ورالدا قۇرمانعازى مەن دينانىڭ ەسكەرتكىشى اشىلدى

ورال. قازاقپارات - بۇگىن ورال قالاسىندا قۇرمانعازى مەن دينا نۇرپەيىسوۆا اتىنداعى كوشەلەردىڭ قيىلىسىنداعى الاڭدا قوس كۇيشىگە ورناتىلعان ەسكەرتكىش سالتاناتتى تۇردە اشىلدى.

شاراعا قاتىسقان باتىس قازاقستان وبلىسىنىڭ اكىمى التاي كولگىنوۆتىڭ اتاپ وتكەنىندەي، وسىناۋ ەڭسەلى ەسكەرتكىشتىڭ اشىلۋىن تاريحي وقيعا دەۋگە بولادى. «ەكى ىشەكتىڭ ءبىرىن قاتتى، ءبىرىن ءسال- ءپال كەم بۇرا، قازاق - ناعىز قازاق ەمەس، ناعىز قازاق دومبىرا» دەپ، قادىر اعامىزدىڭ ايتقانىنداي، دومبىرا قازاقتىڭ جان- جۇرەگى ىسپەتتەس.

ۇلان- عايىر دالادان شىققان ۇلى تۇلعالار از بولعان جوق. مىنە، بۇگىن كۇي اتاسى قۇرمانعازى مەن ديناعا ەسكەرتكىش اشىپ وتىرمىز. بۇل جايدان- جاي ەمەس. بيىل كۇي اناسى دينا نۇرپەيىسوۆانىڭ تۋعانىنا 155 جىل تولدى. وسىعان وراي زيالى قاۋىم وكىلدەرىمەن اقىلداسا كەلە، دينا قۇرمانعازىنىڭ شاكىرتى بولعاندىقتان، ەكەۋىنە ءبىر كومپوزيتسيا قويۋدى ۇيعاردىق. ونىڭ ۇستىنە قوس كۇيشى اتىنداعى كوشەلەردىڭ قيىلىسىندا ورىن تەپكەنى ءجون دەپ شەشىلدى. دالا دانىشپاندارى قۇرمانعازى دا، دينا دا ءوز كۇيلەرىندە ەلىمىزدىڭ ازاتتىعىن اڭسادى. بۇل ەركىندىككە ولاردىڭ ۇرپاقتارى جەتىپ وتىر. وسىناۋ ويىمىزدىڭ تاۋەلسىزدىكتىڭ 25 -جىلدىعى قارساڭىندا جۇزەگە اسقانى ايرىقشا قۋانىش ۇستەيدى»، - دەدى ءوڭىر باسشىسى.

 

مەرەيلى شاراعا ارنايى كەلگەن مارتەبەلى مەيمانداردىڭ ءبىرى، بەلگىلى كۇيشى، قازاقستاننىڭ ەڭبەك سىڭىرگەن قايراتكەرى ايتجان توقتاعاننىڭ ايتۋىنشا، كۇي - تەك قازاق حالقىنا ءتان قاسيەتتى ونەر. «ەندەشە، كۇي اتاسى مەن اناسىنىڭ ەكەۋىنە قاتار ەسكەرتكىشتىڭ قويىلۋى - قازاق مادەني ومىرىندەگى ايتۋلى وقيعا. وسى كۇي ونەرى ارقىلى قازاقتى بۇكىل الەم تانىدى دەسەك، ارتىق ايتقاندىق ەمەس. قۇرمانعازى اتىنداعى وركەستر امەريكاعا بارىپ، كونسەرت قويىپ، «اداي»، «سارى ارقا» سىندى كۇيلەردى ورىنداعاننان كەيىن سونى كورىپ، تىڭداعان ءبىر كونگرەسسمەننىڭ «پەيىشتىڭ مۋزىكاسىن ەستىگەندەي بولدىم» دەگەن ءسوزىن ەستىگەنىم بار. بۇدان ارتىق قانداي باعا كەرەك. مىنەكەي، اتتىڭ جالىندا، اتاننىڭ قومىندا بۇگىنگە جەتكەن كۇيىمىز ءوزىنىڭ قۇدىرەت- كۇشىمەن الەمدى وسىلايشا تاڭعالدىرىپ كەلەدى»، - دەدى ا. توقتاعان.

ب ق و تاريحي- مادەني ەسكەرتكىشتەردى قورعاۋ مەملەكەتتىك ينسپەكسياسىنىڭ باسشىسى تالعات جۇسىپقاليەۆتىڭ سوزىنە قاراعاندا، ەسكەرتكىش اۆتورى - رەسپۋبليكاعا تانىمال ءمۇسىنشى، ق ر سۋرەتشىلەر وداعىنىڭ مۇشەسى مۇرات مانسۇروۆ. الماتىداعى «تاۋەلسىزدىك»، استاناداعى «قازاق ەلى»، «كەرەي مەن جانىبەك» سىندى مونۋمەنتتەردى سالۋعا قاتىسقان، ەلىمىزدەگى كوپتەگەن ەسكەرتكىشتەردىڭ اۆتورى. الدىمەن رەسپۋبليكالىق كونكۋرس جاريالانىپ، سونىڭ ناتيجەسىندە ۇزدىك جۇمىستار ق ر مادەنيەت جانە سپورت مينيسترلىگى جانىنداعى مەملەكەتتىك كوميسسياعا جىبەرىلىپ، سوندا مۇرات مانسۇروۆتىڭ جوباسى وزىق دەپ تانىلدى. بيىلعى مامىر ايىندا باستالعان جۇمىس ءۇش ايدا ءبىتتى. استاناداعى كوركەمونەر كومبيناتىندا قۇيىلعان ەسكەرتكىشتىڭ جالپى سالماعى بەس تونناداي. وعان 67 ميلليون تەڭگەدەي قارجى جۇمسالدى.

 

«بۇگىن ءبارىمىز ءۇشىن ەرەكشە كۇن بولدى، سونىڭ ىشىندە قۇرمانعازى اتىنداعى وركەستر بۇكىل ۇجىم بولىپ قۋانىپ جاتىر. مۇنداي ەسكەرتكىش، اسىرەسە، بابالارىنىڭ قانداي بولعانىن تانىپ- ءبىلۋ ءۇشىن كەيىنگى جاس ۇرپاققا كەرەك. ءبىز باتىس قازاقستان وبلىسى اكىمدىگىنىڭ ارنايى شاقىرۋىمەن وسى شاراعا كەلىپ وتىرمىز. كۇي اتاسىنا قاي قالادا ەسكەرتكىش اشىلسا دا، قۇرمانعازى اتىنداعى وركەستر سونى قولداپ، ءوز ونەرىن كورسەتۋدەن تانعان ەمەس. بۇگىن دە اتىراۋ وبلىسىنداعى دينا نۇرپەيىسوۆا اتىنداعى جانە باتىس قازاقستانداعى داۋلەتكەرەي اتىنداعى قازاق حالىق اسپاپتار وركەسترلەرىمەن بىرلەسىپ، «كۇي دۇلدۇلدەرىنىڭ ءدۇبىرى» اتتى ارنايى كونسەرت قويماقشىمىز. وندا قۇرمانعازى، دينا، داۋلەتكەرەي جانە باسقا كومپوزيتورلاردىڭ تۋىندىلارى ورىندالادى»، دەدى قازاقپارات تىلشىسىنە قۇرمانعازى اتىنداعى قازاق مەملەكەتتىك اكادەميالىق وركەسترىنىڭ ديرەكتورى نۇرعيسا داۋەشوۆ.

ايتا كەتەيىك، ەسكەرتكىشتىڭ اشىلۋ راسىمىنە دينا ۇرپاقتارىنىڭ ءبىرى باعيلا بيشايەۆا قاتىستى.

 

 

 

 

اۆتور: ەلجان ەرالى