باۋىرجان بايبەك الماتىنى دۋبايعا تەڭەدى

الماتى. قازاقپارات - الماتى اكىمى باۋىرجان بايبەك قالانىڭ ىسكەرلىك كەڭەسىندە ءسوز سويلەگەن كەزدە الماتىنى دۋبايمەن سالىستىردى، دەپ حابارلادى قازاقپارات.

«الماتى - وڭىرلىك ماگنيت، مۇنى جان باسىنا شاققانداعى تابىس، ساۋدا، قۇرىلىس، قىزمەتتەر، سەرۆيس، بانك، ساقتاندىرۋ قىزمەتتەرى سياقتى كوپتەگەن پارامەترلەر بويىنشا ايتۋعا تولىق قۇقىمىز بار. الماتى - وڭىرلىك دۋباي. ول سولاي بولىپ قالىپتاستى»، - دەدى باۋىرجان بايبەك.

اكىم ەكونوميكا ادام كاپيتالىنان قالىپتاساتىنىن اتاپ ءوتتى. ونىڭ ايتۋىنشا، قازىر 86 پايىزى ساۋدا مەن قىزمەت بولاتىن جەرگىلىكتى ەكونوميكا قۇرىلىمىن ەسەپكە الىپ جۇمىسسىزداردى تومەندەتۋ بويىنشا ارنايى باعدارلاما ازىرلەنۋدە.

باعدارلاما جۇمىسسىزدار مەن ءوزىن- ءوزى جۇمىسپەن قامتىعان قالالىقتاردى تۋريستىك سالا مەن جاڭا تاۋاشاداعى سەرۆيستەرگە سۇرانىسقا يە ماماندىقتارعا وقىتۋعا باعىتتالعان.

«بۇگىن «دامۋ» قورىمەن ءبىز تۋريزم، يننوۆاتسيا جانە تاعام ونەركاسىبى سالاسىنداعى شوب قولداۋدىڭ وڭىرلىك باعدارلاماسىن ىسكە اسىرۋ بويىنشا مەموراندۋمعا قول قويامىز. وسى باعدارلاما اياسىندا ءبىز «ستارتاپ الماتى» باعدارلاماسىن ىسكە اسىرۋدى باستايتىنىمىزدى حابارلايمىز. وندا بولىنگەن قاراجاتتىڭ كەم دەگەندە 25 پايىزى «ستارتاپتاردى» قارجىلاندىرۋعا باعىتتالعان»، - دەدى بايبەك.