قاراعاندىداعى قارجى پيراميداسىنا قاتىستى ءىس بويىنشا كومپانيا باسشىسى تۇتقىندالدى

قاراعاندى. قازاقپارات - قاراعاندىدا قارجى پيراميداسىمەن بايلانىستى ءىس بويىنشا «فينانسوپتو گرۋپپ» ج ش س- نىڭ باسشىسى الاياقتىق جاسادى دەگەن كۇدىكپەن تۇتقىندالدى، دەپ حابارلايدى قازاقپارات.

«قاراعاندى قالاسى وكتابر اۋداندىق سوتى 2016 -جىلدىڭ 18-قازانى كۇنى اتالمىش كومپانيا باسشىسى ەلەنا كولەسنيكوۆانى ەكى ايعا تۇتقىنداۋ تۋرالى قاۋلى شىعاردى»، - دەپ حابارلادى اۋداندىق سوتتىڭ باسپا ءسوز قىزمەتىنەن.

بۇل ءىس بويىنشا جاپا شەككەندەر قۇزىرلى ورگاندارعا شاعىمداندى، شىعىن 100 ميلليون تەڭگەنى قۇرادى.

ايتا كەتەيىك، جۋىردا قاراعاندى قالاسىندا «فينانسوپتوگرۋپپ» ج ش س- مەن بايلانىستى قارجى پيراميداسىن قۇرۋ ارەكەتى بويىنشا شۋ شىقتى. ۇيىم وكىلدەرى تۇرعىندارمەن بىرگە قىزمەت ەتەمىز جانە مول كولەمدە كىرىس تاباسىزدار دەگەن جەلەۋمەن ازاماتتاردىڭ قارجىلارىن جىمقىرعان.

«ەكىنشى جاق (ءارقايسىسى ءارتۇرلى سومادا) «فينانسوپتوگرۋپپ» ج ش س- نا تيەسىلى «Optovka» ءبولىمىن دامىتۋ ءۇشىن 1- تاراپقا قايتارىمدى نەگىزدە مول كولەمدە قارجى ۇسىنادى. ال 1-تاراپ ەكىنشى جاققا قايتارىمسىز تاۋارلار مەن قىزمەتتەردى جانە قارجى ۇسىنادى»، - دەلىنگەن كەلىسىمدە.

ال، فيرمانىڭ جابىلىپ قالعانىن ازاماتتار كەيىن بىلگەن دە قۇقىق قورعاۋ ورگاندارىنا شاعىمدانعان. وكتابر اۋداندىق پروكۋراتۋراسى ج ش س- نىڭ قىزمەتىنە تەكسەرۋ جۇرگىزدى.

فيرمانىڭ جارعىسى بويىنشا ۇيىم قۇرىلىس- مونتاجدىق جۇمىستارىمەن جانە ساۋدامەن اينالىسۋى كەرەك.

قارجى پيراميداسىن قازىر قۇقىق قورعاۋ ورگاندارىنىڭ وكىلدەرى دە تەكسەرۋدە.