استاناداعى ەكى باسقارمانىڭ باسشىسى جازالانۋى مۇمكىن

استانا. قازاقپارات - استانا قالاسىنىڭ جەر قاتىناستارى مەن تۇرعىن- ءۇي باسقارمالارىنىڭ جەتەكشىلەرى تارتىپتىك جازاعا تارتىلۋى مۇمكىن.

سەبەبى اتالعان ەكى ورگاندا جەمقورلىق ارەكەتتەرگە سەبەپ بولاتىن جاسىرىن مەملەكەتتىك قىزمەتتەر كورسەتىلەدى، دەپ حابارلايدى قازاقپارات ءتىلشىسى.

ق ر مەملەكەتتىك قىزمەتى ىستەرى جانە سىبايلاسجەمقورلىققا قارسى كۇرەس اگەنتتىگىنىڭ استانا قالاسى بويىنشا دەپارتامەنتىنىڭ جەتەكشىسى رومان كيمنىڭ ايتۋىنشا، وسى ۋاقىتقا دەيىن اكىمدىككە قاراستى 15مەملەكەتتىك ورگاننىڭ جۇمىسىنا مونيتورينگ جاسالىپ، جەمقورلىقتى جويۋ بويىنشا ەسكەرتۋلەر جاسالدى. التى ايدىڭ ىشىندە ولاردىڭ تاراپىنان ءتيىستى شارالار قولعا الىنۋى شارت.

دەگەنمەن، ەكى باسقارما جەمقورلىققا قاتىستى ەسكەرتۋلەردى ەسكەرگەن دە جوق.

«ولاردىڭ ىشىندە جەر قاتىناستارى باسقارماسى مەن تۇرعىن- ءۇي باسقارماسى بار. ماسەلەن، جەر قاتىناستارى باسقارماسىندا ءتورت جاسىرىن مەملەكەتتىك قىزمەتتەر انىقتالدى. ال تۇرعىن- ءۇي باسقارماسىندا ءبىر جاسىرىن قىزمەت بار بولىپ شىقتى. ال «جاسىرىن مەملەكەتتىك قىزمەت» دەگەن نە؟ ول ءتۇر- تۇرپاتى جاعىنان مەملەكەتتىك قىزمەتكە جاتسا دا، مەملەكەتتىك قىزمەتتەردىڭ رەەسترىنە كىرمەيدى. بۇل دەگەنىمىز، وعان قاتىستى ستاندارت تا جوق، رەگلامەنت تە بەلگىلەنبەگەن دەگەن ءسوز.

دەمەك، ونداي مەملەكەتتىك قىزمەتتى كورسەتۋگە زاڭنامالىق نەگىز جوق. مىنە، ءدال وسىنداي جاسىرىن قىزمەتتەر جەمقورلىق ارەكەتتەرگە جول اشادى. وسى ورايدا ايتا كەتەيىن، جاقىن ارادا ءبىز وسى ماتەريالداردى ەتيكا بويىنشا ارنايى كەڭەستىڭ تالقىسىنا شىعارىپ، اتالعان ەكى باسقارمانىڭ باستىعىن تارتىپتىك جازاعا تارتۋ ماسەلەسىن كوتەرەتىن بولامىز»، - دەدى ر. كيم بۇگىن استانادا وتكەن جيىنداردىڭ بىرىندە.

ارمان اسقاروۆ