قاتونقاراعاي اۋدانىندا «التىن التاي» تۋريستىك باعدارى اشىلدى
بۇل باعدار تۋريستەرگە، تۋريستىك وپەراتورلارعا جانە ساياحاتتى جان سۇيەتىندەرگە ارنالىپ جاسالعان جانە پايدالانۋعا دايىن.
قازاقپارات ءتىلشىسىنىڭ حابارلاۋىنشا، اقپاراتتىق ورتالىقتىڭ ەرەجەسى بويىنشا، ءبىر قوناق ۇيدەن ەكىنشى قوناق ۇيگە، ءبىر اۋىلدان ەكىنشى اۋىلعا اۋىسىپ، جولاي تابيعي، مادەني جانە تاريحي جادىگەرلەرمەن تانىسۋ مۇمكىندىگى بار. كورشىلەس ورنالاسقان «ساماي» (وسكەمەننەن 390 شاقىرىم) نەمەسە «ياسنايا پوليانا» قوناق ۇيلەرىنەن ءورىل اۋىلىنداعى «يساتاي» نەمەسە «شاكارىم» قوناق ۇيلەرىنە كەلۋگە بولادى، ارى قاراي ۆەرا كليموۆانىڭ ومارتاسىنا نەمەسە قايىڭدى اۋىلىنداعى قوناق ۇيلەر كورىنىپ تۇر.
ءار قوناق ءۇيدىڭ وزىندىك ەرەكشەلىگى بار جانە تۋريستەرگە ۇسىناتىن ءارتۇرلى قىزمەتتەر جيىنتىعىنا يە. ودان بولەك، قوناق ءۇي يەلەرى اتپەن نەمەسە جاياۋ سەرۋەن، بەرەل قورعاندارىنا، يازيەۆوە كولىنە نەمەسە راحمانوۆ بۇلاقتارىنا راديالدى ەكسكۋرسيالار ۇيىمداستىرا الادى. ايتپاقشى، جۋرناليستەر مەن تۋريستىك فيرما وكىلدەرى وسى باعىتتىڭ العاشقى تۋريستەر توبى بولدى.
قوناق ۇيلەر تۋريستەرگە قوناق ءۇي كەشەندەرىنە بالاما بيۋدجەتتىك باعا ۇسىنادى. سونداي- اق وسى باعىت ارقىلى قاتونقاراعاي جەرىندە جىلدان- جىلعا دامىپ كەلە جاتقان مارال شارۋاشىلىعىمەن، اۋىل شارۋاشىلىعىمەن، اتا- بابالاردىڭ ءومىر سالتىمەن تانىسۋعا مۇمكىندىك بەرەدى. مۇنداي ۇسىنىستى ەشقانداي «جۇلدىزدى» قوناق ءۇي بەرە المايدى.
جەرگىلىكتى شەبەرلەرمەن تانىسۋ اۋىل تۋريزمىن دامىتۋدىڭ باستى العىشارتى جانە مۇنداي شىعارماشىل شەبەرلەر قاتونقاراعاي اۋدانىندا بار.
وسكەمەننەن ۇلكەن نارىن اۋىلىنا كەلە جاتىپ، قاينىش مانكەي قىزىنا، ال ەڭبەك اۋىلىندا گۇلنار قوجامجاروۆاعا قوناققا بارۋعا بولادى. شەبەرلەر ەجەلگى قازاق ونەرى «كەستە» ، شيدەن جاسالعان ساندىك كىلەمشەلەر، كيىز بەن جۇننەن بۇيىم جاساۋ بويىنشا شەبەرلىك ساعاتتارىن وتكىزەدى جانە قوناقتارعا كادەسىيلار تارتۋ ەتەدى.
«التىن التاي» باعدارى بويىنشا وتباسىمەن تابيعاتتا دەمالۋدى قۇپ كورەتىندەر، اۆتوكولىك، موتوتسيكل، ۆەلوسيپەدپەن ساياحاتتاپ جۇرگەندەر ساياحاتتاي الادى جانە وقۋشىلار مەن زەينەتكەرلەرگە تانىمدىق تۋر وتكىزۋگە بولادى.
