تۇلەكتەردىڭ قىزمەتكە تۇرۋى جوعارى وقۋ ورىندارىنىڭ جۇمىسىن باعالاۋدىڭ ولشەمى بولۋى ءتيىس - ق. توقايەۆ

استانا. قازاقپارات - جوعارى وقۋ ورىندارىنىڭ دەڭگەيىن تۇلەكتەردىڭ جۇمىسقا تۇرۋىنا قاراي باعالاۋ كەرەك.

بۇل تۋرالى پارلامەنت سەناتىنىڭ ءتوراعاسى قاسىم- جومارت توقايەۆ ءمالىم ەتتى.

«جاڭا جۇمىس ورىندارىنىڭ اشىلۋى، جۇمىسسىزدار مەن ءوزىن- ءوزى جۇمىسپەن قامتىپ وتىرعان ادامدارعا مەملەكەتتىك باعدارلامالار ارقىلى قولداۋ كورسەتۋ - جاھاندىق داعدارىستىڭ قازاقستاندىق ەڭبەك نارىعىنا تيگىزەتىن تەرىس ىقپالىن ايتارلىقتاي جەڭىلدەتۋگە مۇمكىندىك بەردى. دەگەنمەن دە، الدا تۇرعان جۇمىستار كوپ. «100 ناقتى قادام» ۇلت جوسپارىن ىسكە اسىرۋ اياسىندا پارلامەنت جاڭا ەڭبەك كودەكسى مەن حالىقتى جۇمىسپەن قامتۋ تۋرالى زاڭىن قابىلدادى. ەندىگى كەزەكتى وسى زاڭنامالىق اكتىلەردى ويداعىداي ىسكە اسىرۋىمىز قاجەت»، - دەدى ق. توقايەۆ سەناتتا ءوتىپ جاتقان «ق ر پرەزيدەنتىنىڭ 2015 - جىلعى 30 - قاراشاداعى جولداۋى اياسىندا جۇمىسپەن قامتۋ جول كارتاسىن قۇقىقتىق قامتاماسىز ەتۋ شارالار تۋرالى» تاقىرىبىنداعى دوڭگەلەك ۇستەل وتىرىسىندا.

وسى رەتتە ول جاستار جۇمىسسىزدىعى پروبلەماسىنا توقتالا كەلە، بۇل ماسەلەنىڭ شەشىمى بارلىق ەلدەردىڭ ساياسي كۇن تارتىبىندە باسىم باعىت بولىپ تابىلاتىنىن اتاپ ءوتتى. ب ۇ ۇ باعالاۋى بويىنشا بيىل بارشا الەمدە جاستار جۇمىسسىزدىعى جارتى ميلليونعا ارتىپ، 71 ميلليون ادامعا جەتۋى مۇمكىن. قازاقستان ءۇشىن دە جاستار جۇمىسسىزدىعى وزەكتى بولىپ تابىلادى. ەلىمىزدەگى جۇمىسسىزداردىڭ جالپى كولەمىنەن 38 پايىزى جاستاردى قامتىپ وتىرعان كورىنەدى. اسىرەسە، بۇل جوعارى وقۋ ورىندارى تۇلەكتەرىنە قاتىستى بولۋدا. سەبەبى، ولاردا جۇمىس تاجىريبەسىنىڭ جوقتىعىنان ەڭبەك نارىعىندا باسەكەلەستىك ءتيىستى دەڭگەيدە اسەر ەتۋدە.

«گەرمانيادا وقۋ ورنى ءوزىنىڭ تۇلەكتەرىنىڭ 70 پايىزىن جۇمىسقا تۇرۋىن قامتاماسىز ەتپەسە، بيۋدجەتتىك قارجىلاندىرۋدان قاعىلادى. بارشا الەمدە قابىلدانعانداي، تۇلەكتەردىڭ ناقتى ەڭبەكپەن قامتىلۋ كورسەتكىشى ەلىمىزدە جوعارى وقۋ ورىندارىنىڭ جۇمىسىن باعالاۋ ولشەمىنىڭ ءبىرى بولۋى ءتيىس. سونىمەن قاتار ءبىز كاسىپكەرلىك سالاسىنداعى مامانداردى ستۋدەنتتىك كەزدەن باستاپ دايارلاۋىمىز قاجەت. وسى رەتتە سۇرانىسقا يە ماماندىقتار مەن كاسىپتەردى يگەرۋگە جاس بۋىندى ىنتالاندىرۋىمىز كەرەك»، - دەدى ق. توقايەۆ.

اۆتور: رۋسلان عابباسوۆ