جۇمىستان شىعىپ قالعان قىزىلوردالىق جىلىجاي اشىپ، بيزنەسىن دوڭگەلەتۋدە

قىزىلوردا. قازاقپارات - « قىزىلوردا شاعىن بيزنەس» باعدارلاماسى بويىنشا جەڭىلدەتىلگەن نەسيە العان اۋىل تۇرعىنى وسى كۇنى كوكونىس وسىرۋمەن اينالىسۋدا،

دەپ حابارلايدى قازاقپارات وبلىستىق كاسىپكەرلەر پالاتاسىنا سىلتەمە جاساپ.

ەلباسى ءوزىنىڭ جولداۋىندا ازىق- تۇلىك قاۋىپسىزدىگى باعدارلاماسىن ىسكە اسىرۋدى مىندەتتەگەن ەدى. اتالعان باعدارلامانى جۇزەگە اسىرۋ مەحانيزمدەرىنىڭ ءبىرى - نارىقتاعى كوكونىس باعاسىن رەتتەۋ. سوندىقتان جىل سايىن وڭىرلەردە كوكونىس تۇرلەرىنىڭ قولجەتىمدىلىگىن قامتاماسىز ەتۋ ماقساتىندا جىلىجاي جۇيەلەرى قايتا قولعا الىنۋدا.

جىلىجاي كاسىبىن قارماقشى اۋدانىنىڭ كاسىپكەرلەرى دە قولعا الدى. جامىتبەك ءتورتۇلوۆ قارماقشى اۋدانى قورقىت ستانساسىندا تۇرادى. بيىل جۇمىستان شىعىپ قالعان جامىتبەك وتباسىن اسىراۋ ءۇشىن قانداي دا ءبىر ىسپەن اينالىسۋدى ويلاستىردى. قولىنان ءىس كەلەتىن، ەڭبەكقور ادام بولعاندىقتان، جىلىجاي تۇرعىزۋعا شەشىم قابىلدادى. ويىن ىسكە اسىرۋ ءۇشىن كاسىپكەرلەر پالاتاسىنا كومەك سۇراي باردى. كەڭەسكە قانىققان ول، جازدا جىلىجاي سالۋمەن اينالىستى.

وڭىرلىك ينۆەستيتسيالىق ورتالىقتان 7 پايىزدىق مولشەرلەمەمەن العان 3,5 ميلليون تەڭگە نەسيەسىنە 500 شارشى مەتر بولاتىن جىلىجاي مەن ونىڭ پەشىن ءوز كۇشىمەن سالىپ، جىلۋ جۇيەسىن دە ءوزى جۇرگىزىپ الدى. تامىز ايىندا جەمىستەردى وتىرعىزۋدى باستاپ كەتتى، قازىرگى تاڭدا بيزنەسمەن قيار، قىزاناق سياقتى كوكونىستەر وسىرەدى. ءدامدى ءارى ەكولوگيالىق جاعىنان تازا ونىمدەرىن اۋىلداستارى مەن كورشى جاتقان اقاي، تورەتام اۋىلدارىنىڭ تۇرعىندارىنا، بايقوڭىر قالاسىنا ساتۋدى جوسپارلاپ وتىر. ەندى كاسىپكەر گۇل ءوسىرۋ ءۇشىن ەكىنشى جىلىجاي سالماق.

«جۇمىستان بوساپ قالدىم دا، وتباسىمدى اسىراۋىم كەرەك بولدى. باسىندا مال باققىم كەلدى. ءبىراق، تۋىستارىممەن اقىلداسا كەلە، سىردارياعا جاقىن قونىستانعاندىقتان، جىلىجايمەن اينالىسۋدى ءجون كوردىم. وسى ۋاقىتقا دەيىن جىلىجاي تۋرالى تۇسىنىگىم بولماعاندىعىنا قاراماستان، جۇمىستى باستاپ كەتتىم. جۇمىس دۇرىس ءجۇرىپ جاتقان سەكىلدى، ناتيجەسى بار، قولىمنان كەلۋدە. بولاشاقتا جىلىجاي اۋماعىن كەڭەيتىپ، ءىسىمدى ودان ءارى دامىتقىم كەلەدى»، - دەيدى ج. ءتورتۇلوۆ.

 ايتا كەتەرلىگى، وسى جىلدان باستاپ «اتامەكەن» كاسىپكەرلەر پالاتاسى مەن وبلىس اكىمدىگى بىرلەسە وتىرىپ، « قىزىلوردا شاعىن بيزنەس» جوباسىن ىسكە اسىرۋدى باستاپ كەتتى. جوبانى جۇزەگە اسىرۋعا ۇ ك پ 300 ميلليون تەڭگە، ال وبلىس اكىمدىگى 360 ميلليون تەڭگە ءبولدى.

جوبانىڭ ەرەكشەلىگى - ول اۋىلدى جەرلەردەگى كاسىپكەرلەردى قارجىلاندىرۋعا باعىتتالعان. اۋىلدىقتار ءۇشىن بانكتەن نەسيە الۋ زور ماسەلە ەكەنى انىق، ويتكەنى ولاردىڭ بانك تالاپتارىنا سايكەس كەلەتىندەي كەپىلگە قوياتىن مۇلىكتەرى جوق.

جوبانىڭ ماقساتى - شاعىن بيزنەستى دامىتۋ ارقىلى جاڭا جۇمىس ورىندارىن اشۋ، جۇمىسسىزدىقتى ازايتۋ، كووپەراتسيالاردى دامىتۋ ءۇشىن جاعداي جاساۋ، اۋىل شاراۋشىلىعى ونىمدەرىن قايتا وڭدەۋ بويىنشا جوبالاردى ىسكە اسىرۋ، وندىرىستىك ينفراقۇرىلىمدى (قويمالار، مال سوياتىن سەحتار، توڭازىتقىش جانە سۋىتقىش كامەرالار، لوگيستيكا) دامىتۋعا جانە وتكىزۋگە (باتىس ەۋروپا - باتىس قىتاي كۇرەجولىنىڭ بويىنداعى شاعىن بازارلار مەن ساۋدا پاۆيلوندارى) كومەكتەسۋ، ىشكى جانە سىرتقى بازار جەلىلەرى مەن ديستريبيۋتەرلىك جەلىلەردى بىرىكتىرۋ.

قازىرگى تاڭدا جالپى سوماسى 610 ميلليون تەڭگە بولاتىن 97 جوبا ىسكە اسىرىلدى.

اۆتور: ەلۋباي اۋەزوۆ