سولتۇستىك قازاقستان وبلىسىندا قانت، ەت، ءسۇت زاۋىتتارى سالىنىپ جاتىر
بۇل تۋرالى بۇگىن استانادا ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا سولتۇستىك قازاقستان وبلىسى اكىمىنىڭ ءبىرىنشى ورىنباسارى ايداربەك ساپاروۆ ءمالىم ەتتى.
ونىڭ ايتۋىنشا، وڭىردە مال شارۋاشىلىعى ۇلكەن قارقىنمەن دامي باستادى. اۋىل شارۋاشىلىق تاۋاروندىرۋشىلەرى ءىرى قارا ءوسىرۋدىڭ تيىمدىلىگىن جوعارى باعالاۋدا.
«بۇل سالا اۋىلدىق جەرلەردە جىل بويى جۇمىسپەن قامتۋعا مۇمكىندىك بەرەدى. سوندىقتان ءبىز بۇل باعىتقا ۇلكەن ماڭىز بەرىپ وتىرمىز. ەت جانە ەت ونىمدەرىنىڭ ەكسپورتتىق الەۋەتىن دامىتۋ باعدارلاماسى ءوز جەمىسىن بەردى. 2011 -جىلدان بەرى الىس جانە جاقىن شەت مەملەكەتتەرىنەن 11 مىڭنان استام اسىل تۇقىمدى ءىرى قارا اكەلدىك. ولار انگۋس، گەرەفورد، سەمەنتاۋ جانە ليمۋزين تۇقىمداس سيىرلار. 40-قا تارتا اسىل تۇقىمدى مال باسىن كوبەيتەتىن رەپرودۋكتورلار قۇرىلدى. قازىرگى ۋاقىتتا اسىل تۇقىمدى انالىق باس سيىرلار جەرگىلىكتى شارۋاشىلىقتارعا دا تاراتىلۋدا. وبلىستا 14 ءىرى ءسۇت كەشەنى جۇمىس ىستەيدى»، - دەپ اتاپ ءوتتى ا. ساپاروۆ.
سونىمەن قاتار، اكىم ورىنباسارىنىڭ سوزىنە قاراعاندا، اۋىل شارۋاشىلىق ونىمدەرىن وڭدەۋگە دە ۇلكەن ءمان بەرىلىپ كەلەدى.
«بۇگىندە وبلىسىمىزدا 154 وڭدەۋشى كاسىپورىن بار. وڭىردە اۋىل شارۋاشىلىق ونىمدەرىن وڭدەۋدىڭ ارنايى كارتاسى جاسالدى. ونىڭ اياسىندا جالپى سوماسى 191 ميلليارد تەڭگەگە 62 ينۆەستيتسيالىق جوبا جۇزەگە اسىرىلۋدا. بۇلار نەگىزىنەن ەت پەن ءسۇت وڭدەۋ، ۇن جانە ماكارون ونىمدەرىن جاساۋ، سونىمەن قاتار مايلى داقىلداردى وڭدەۋ جوبالارى. كارتانىڭ 9 جوباسى ەنگىزىلدى»، - دەدى ا. ساپاروۆ.
ونىڭ ۇستىنە شەتەل ينۆەستيتسيالارى تاراپىنان دا ۇلكەن جۇمىستار ىستەلۋدە. مىسالى، وڭىردە 500 جاڭا جۇمىس ورنىن اشاتىن، قۇنى 19 ميلليارد تەڭگەلىك مايلى داقىلداردى وڭدەۋ جوباسى ىسكە قوسىلماق. نىسان تاۋەلسىزدىكتىڭ 25 جىلدىعى قارساڭىندا پايدالانۋعا بەرىلەدى. اتالمىش كومپانيا قازاقستاندىق تاراپپەن بىرلەسە وتىرىپ، اگروونەركاسىپتىك پارك قۇرادى. وندا ءداندى داقىلداردى تەرەڭ وڭدەۋ ءوندىرىسى، ەت كومبيناتى، ءسۇت زاۋىتى، بىرىكتىرىلگەن جەم تۇرلەرىن شىعارۋ زاۋىتى سالىنادى.
«ونىڭ سىرتىندا، وبلىستا قانت زاۋىتى سالىناتىندىعىن جەكە ايتا كەتۋگە بولادى. نىسان كەلەسى جىلى پايدالانۋعا بەرىلەدى. ءبىز قانت قىزىلشاسىن وتىرعىزىپ كوردىك. ورتاشا ونىمدىلىگى گەكتارىنا 50 توننا. قۇرامىنداعى قانتى 23 پايىز»، - دەيدى س ق و اكىمىنىڭ ءبىرىنشى ورىنباسارى.
اۆتور: جاسۇلان جولدىبايەۆ
