قازاقستان لاڭكەستەرمەن كۇرەستە ءارقاشان بىزبەن بىرگە بولاتىنىنا سەنەمىز - تۇركيا سىرتقى ىستەر ءمينيسترى

الماتى. قازاقپارات - كەشە الماتىدا وتكەن قازاقستان- تۇركيا سىرتقى ىستەر مينيسترلەرىنىڭ جەتەكشىلىگىندەگى ستراتەگيالىق جوسپارلاۋ جونىندەگى بىرلەسكەن توپ وتىرىسىنان كەيىنگى بريفينگتە تۇركيا سىرتقى ىستەر ءمينيسترى ميەۆليۋد چاۆۋشوعلى تۇركيادا مەملەكەتتىك توڭكەرىس جاساماق بولعان اسكەريلەر وقيعاسىنان كەيىن قازاقستان ءبىرىنشى بولىپ قولداۋ تانىتقانىن تىلگە تيەك ەتىپ، ن. نازاربايەۆقا العىسىن ءبىلدىردى، دەپ حابارلادى قازاقپارات.

  «ءبىز قازاقستاننىڭ ايماقتىق، حالىقارالىق قاتىناستارداعى جۇمىستارىن كورىپ وتىرمىز. ءبىز قازاقستاننىڭ وسى باعىتتاعى باستامالارىنا ءارقاشان قولداۋ تانىتاتىن بولامىز. 2016 - جىلدىڭ 15 - شىلدەسىندە ەلىمىزدە مەملەكەتتىك توڭكەرىس جاساماق بولعانداردىڭ وقيعاسىنان كەيىن قازاقستان ءبىرىنشى بولىپ بىزگە قولداۋ كورسەتتى. نۇرسۇلتان نازاربايەۆتىڭ وقيعادان كەيىن ءبىرىنشى بولىپ ەلىمىزگە كەلگەنىن ايتا كەتۋ كەرەك. وقيعادان كەيىن پرەزيدەنت ن. نازاربايەۆ تۇركيا پرەزيدەنتىنە تەلەفون سوعىپ قولداۋ ءبىلدىردى، ارىپتەسىم ەرلان ىدىرىسوۆ تا بىردەن تەلەفون ارقىلى ماعان حابارلاستى. قازاقستان لاڭكەستەرمەن كۇرستە ءارقاشان بىزبەن بىرگە بولاتىنىنا سەنەمىز»، - دەدى م. چاۆۋشوعلى.

بريفينگتە «انادولۋ» اگەنتتىگىنىڭ جۋرناليستەرى قازاقستان سىرتقى ىستەر ءمينيسترى ەرلان ىدىرىسوۆتان جازدا تۇركيادا بولعان اسكەريلەر توڭكەرىسىنەن سوڭ قازاقستاننىڭ قانداي ءىس- شارالاردى جۇزەگە اسىرىپ جاتقانىن سۇرادى.

بۇل سۇراققا قازاقستان سىرتقى ساياسات ۆەدومستۆوسىنىڭ باسشىسى لاڭكەستىك ۇيىممەن كۇرەستەگى تۇركيا ۇكىمەتىنىڭ ارەكەتىن ءارقاشان قولدايتىنىن ايتتى.

«ءبىز ءبىرىنشىدىن، لاڭكەستىك ۇيىممەن كۇرەستەگى تۇركيا ۇكىمەتىنىڭ ارەكەتىن ءارقاشان قولدايمىز. اتالعان ماسەلە ەكى ەل پرەزيدەنتتەرى دەڭگەيىندە تالقىلاندى. قازاقستان مەن تۇركيانىڭ جۇمىس توبىن قۇردىق، جاقىندا تۇرىك دەلەگاتسياسى قازاقستاندا بولدى. جۇمىس توبى ءبىزدىڭ ءبىلىم سالاسىنداعى ىنتىماقتاستىق جانە قازاق- تۇرىك بيزنەسىنىڭ ىقپالداستىعىن تالقىلادى»، - دەپ جاۋاپ بەردى ەرلان ىدىرىسوۆ.

اۆتور: الماس مۇقاش ۇلى