07:45, 21 - قازان 2016 | GMT +5
استانا اكىمدىگى الەۋمەتتىك ءالسىز جاندارعا كومىر الۋعا كومەكتەسەدى
استانا. قازاقپارات - ەلوردانىڭ جۇمىسپەن قامتۋ، ەڭبەك جانە الەۋمەتتىك قورعاۋ باسقارماسىنىڭ اقپاراتىنا سايكەس، پەشپەن جىلىتىلاتىن جەكە ۇيلەردە تۇراتىن جاسى بويىنشا زەينەتكەرلەر، مۇمكىندىكتەرى شەكتەۋلى ەرەسەكتەر جانە بالالار وتىندى ساتىپ الۋدا كومەك الا الادى،
دەپ حابارلايدى قازاقپارات قالا اكىمىنىڭ باسپا ءسوز قىزمەتىنە سىلتەمە جاساپ.
ماڭىزدى تالاپ: اتالعان ادامدار ساناتى تۇرعىن ءۇيدىڭ مەنشىك يەسى بولۋى ءتيىس جانە ونىڭ باسقا تۇرعىن ءۇيى بولماۋى شارت. سونداي- اق، وتباسىنىڭ جان باسىنا شاققانداعى ورتاشا تابىسى 3 ەسەلەنگەن ەڭ تومەنگى كۇنكورىس دەڭگەيىنەن نەمەسە 81318 تەڭگەدەن اسپاۋى قاجەت. وتەماقى ءبىر جىلىتۋ ماۋسىمىنا 8 ايلىق ەسەپتىك كورسەتكىش (16968 تەڭگە) كولەمىندە تولەنەدى. ەگەر قاتتى وتىندى ساتىپ الۋعا وتەماقى الۋعا قۇقىعى بار بىرنەشە ادام ءبىر جەكەمەنشىك تۇرعىن ۇيدە تۇرعان جاعدايدا، وتەماقى تەك قانا بىرەۋىنە بەرىلەدى.
الەۋمەتتىك كومەك الۋ ءۇشىن ءوتىنىش بەرۋشى جىلىتۋ ماۋسىمى كەزەڭىندە استانا قالاسىنىڭ جۇمىسپەن قامتۋ، ەڭبەك جانە الەۋمەتتىك قورعاۋ باسقارماسىنا جۇگىنۋى قاجەت.
