ەگىنگە تۇسكەن باعۋسىز مال يەلەرىنە ىقپال ەتۋ ماسەلەسى كوتەرىلدى

استانا. قازاقپارات - اۆتوكولىك جولدارى مەن ەگىنگە تۇسكەن باعۋسىز مال يەلەرىنە ءتيىستى ءتۇسىندىرۋ جۇمىستارىن جۇرگىزۋ كەرەك.

پارلامەنت ءماجىلىسىنىڭ جالپى وتىرىسىندا دەپۋتات كارىباي مۇسىرمان وسى ماسەلەنى كوتەردى، دەپ حابارلايدى قازاقپارات.

«مەنىڭ دەپۋتاتتىق ساۋالىم ق ر پرەمەر- ءمينيسترىنىڭ ورىنباسارى - اۋىل شارۋاشىلىعى ءمينيسترى اسقار مىرزاحمەتوۆ پەن ق ر ادىلەت ءمينيسترى مارات بەكەتايەۆ مىرزالارعا ارنالادى. اۋىلدىق جەرلەردە باعۋسىز بوس جۇرەتىن مالداردىڭ كوشەلەردى لاستاپ، جاسىل جەلەكتى باسىپ، جانشىپ، وتاپ، سونداي- اق قورشاۋلاردى قيراتىپ جۇرتشىلىقتىڭ رەنىشىن تۋعىزۋى جانە ءوسىپ تۇرعان ەگىنگە ءتۇسىپ، شارۋالاردى شىرىلداتۋى ءالى دە تىيىلماي كەلەدى. شارۋالار ءوز ەگىستەرىن قورعاۋ ءۇشىن جاز بويى بىرنەشە كۇزەتشى ۇستاپ، قوسىمشا شىعىنداۋعا ءماجبۇر. قاراۋسىز مالدار قاراڭعى تۇندە اۋىلداردىڭ ماڭىنان وتەتىن اۆتوموبيل جولدارىنا شىعىپ كەتىپ، زارداپتار الۋعا جانە جول- كولىك وقيعالارىنا دا سەبەپشى بولىپ جۇرگەندەرى دە جاسىرىن ەمەس. الايدا، قاراپايىم اۋىل تۇرعىندارى تۇگىل، كەيبىر اۋداندىق ءماسليحاتتاردىڭ حاتشىلارى، اۋىلدىق وكرۋگتەردىڭ اكىمدەرى مەن ۋچاسكەلىك ينسپەكتورلاردىڭ وزدەرى دە ەگىندى بۇلدىرگەن باعۋسىز مال يەلەرىنە اكىمشىلىك ىقپال ەتۋ شارالارى بارىن بىلمەي شىقتى»، - دەدى كارىباي مۇسىرمان.

ونىڭ اتاپ وتۋىنشە، قولدانىستاعى زاڭنامادا كوشەلەردى ءوسىپ تۇرعان جاسىل جەلەكتى جويىپ، گۇلزارلار مەن قورشاۋلاردى بۇلدىرگەن مال يەلەرىنە اكىمشىلىك ىقپال ەتۋ شارالارى قاراستىرىلماعان بولىپ شىقتى.

«سوندىقتان جەرگىلىكتى اتقارۋشى ورگاندارعا تۇرعىندار اراسىندا كەڭىنەن ءتۇسىندىرۋ جۇمىستارىن جۇرگىزۋ، ءجوندى تاپسىرما بەرۋدى جانە اكىمشىلىك قۇقىق بۇزۋشىلىق تۋرالى كودەكسكە ءتيىستى تولىقتىرۋلار ەنگىزۋدى سۇرايمىز»، - دەدى دەپۋتات.

اۆتور: رۋسلان عابباسوۆ