باس رەداكتورلار كلۋبىنىڭ باسشىسى وتاندىق اقپارات قۇرالدارىنان ەل ازعىندالۋ الدىندا تۇرعانداي اسەر الادى

استانا. قازاقپارات - «باس رەداكتورلار كلۋبى» قوعامدىق بىرلەستىگىنىڭ پرەزيدەنتى بيبىگۇل جەكسەنباي بۇگىنگى كۇنى ەلىمىزدىڭ بۇقارالىق اقپارات قۇرالدارىندا كريميناگەندىك (قىلمىستىق) اقپاراتتاردىڭ كوپ بەرىلەتىندىگىن سىنادى، دەپ حابارلايدى قازاقپارات.

«جالپى، سۋيتسيد ماسەلەسىن تەلەەكراننان كورسەتۋگە تىيىم سالۋ، شەكتەۋ ماسەلەسىن دە زاڭدى تۇردە قاراستىرۋ قاجەت دەپ ويلايمىن. بۇل - دەرت. ال دەرتتى بۇكىل دۇنيەگە جار سالىپ، ايتۋدىڭ قاجەتتىلىگى شامالى. ول سوناۋ كەڭەس زامانىندا دا بولعان. ءبىراق، كوپ جاريا ەتە بەرمەيتىن. قازىر جاسىراتىن جوق، كوپتەگەن بۇقارالىق اقپارات قۇرالدارىن، گازەتتەردى، اقپارات اگەنتتىكتەردى، تەلەارنالاردى قاراساق جاڭالىقتاردىڭ 90 پايىزى كريمينالدى. سونىڭ ىشىندە، اسىرەسە، زورلىق-زومبىلىق، پەدوفيليا، جەمقورلىق كوپ ايتىلاتىن بولدى»، - دەدى ول اقپارات جانە كوممۋنيكاتسيالار مينيسترلىگىنىڭ القا ماجىلىسىندە.

جەكسەنبايدىڭ پايىمىنشا، اقپارات زامانىمىزعا ساي، قوعامىمىزدىڭ دامۋىنا وڭ اسەر ەتىندەي مەيلىنشە جاعىمدى بولۋى كەرەك.

«ءبىزدىڭ ب ا ق- تى قاراعان كەزدە ەلىمىز ازعىندالۋدىڭ الدىندا تۇرعان نەمەسە سونى باستاپ كەتكەن مەملەكەت سياقتى كورىنەدى. ويتكەنى، كريمينالدى، جاعىمسىز اقپاراتتاردى كوپ بەرەمىز»، - دەدى بىرلەستىك پرەزيدەنتى.

اۆتور: مارلان جيەمباي