دەنساۋلىق مينيسترلىگى ايەلدەردىڭ جۇمىس كۇنىن قىسقارتۋ ۇسىنىسىنا پىكىر ءبىلدىردى
«ارينە، زاڭنامادا مۇنداي ەرەجەلەر جوق جانە وزگەرىستەر ەنگىزۋ ازىرگە قاراستىرىلماعان. سەبەبى ەڭبەك كودەكسىندە ايەلدەرگە جانە ەرلەرگە قاتىستى ەشبىر كەمسىتۋشىلىك جوق. بارلىعى تەڭ دارەجەدە. ارينە، ءبىز مۇنداي ۇسىنىستاردى قاراستىرۋعا ءاردايىم دايىنبىز. ءبىراق وزگەرىستەردى ەنگىزەتىنىمىزگە ۋادە ەتپەيمىز. ەگەر بۇل ۇسىنىس زاڭ شەڭبەرىندە بولسا، بارلىعىنا تالداۋ جۇرگىزەتىن بولامىز»، - دەپ اتاپ ءوتتى مينيسترلىكتىڭ ەڭبەك جانە الەۋمەتتىك سەرىكستەستىك دەپارتامەنتىنىڭ ديرەكتورى ءمادينا ناۋرىزبەك.
بۇل رەتتە، ول قىسقارتىلعان جۇمىس كۇنى قاراستىرىلعان ماماندىقتاردىڭ ءتىزىمى تۋرالى ءمينيستردىڭ بۇيرىعى بارىن ايتىپ ءوتتى. ءبىراق ولار جىنىستىق ەرەكشەلىكتەر بويىنشا بولىنبەگەن.
ەسكە سالايىق، مۇنداي ۇسىنىستى قازاقستان كوممۋنيستىك حالىق پارتياسىنىڭ استانا قالالىق كوميتەتىنىڭ ءبىرىنشى حاتشىسى مارات اۋباكىروۆ جاساعان بولاتىن. ول ايەلدەر كوبىنە مەديتسينا، ءبىلىم بەرۋ سالالارىندا ەڭبەك ەتەتىنىن اتاپ ءوتتى. ءبىراق ونىڭ پىكىرىنشە، بۇل جۇيەلەردە جالاقى تومەن.
«سوندىقتان، ايەلدەر اقشا تابۋ ءۇشىن كوبىرەك جۇمىس ىستەۋگە ءماجبۇر. ولاردا بالالاردىڭ، وسكەلەڭ ۇرپاقتىڭ تاربيەسىنە ۋاقىت قالمايدى. كەيبىر باستاماشىلار ايەلدەر تۇستەن كەيىن بالالار تاربيەسىمەن اينالىسۋ ءۇشىن، ولارعا تۇسكە دەيىنگى جۇمىس كۇنىن ۇسىنۋ تۋرالى ايتۋدا. مۇمكىن ونى قاراستىرۋعا بولاتىن شىعار»، - دەدى ول.
