شىنىندا دا تىلسىم. جاراتقاننىڭ عانا قولىنداعى سىي. مەن ءۇشىن قۇداي دەگەن ماحاببات. وسىنداي سەزىمدى جۇرەگىنە قوندىرىپ تۇرىپ قايتىپ ۇشىرىپ العان ادامعا وبال جوق. ءبىر رەت ءسۇيىپ كورگەن سوڭ ماحاببات ەشقايدا قاشپاس دەپ تۇيسىنەمىز. ماحابباتتى جوعالتۋدان ارتىق بەيشارالىق جوق. ەگەر سۇيىكتىڭىز بولا تۇرا، وزگە بىرەۋ ودان جاس، سۇلۋ، اقىلدىراق كورىنسە، مۇنىڭ بارلىعى الدامشى، ۋاقىتشا ەكەنىن ءتۇسىنىڭىز. بۇل سىناق. ماحاببات قانا ماڭگىلىك.

 قۇمارلىق وتى تەز سونەدى، جاس قىز تەز قارتايادى، بۇرىن كەرەك بولعان نارسە قاجەتسىز قالادى، قىزىق كورىنگەن قارابايىر تارتادى، اقىلدىڭ وتى باياۋ بولا باستايدى، تەك ماحاببات قانا ەش وزگەرمەيدى. ماحابباتتىڭ وتى وشپەيدى. وكىندىرۋى مۇمكىن. قولعا ءتۇسىرىپ تۇرىپ، يە بولا الماي قالعانىڭا وكىنۋىڭ مۇمكىن.

 ەگەر ءدال قازىر سۇيىكتىڭ بولسا، ەشقاشان سەزىمنەن باس تارتپا. ءول- ءتىرىل، ماحابباتىڭ ءۇشىن باسىڭدى باسكە تىك! سەنىڭ جۇرەگىڭنەن ورىن الار ءدال مۇنداي ادام ەندى ساعان جوق! باسقالارى كەلەر، كەتەر، ءبىراق باسقا جان- جۇرەگىڭدى سۇيىكتىڭ سياقتى ەستي الماس، جىلىتا الماس. جۇلدىزدار سايكەس كەلمەس. سوندىقتان باسىڭىزعا قونعان باق قۇسىڭىزدى ۇشىرىپ الماڭىز. ۇشىرىپ الساڭىز، ءومىر بويى وكىنىپ، وپىنىپ وتەسىز. جالعىزدىق جاقسى سەرىك ەمەس.

 جالعىزدىقتىڭ قانداي بولاتىنىن بىلگىڭىز كەلە مە؟ وندا تىڭداڭىز. تىڭداپ الىڭىز دا، مۇندا كەلمەۋگە تىرىسىڭىز. مۇندا ماحابباتتى تاستاي قاشارلىق ەشتەڭە جوق. 5 جىل ىشىندە ادام سياقتى سويلەسە الاتىن قىز كورسەم، قۋاناتىن بولدىم. ادامداردى باعالاۋدى ۇيرەندىم. اسىرەسە، ءوز ويى- پىكىرىن تايساقتاماي ايتاتىن، ءوز ماقساتىن بىلەتىن ادامداردى كورۋگە قۋاناسىڭ. بۇل سيرەك قۇبىلىس ەكەنىن سەزىنىپ ءجۇرمىن. قاراپايىم ادام بولۋدىڭ ءوزى ۇسىنسا قول جەتپەيتىن باقىت بولا باستاپتى. سۇيگەن ادامىڭا قاتىستى سىيلاستىق، مەيىرىم، شىنايىلىق، شىنشىلدىق -  جالعىزدىق الەمىندە مۇلدە جوق. ماحابباتتا باسقاشا بولۋ مۇمكىن ەمەس. ال، جالعىزدىق -  ءتىرى قالۋدىڭ كۇندەلىكتى تىرباڭى. مۇندا ءبارى سۇلۋ. ءبارى اقىلدى. 5 جىل بۇرىن كوز الداعان دۇنيەنىڭ ءبارى جالعان ەكەنىن ءتۇسىندىم. كەسىرلى، ۋلى، ماعىناسىز، پايداسىز.

 ال، جالپى مەن وتە باقىتتى اداممىن. ويتكەنى، كەزىندە مەن ءسۇيدىم. شىن ءسۇيدىم. شىن باقىتتى بولىپپىن. نەگە بولدىم؟ قازىر دە سول سەزىمىم ءۇشىن باقىتتىمىن. سىزدەرگە دە شىن ماحابباتتى تىلەيمىن. ۋىسىڭىزدان شىعارىپ الماڭىز.

 P. S.

 بۇل جازبا مەن ءۇشىن ەڭ لايىقسىز، ماعان ءتان ەمەس پىكىر بولدى. ءبىراق شىن ويىممەن بولىسكىم كەلدى. ءسىز دە ءبولىسىپ قويىڭىز. ءبىر-ءبىرىن سۇيەتىن ادامدار وقىسا -  جاقسى بولار ەدى. ءبىر-ءبىرىن جوعالتقاندار وقىسا، قايتا تابىسار؟! ءبىر-ءبىرىن تاپپاعاندار، ءبىلىپ جۇرەتىن بولادى. سۇيگەنىن تاپقان ادامداردىڭ ويلانباي اقىماقتىققا ۇرىنۋىنان ساقتاعىم كەلەدى. مۇمكىن بولسا، ارينە...

يليا پيسكۋلين

اۋدارعان شىنار ءابىلدا