تەاترلار باسشىلارى تۇڭعىشباي جامانقۇلوۆ جەتەكشىلىك ەتەتىن وداقتان جاپپاي شىعىپ كەتتى
اسسوتسياتسيانىڭ پرەزيدەنتى بولىپ م. اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ كوركەمدىك جەتەكشىسى، ك س ر و حالىق ءارتىسى، مەملەكەتتىك جۇلدەلەردىڭ لاۋرەاتى، «م. لومونوسوۆ» وردەنىنىڭ كاۆالەرى، «وتان» جانە «دوستىق» وردەندەرىنىڭ يەگەرى اسانالى ءاشىموۆ سايلاندى، دەپ حابارلايدى قازاقپارات.
جاڭا قاۋىمداستىقتىڭ قۇرىلۋى تۋرالى قازاقستاندىق جەتەكشى تەاترلاردىڭ باسشىلارى جاريالادى. بۇل شەشىمدى قولداعانداردىڭ قاتارىندا م. اۋەزوۆ اتىنداعى قازاق مەملەكەتتىك اكادەميالىق دراما تەاترى، ع. مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى، ن. ساتس اتىنداعى ورىس مەملەكەتتىك اكادەميالىق بالالار مەن جاسوسپىرىمدەر تەاترى، م. لەرمونتوۆ اتىنداعى ورىستىڭ مەملەكەتتىك اكادەميالىق دراما تەاترى، مەملەكەتتىك رەسپۋبليكالىق كارىس مۋزىكالىق كومەديا تەاترى، مەملەكەتتىك رەسپۋبليكالىق ۇيعىر مۋزىكالىق كومەديا تەاترى، رەسپۋبليكالىق نەمىس دراما تەاترى جانە ت. ب. مادەني وشاقتاردىڭ باسشىلارى بار.
«جاڭا كاسىبي قاۋىمداستىقتى قۇرۋ تۋرالى شەشىم تەاتر قايراتكەرلەرى وداعى (ت ق و) جانە ونىڭ جەتەكشىسى تۇڭعىشباي جامانقۇلوۆتىڭ ەسىمىمەن بايلانىستى داۋ- دامايلاردىڭ بىتپەس لەگىنە وراي قابىلداندى»، - دەلىنگەن تاراتىلعان اقپاراتتا.
حابارلاماعا سۇيەنسەك، تەاتر سالاسىنداعى ءبىرقاتار مامان تەاتر قايراتكەرلەرى وداعىنان شىعۋ تۋرالى شەشىم قابىلداعان.
«تەاتر قايراتكەرلەرى وتاندىق تەاتر ونەرىنە قولداۋ كورسەتۋ بويىنشا مىندەتتەرىن جۇزەگە اسىرۋدى توقتاتقان ۇيىمدا وزدەرىنىڭ مۇشەلىك ەتۋىن ودان ءارى جالعاستىرۋ مۇمكىن ەمەس دەپ سانايدى. تەاتر قايراتكەرلەرى وداعىنان شىعۋدىڭ تاعى ءبىر سەبەبى - وداق جەتەكشىسى ت. جامانقۇلوۆتىڭ ۇيىمنىڭ بەدەلىنە نۇقسان كەلتىرىپ جۇرگەن ءىس-ارەكەتتەرى. مۇندا ت ق و پرەزيدەنتى ت. جامانقۇلوۆتىڭ ەسىمى «فەنيكس» فيلمىنە بايلانىستى سىبايلاس جەمقورلىق سيپاتىنداعى داۋ- دامايدا اتالۋى مەڭزەلىپ وتىر»، - دەلىنگەن تاراتىلعان مالىمەتتە.
«ءبىز «قازاقستان تەاترلار اسسوتسياتسياسىنىڭ» ماقساتتارى مەن مىندەتتەرى زامان تالابىنا ساي بولىپ، حالىقارالىق دەڭگەيدە رۋحاني باي مادەنيەتىمىزدى جان-جاقتى كورسەتەتىنىمىزدى مالىمدەيمىز»، - دەپ جازىلعان مەملەكەتتىك تەاترلار قۇرىلتاي جينالىسىنىڭ شەشىمىندە.
