پرەزيدەنت ۇكىمەتكە ءداندى داقىلداردى ەكسپورتتاۋ ماسەلەسىمەن اينالىسۋدى تاپسىردى

استانا. قازاقپارات - كەشە ەلباسى نۇرسۇلتان نازاربايەۆ ق ر پرەمەر- ءمينيسترى باقىتجان ساعىنتايەۆتى قابىلدادى، دەپ حابارلادى اقوردانىڭ باسپا ءسوز قىزمەتى.

 كەزدەسۋ بارىسىندا ب. ساعىنتايەۆ مەملەكەت باسشىسىنا ەلدىڭ بيىلعى 9 ايداعى الەۋمەتتىك- ەكونوميكالىق دامۋىنىڭ ناتيجەلەرى جانە باستى مەملەكەتتىك باعدارلامالاردىڭ ورىندالۋ بارىسى تۋرالى باياندادى.

قازاقستان پرەزيدەنتى قازىرگى ۋاقىتتا جۇزەگە اسىپ جاتقان بارلىق باستامانى كەلەسى جىلى ودان ءارى ءتيىمدى جالعاستىرۋ ءۇشىن قاجەتتى نەگىز قالىپتاسقانىن اتاپ ءوتتى.

- بىرىنشىدەن، بيۋدجەتكە ءتيىستى وزگەرىستەر ەنگىزىلدى. سونداي- اق، بارلىق قاجەتتى مەملەكەتتىك باعدارلامالار قابىلداندى. اتاپ ايتقاندا، رەسپۋبليكانىڭ قارقىندى يندۋستريالىق- يننوۆاتسيالىق دامۋىن قامتاماسىز ەتۋ جانە ءتيىمدى كولىك- لوگيستيكا ينفراقۇرىلىمىن قالىپتاستىرۋدى كوزدەيتىن «نۇرلى جول» دامۋ باعدارلاماسى اياسىندا تۇرعىنداردىڭ ءال- اۋقاتىن ارتتىرۋ ءۇشىن شارالار قابىلداۋدىڭ ماڭىزدىلىعى انىق، - دەدى ەلباسى.

بايانداماسىندا پرەمەر- مينيستر رەسپۋبليكانىڭ الەۋمەتتىك- ەكونوميكالىق دامۋىنىڭ بارلىق نەگىزگى كورسەتكىشتەرى جونىنەن وڭ سەرپىن بار ەكەنىن ايتتى.

ب. ساعىنتايەۆ قازاقستان پرەزيدەنتىنىڭ بيىلعى 9 - قىركۇيەكتەگى كەڭەيتىلگەن ۇكىمەت وتىرىسىندا بەرگەن تاپسىرمالارىنىڭ ۋاقىتىندا ورىندالىپ جاتقانىن مالىمدەدى. اتاپ ايتقاندا، ەل ەكونوميكاسىنىڭ ودان ءارى دامۋىنا ىقپال ەتۋ ماقساتىمەن قوسىمشا 481 ميلليارد تەڭگە كولەمىندە قاراجات ءبولۋ ماسەلەسى شەشىلدى.

پرەمەر- مينيستر كۇنىنە 90 مىڭ باررەل مۇناي وندىرىلەتىن قاشاعان مۇناي- گاز كەن ورنىنىڭ ىسكە قوسىلعانىنا نازار اۋداردى.

بۇدان بولەك، ب. ساعىنتايەۆ ەلباسىعا ەڭ الدىمەن ازىق- تۇلىك پەن اسا قاجەتى تاۋارلار باعاسى، تۇرعىندار مەن الەۋمەتتىك مەكەمەلەردى ۇزدىكسىز جىلۋمەن قامتاماسىز ەتۋ ماسەلەسى، سونداي- اق تۇرعىن ءۇي قۇرىلىسى باعدارلاماسى اياسىندا جوسپارلانعان نىسانداردى ۋاقتىلى تاپسىرۋ تۇراقتى باقىلاۋدا ەكەندىگىن مالىمدەدى.

سونداي- اق، نۇرسۇلتان نازاربايەۆقا ەلدىڭ ەكسپورتتىق الەۋەتىن ودان ءارى ارتتىرۋ ءۇشىن قابىلدانىپ جاتقان شارالار تۋرالى حابارلاندى.

قازاقستان پرەزيدەنتى رەسپۋبليكادا جيىن- تەرىن ناۋقانىنىڭ اياقتالعانىنا توقتالىپ، ەندى ۇكىمەتكە استىقتى ەكسپورتتاۋ ماسەلەسىن پىسىقتاۋ قاجەت ەكەندىگىن اتاپ ءوتتى.

 - ءىرى ءداندى- داقىل ءوسىرۋشى بولىپ سانالاتىن كوپتەگەن ەلدەردە ەگىننىڭ جاقسى شىققانىن بايقاپ وتىرمىز. وسىعان بايلانىستى بۇل نارىقتا باسەكە جوعارى بولادى. ءبىز وسىعان دەيىن ءبىرقاتار ەلدەرمەن استىق ەكسپورتى جونىندە كەلىسىم جاسادىق. وسى ۋاعدالاستىق اياسىندا جەتكىزىلەتىن ءونىم كولەمىن انىقتاپ الۋ قاجەت، - دەدى مەملەكەت باسشىسى.

نۇرسۇلتان نازاربايەۆ كەزدەسۋ قورىتىندىسى بويىنشا ءبىرقاتار ناقتى تاپسىرما بەردى.